¹ Lia tin–lé ǎl kwa kí liriŋa kɨ́sɨŋol ná suur–sí ka̱dɨne, Îsa namás tuŋa nás kééŋ Majira–sí risiŋ nás in beléŋ Pa̱rɨsɨŋa'ŋ sí tirma nʉŋɨ benel ná dééŋ arra beeŋ, Yeeŋ kila gé ǎl dǔu kunduŋa. ² Na ná A̱rɨ̂ nás jʉlɨŋ básáŋ kʉ̂mǒ naná a̱rɨ ná Bɨ́ kí lulu bawe kwa básáŋ kí too kʉ̂mbǒ. ³ ná a̱rɨ lia asá pa̱y ila asá tejiŋ ʉrɨŋ dʉó–sí sodoba kwa baŋ kí ósa'ŋ írí áŋol. ^{4 5} ká bɨŋa–sí náis kámíŋ kúíŋ jaruŋa, kilakwa–sí ka̱lɨ ábaba ila dîlliŋ sǔrŋa–lé kɨ́rɨwe', maraŋ gal ila a̱rɨ lé suŋŋá jɨ̂ttɨ á kaweba. Maraŋ Ká ná kawli gi sîŋ kɨ yé ǎl in loŋ áláŋ ka̱lɨ báa, Wʉ́o–sí ka̱lɨ báa ilaŋ Yés kʉro kee áláŋ gi útu ja̱bɨ lia ǎl busa ,ee in gîs kamíŋ áláŋ Yee ka̱lɨ báa. ⁶ Zidíŋa oos kí ridɨneŋa aw á julitieba? Maraŋ Zidí tog dog á keba ná Wʉ́o dééŋ loo ásloŋba. ⁷ Namaŋ kɨ́eŋ ta̱bʉŋ nyɨwɨ̂l nyét jɨlɨŋ, Ná ka̱lɨ ágitiba ɨdɨ̂ɨŋ Bɨ́ yee kila Zidiŋa–lé suŋŋá tarra baŋ. ⁸ Ná Ká in gîs kámíŋ kila kwa ǎl gîs ka kwaŋ ta̱bʉŋ kɨne, Dɨldɨ'ŋkwě baŋ síŋ yeeŋ Wʉ́o'ŋ Melega'ŋ ta̱bʉŋ ta̱ɨn ⁹ Maraŋ kila kwa aila Ká–sí kwaŋ ta̱bʉŋ kawreli Dɨldɨ'ŋkwě dog baŋ Yeeŋ–sí Wʉ́o'ŋ ta̱bʉŋ íríŋi. ¹⁰ Dʉó bi Dʉó ná Dɨldɨ'ŋkwě'ŋ ʉʉ kí jɨttɨŋ beléŋ básáŋ ka̱sɨl, maraŋ kwa kɨ̂t âl kʉo teeyaŋa'ŋ kí jɨttɨŋ kámíŋ Yeeŋ–sí taga ásáŋ ka̱sʉlba. ¹¹ Ná abá Yeeŋ Bɨ́ŋa–sí Ya̱hʉda'ŋ daara–lé ná A̱kʉro'ŋ toŋ Kurikwa–lé kʉndʉla áláŋ gí janɨ írí ka̱bɨya pellet iskeŋ á beba kɨ́eŋ sǔrŋa–sí ai–ii síŋ bari wala kaa nîŋ buwa. ¹² ilaŋ ná kʉo teeyaŋa bágísîŋ páálíya ila tin–lé ai–ii nîŋ buwa. ¹³ Namás kwaŋ dɨó Îsa– sí in kwǎ," Gʉʉdpááli dúíŋ bará juwa ná dáíŋ mɨrêt kaŋgar aisa dáíuŋ báa jundi . ¹⁴ Îsa namá in jawí," Dúíŋ mâpar kii nái Ká dɨ́eŋ jansadʉŋo wala gal jangardʉŋo jawí. ¹⁵ Liaŋ kwa–sí in kwǎ ʉ́dóŋas nʉŋɨ benel ná kɨ́eŋ sǔrŋa–sí zalbana nyéttiŋ karra bawi ɨdɨ̂ɨŋ ná Dʉó'ŋ jaiŋ kí ʉ́dóŋa kila ás tɨ̌elba asá Yé kee a̱rɨ tog dog aiba áláŋ yé nini ka̱waji ¹⁶ Lia lii Îsa namás in mitil tan tóóríg bá ka̱wâj kéŋá, Nás rǎ̱yta kéŋá ná kééŋ pɨla suŋŋá tullé kíréli. ¹⁷ Namás jaa nás dééŋ suur–sí in beléŋ Ká ná ai niŋ kaa ná loo áskaŋba áláŋ kúíŋ lótá in nyét dee–lé aa. ¹⁸ Namás dééŋ suur–sí in kwǎ," Ná ká in káa yee–ii áláŋ kúíŋ sʉrreŋa karo ná appá aa áláŋ dee–lé kúíŋ Gomoŋa nyét ná lóta kerŋa dee–íŋi. ¹⁹ Lia namás dúíŋ suur–sí in kwǎ Ká dʉó saada tullé Jɨ́ nás lótá tulléŋa nyét ayeŋa suŋŋǎ kila ǎl Jɨ́ jóel ka̱y–ii jaiŋ sikâl ájaŋba nás ki dɨ́ɨ́ŋ suúr seert jaa." ²⁰ Maraŋ Wʉ́o namás in kwǎ," Hai Jɨ́ in ulul Etteŋ lulé áláŋ dɨ́ɨ́ŋ kuy–ii kéyal ná kii ná duiti áláŋ kila lótá kila warɨs piá. ²¹ Îsa namás in aage naa namá ye–ii nás kwa kɨ̂t sí ɨndel ǎl kɨ́eŋ sǔrŋa–sí ka̱wɨjɨŋ gʉbʉlʉŋ kawe ritie maraŋ yeeŋ Wʉ́o'ŋ nʉŋɨ ka̱waja ágeba." ²² Lia Îsa namás kééŋ Majira–sí in kwǎ,"Naa Ká Bɨŋa–sí in kámíŋ jaiŋ' íŋ iskala ábâmba kaa níŋ bâm wala gal suurꞌiŋ iskala bâmba kaa niŋ bíŋí. ²³ Ilaŋ ná jaiŋ–ii nʉŋ–lé suŋŋǎ tullé ná suur gal jíŋilé suŋŋá tullé. ²⁴ Kʉroŋa–sí ba̱gɨl wala kola as reŋeliba wala taaŋa dorol ápiiba wala kʉlʉm ná sʉrre áska̱ɨŋba,Maraŋ ba Wʉ́o–ii ná in ní ná kámí ná Bɨ́ ná kiyaŋa–lé suŋŋá jo–ii baŋ. ²⁵ kɨ́eŋ iskeŋa nyét dɨ́eŋ jaiŋ–sí selem tog nyiya saŋ. ²⁶ Abá mááŋ botiŋ áláŋ ila a̱rɨ ittiŋ–sí báa kaaŋ ʉʉŋɨ ná ótá kerŋa iskeŋ bʉndel? ²⁷ Kila dâ̱yŋa úta'ŋ–sí ba̱gɨl asá dorrŋa ka̱ɨŋ ai–ii tɨtɨe yeeŋ táárí ápiába wala jɨbeŋa ápiyeba,maraŋ Ká kí see kámíŋ Ába Silíman kí dééŋ Kawaja ila mááŋ tóóríg jurɨ tullé niná kin da̱yŋa júta'ŋ ájiŋiba. ²⁸ Ná abá Wʉ́o dâ̱ɨŋa júta'ŋ–sí ínnaŋ jâmmil kila ǎl ottó inne ka̱ɨŋ sarre'ŋ ná útu ka̱ɨŋYé mááŋ Bɨ́ŋa–sí jɨbbeŋa kin–lé suŋŋá jâmmáil ági siŋ jiŋiba, Bɨ́ hia in kwa asá seejɨ̌a̱ itti baŋ! ²⁹ Jâm wala gal jaba–lé kɨ́eŋ kilmaŋa ai–ii sakkɨ́ba dɨ́eŋ iskalabâbba. ³⁰ Ilaŋ ná in Da̱ldɨ'ŋ jarra–sí in ótá suŋŋá putto tɨ́yal, Dɨ́ɨ́ŋ Âbba loŋ–sí ása in lótá–lé balbaŋ. ³¹ Maraŋ Wʉ́o'ŋ kuriŋ bóel namás kila ótá nyiŋi Bɨ́ŋa–sí. ³² Dúíŋ dʉoŋ itta'ŋ ka̱lɨ ái tɨ̌ba ɨdɨ̂ɨŋ dɨ́eŋ Âbba–sí kilma sɨmmôŋ áláŋ kuriŋ jawîl iní. ³³ Kɨ́eŋ ótá nyét juluŋ báwí ná kééŋ suŋgoŋa pa̱gɨrɨŋa–sí baní, kɨ́eŋ sûrŋa–sí suŋgoŋa kí jusulná írí baa ná dɨ́eŋ kawaja–sí jáwíl írí gʉbʉl baa in loo–lé ásáŋ á kʉnseba wala káám aŋ paagoba wala rúl aŋ kéba áláŋ jɨttɨ piá . ³⁴ Ɨdɨ̂ɨŋ ná dɨ́eŋ kilma baŋ loo kɨ̂t kee ǎl dɨ́eŋ gʉbʉl kee. ³⁵ Tááríg ásilaŋ beeŋ ná jurŋa nyimaŋa–lé bɨrɨsoná kɨ́eŋ Masaraja ná liiŋa. ³⁶ Niná koya kila ǎl dɨ́eŋ Sɨa̱t ila–sí kane ǎl birsiŋ subu'ŋ nyáŋa áláŋ ka̱ɨŋa, Ná Yé êl ná tʉsʉ tan Yeeŋ básáŋ tʉsʉ waar ka̱wlɨya. ³⁷ Ila tin–lé kila koya–lé bora patta iniŋi ǎl Sagal wa̱ɨtɨ áláŋ bʉlo ná asila ge,Ná Ká kí see see gîs ámíŋ Yé baŋ dééŋ tááríg jurɨ nyiŋi naŋ sîŋ yeeŋ–sí in kwǎ áláŋ sidab–lé oŋol naŋ sîŋ yeeŋ–sí na̱mɨe ŋar. ³⁸ Ee ila tin~lé kila koya–lé bora patta niŋi ná dɨ́eŋ Sagal wa̱ɨŋɨt áláŋ bʉlo ná ka̱lɨŋa ná asila ge áláŋ dog ki luli'ŋ tǔlle wala gal kí mɨrɨ̂t êl. ³⁹ Ná Bɨ́ ǎ̱w nás in baluŋ, abás toŋ' íŋ sɨɨt in loŋ naní ná káám ʉndʉl Yé kaam–sí aŋ jundi áláŋ dééŋ toŋ' íŋ ka̱rɨ. ⁴⁰ Na ná Bɨ́ dɨe–lé dog ǎ̱w ná asíl baaŋ ilaŋ ná Dɨldɨ'ŋkwě baŋ ila tin–lé êl asá Bɨ́ sureŋ ábawba". ⁴¹ Potoro namá in kwǎ," Loŋpii in mitil bal bás dee–lé dílliŋ laddiŋ wala kwa kerŋa–lé dog sí laddiŋ? ⁴² Loŋpii namá in jawí," lia kii níŋ naŋ oro jaa seejǎ̱ɨ dʉŋo–ii alá riya ná dʉó inniŋ bá ai–ii áláŋ Sagal kééŋ lótá wʉó jaa ná áláŋ koya sí na̱mɨ́e dɨ́eŋ tin–lé íni ⁴³ Ila tin–lé koye–lé bora patta nii gí ná dééŋ Sagal tóŋ wa̱ɨŋa ná bʉló ná Yé ila táárí–sí pii. ⁴⁴ Ná Ká ai as kí seeŋ see kámíŋ baŋila orojaa dʉŋo–sí baw ná kééŋ ótá nyéttiŋ wʉó jaa. ⁴⁵ Maraŋ ábas koi–ii dééŋ suur–sí in beléŋ dúíŋ Sagal ǎl duiti áláŋ tará tunɨ piá áláŋ wa̱ɨŋa ila namás tuun koya Nyaŋá ná Keya–sí laddi ná nʉŋ kaam ná kira bâ̱y nás tɨ́lɨ. ⁴⁶ Ko–ii ilala'ŋ Sagal baŋ tin–lé êl ná Yé as janába naŋ kí tin ila êl ná Yé áloŋba ná Sagal namá Yé–sí suŋŋá bɨle'n piá ná ki kila kwaŋ jaa ǎl seejǎ̱ɨ kwa á geba. ⁴⁷ Ila ko–ii ása dééŋ Sagala'ŋ ʉʉ loóm ná ásilaŋ áɨndelba wala gal a̱rɨ kɨ̂t ápiiba ǎl dééŋ Sagal kóel baŋ kí gabain naŋ gʉ̂bbin laddiya. ⁴⁸ Maraŋ ko–ii ása dééŋ Sagal a̱rɨ á loŋba ǎl Yé kóel ǎl a̱rɨ̌ pii áláŋ bɨleŋ kawe Yé–sí baŋ itti kaldiya dʉó kɨt–sí ná ótaŋa suŋŋǎ kanía dee–lé baŋ suŋŋǎ koŋiya ná dʉó kɨt ná óta suŋŋá kaye dee–le baŋ koŋiya dog. ⁴⁹ Ká kí ilaŋ kela ásáŋ utú Sʉʉrʉ–lé éla nái wóeliŋi básáŋ tɨ̌o ⁵⁰ Babar–sí jaba aŋ ná kʉndʉl a̱dɨd áláŋ yé êl nás ágiŋi! ⁵¹ Bɨ́ kɨ́eŋ ta̱bʉŋa–lé in b ǎl bawríti Ká sʉʉrʉ–lé êl áláŋ gís appɨ̂ŋ êl,Hai lila Ká in kámíŋ appɨŋ a–iiba maraŋ jaŋgari. ⁵² Na main íne toŋ ása kwa ooso kee baŋ kaŋgariŋiál nás suur dɨkko ka̱wɨ ná ɨɨs aw' íŋ garima gé ná a̱w ná ɨɨs' íŋ garima gé. ⁵³ Yeeŋ áláŋ naŋ Âbbaŋa kɨ̌eŋ dogólá 'ŋ garima gé ná Dogólá kɨ́eŋ Báaŋa 'ŋ garíma gé ná Íyaŋa dogólá 'ŋ Ka̱nɨŋ ná dogólá ka̱nɨ kɨ́eŋ garíma gé ná Mareŋa kɨeŋ dogóláŋ garíma gé ná Ka̱nɨ kɨ́eŋ Mareŋa'ŋ garíma ge." ⁵⁴ Îsa dog namás kwa–sí in kwǎ," ába kutuŋa ba̱gɨl ná kí dʉ́gʉ'ŋ ere kurel Bɨ́ wa̱rɨ̂gbɨt bá in buwa kuy–ii ǎl duiti áláŋ riŋo namá riŋo , ⁵⁵ Ná gal sɨɨd tiŋ kawlo ba̱gɨl ná sɨ́ɨl–ii ná namá in buwa ǎlduiti áláŋ loo tekke piá namá loo tekke piá. ⁵⁶ Ná bɨ́ dǔu júnduŋkwa ába sʉʉrʉ ná jawîl sí ba̱gɨl bás taga kwa–sí loo'ŋ arra beriŋel ailoŋ ná botoiŋ áláŋ kwa–sí lóta ilaŋ bawliti ǎl saa ka̱ɨŋ ná ʉndeli? ⁵⁷ Bɨ́ kaaŋ botoiŋ ásáŋ kɨ́eŋ sǔrŋa–sí lótá tulléŋa arra? ⁵⁸ ába kí dɨ́ɨ́ŋ da̱lɨmedʉŋo jansa bannimain ná jansa ábɨyoba bá ʉʉ ɨt jaa ná suŋŋá junyo nás ila jaliŋó–sí arraba ná áilaŋ á babaYé bá gi síŋ ka̱rgɨ náis jansadʉŋo–lé jee , Jansadʉŋo namái Sʉken–lé dóŋa jaa Sʉken namái tumná jabɨ . ⁵⁹ Ná in gís kámíŋ baŋ ɨdé jǎ̱w namá níŋ kila jaroro jaa ǎl ɨdé jalo."