¹ Sog dig Îsa bá kéŋá ná loo dig–lé jʉmala ǎlbás kééŋ jʉ́ma áge, kééŋ Majira'ŋ dɨó dig namá in kwǎ," Loŋpii ka̱y–ii jawli gîs ai síŋ kʉmel diliŋ inná ása Yáaye kééŋ Majira–sí pááli," ² Îsa namás in kwǎ," abá bóeli ásáŋ bʉ̂m bá in buwa Báa kaláŋ kɨ́ɨ́ŋ kona teyéŋa–sí ba̱gɨ kawe aw ná dɨ́ɨ́ŋ kuriŋ éla. ³ A̱ɨ–ii aw nai kereŋ Nʉŋ jani áláŋ taga pisiŋ kaam. ⁴ Ná kééŋ ka̱tɨ́eŋa–lé appeŋ jaw, ilaŋ ná Jɨ́ dog Dʉó bi Dʉó–sí appeŋ kawe,ǎl gis kɨŋa jɨtɨ pii ná jarríŋ ereŋ jano. ⁵ Ila Yé namás yeeŋ in kwǎ," ka̱y bá in ba̱gɨ́l ye abá loŋ sí dɨ́eŋ dɨó dʉó jaru kee ná dee–lé kí luliŋ tulé du–ii nás in beléŋ jaru ka̱y kasá dɨɨ–lé garaŋa ɨɨs dǐi ja̱y. ⁶ Na asá ilaŋ kele ɨdɨ̂ɨŋ dúíŋ jaru dig sabariŋ kéŋá ná êl, ná á̱rɨ ás aŋba áláŋ kani ná kamí. ⁷ Namá Dʉó kéŋá ná dɨó ka̱wɨŋɨ namá in jawí," bɨ́laŋ ágíwaba tʉsʉ mááŋ ása kʉrrɨ́ ná kí dogóláŋ mááŋ pɨtɨ kápa, ná kuŋɨ taga ásáŋ kawlaba áláŋ gí a̱rɨ dɨŋ aní . ⁸ In gîs kámíŋ ába yé ás jawlaba áláŋ yee íni bá in loŋ ásáŋ jawla ná kɨ̂t íní ǎl yé kóel ɨdɨ̂ɨŋ ná dééŋ jaru–ii ná yé kee ná togke saw ɨŋel áláŋ kanía. ⁹ Naa namáis in kámíŋ ee bá bɨŋo ná ma–ii kannía bôy–ii gí básáŋ bʉ̂bó namá tʉsʉ baldo bá gí síŋ ka̱wlɨ́ya. ¹⁰ ɨdɨ̂ɨŋ ná Dʉó bi Dʉó ná kɨ́lele ná níŋ kannía ná Dʉó kɨ̂t ná wóel básáŋ–síŋ bʉlo ná Dʉó ná tʉsʉ kaladdi básáŋ kawlɨya. ¹¹ Bɨ́ kaa Âbbaŋa baŋ, kilala baŋ abá gí dɨ́ɨ́ŋ kwě puú'ŋ ɨŋo Jɨ́ mááŋ namá Núum janí. ¹² Abá gí dɨró'ŋ ɨŋo Jɨ́ mááŋ namá Nyééŋ janí gol. ¹³ Ná aláŋ jɨtɨŋa baŋ Bɨ́ bás baloŋ áláŋ lóta tulléŋa kɨ́ɨ́ŋ dogólá–sí ai–ii nîŋ banní, Ná mááŋ Âbbá ǎl jawîl kee ai saa suŋŋá tullé–ii áláŋ kʉo teyaŋa kila kwa–si kíní ǎl Yé–sí seekéli?" ¹⁴ Sog dig Îsa namá kéŋá ná Dʉó ila–sí A̱rɨ̂t jʉrra ǎl bʉkʉ̂m kéŋá, ǎlbá ila Dʉó–sí aA̱rɨ̂t suúr kuro, namás dʉó jaa ná risiŋ kwa namás bat pirjen kawe. ¹⁵ Maraŋ kwa dǐi in ááge Yé ǎl a̱rɨt kí balazabun A̱rɨta'ŋ Âbó'ŋ dóra kʉrʉ̂ŋ." ¹⁶ Kwa kerŋa dog namá arre ná jawilîŋ ósomꞌiŋ kɨŋol. ¹⁷ Maraŋ Yé Îsa namá dɨ́eŋ arra raŋa namá in kwǎ," Kʉrɨŋ bi Kʉra̱ŋ ná dééŋ suúr ŋáríŋ ná suur–sí dɨkkó bá dééŋ suúr poiti ná Toŋ bi Toŋ ná dééŋ suúr ŋáríti bá dééŋ suúr poiti. ¹⁸ Ná lia A̱rɨ́t appâ dog abá suúr ŋáríŋ bá poiti ná suúr–sí dɨkkó ka̱wɨ dééŋ Kʉrɨŋ nái niŋ keer? Ká in sí ilaŋ kámíŋ ná Bɨ́ in bámíŋ ǎl Ká A̱rɨ̂ta kí Balazabʉn' íŋ dóra kʉrroŋ . ¹⁹ Ná abá Ká a̱rɨta–sí kí Balazabʉn' íŋ dóra kʉrroŋ, Ná Bɨ́ kɨ́eŋ jɨlokwaŋ kí kîŋ dóra–ii ná yeeŋ A̱rɨta kʉrro? Naa na baŋ kɨ́eŋ jandi kwǎ ge. ²⁰ abá ká A̱rɨta kí Wʉ́o'ŋ kʉro'ŋ dóra kʉrroŋ, Wʉ́o'ŋ Kʉra̱ŋ bá dɨɨ–lé éla ²¹ Abá Dʉó ka̱kkɨer Dereg tullêŋ jɨŋɨ nás dééŋ tóŋ jaan kééŋ lóta baŋ gʉbʉl ka̱ɨŋ. ²² Maraŋ abá Dʉó kéla nás dee–lé kʉrro suŋŋá kee básáŋ Dereg rɨye, ǎl ila dʉó see tɨ̌el ǎl Ye jaan namá jɨreŋa–si ŋara. ²³ Dʉó ná kíe ákkaŋba bá Dui–ii Garimi, Ná Dʉó kɨ̂t nás Wʉ́o–sí dorol ápiá ba bás perra pii. ²⁴ Abá Á̱rɨ̂t Dʉó'ŋ dɨó kuro bá kí nigeba'ŋ dɨó tɨrɨrɨ pii ná ʉ̂mmel kóel ná ágîs bʉlɨtɨba lia namá kin kwǎ áláŋila tóŋ–lé awgí ǎl undi. ²⁵ Abá wa̱yŋa ná ila tóŋ–lé paago namá bʉ́ló ná ila tóŋ–sí birnyîŋ ká̱ŋʉl. ²⁶ Lia ǎl piŋiti namás Á̱rɨta kerŋa sabe jolo ná dee–lé suŋŋá jɨ̂ttɨ gé lia Yé namá jee ná ila lóó–lé óŋo, ná ila toŋ' íŋ ʉʉ mááŋ ila wara–lé suŋŋǎ tara–ii." ²⁷ Lia dɨó Îsa bá kéŋá ná kin ʉ́dóŋa beléŋ ǎl Yáa–ii dig kwaŋ dɨó arra piá ná in beléŋa Wʉ́o sîŋ ila Yáa–sí koro yawyaw piá ǎl Jɨ́ kírí naŋ gí runyo. ²⁸ Îsa namás in kwǎ," gal aw náis kila kwa–sí suŋŋá eŋa ǎl Wʉ́o'ŋ belé–si kélkámie ná ba̱gɨ kawe ²⁹ Asá kwaŋ dalda nyiŋi nás únyúnyi kɨŋɨ, Îsa namás jaa ná in beléŋ kin porreŋa jɨtɨ ge, namá ka̱ɨŋ ná osóm kóeliŋi, Maraŋ Jôna'ŋ osómꞌiŋ paál, osóm keer ákebá áláŋ kannía. ³⁰ Ilaŋ ná Jôna Ninaye–lé osóm kéŋá, Ná Dɨldɨ'ŋkwě dog baŋ kin Porreŋa–lé osóm–ii. ³¹ Yáakʉra̱ŋ ǎl Sɨddɨ'ŋ ere kéŋá, ná kéla Jansa'ŋ sog–lé básáŋ kí kin porreŋa 'ŋ arra kawla ná kin porreŋa–sí ja̱nɨ írí já̱bɨ ,ɨdɨ̂ɨŋ yé main karra kéŋá ná éla aláŋ Silimân' íŋ rɨɨŋ kélámíe. ³² Ba̱gɨl ná iní ála Dʉó kee ná Silimân–lé appâ–ii, jânsá'ŋ sog–lé Ninaye ásáŋ kí kin porreŋa arra wa̱rɨ̂g kawla ná kin porreŋa–sí ja̱nɨ írí ka̱bɨya,ilaŋ ná yeeŋ Yôna'ŋ gʉʉdata–lé tubeŋ kɨŋɨ, ba̱gɨl naa iní alá Dʉó kee ná Yôna–lé soŋŋá appâ–ii. ³³ Dʉó á keba nás Masaraja pʉwol namá loo kɨ̂t–lé jaa alá loŋitiba wala gal namás kí Kora jʉ̂m, mámaŋ bá dééŋ Mardabin írí jawriti ásáŋ kila kwa–sí loo ereŋel ǎl kʉndʉla áláŋ ka̱rɨ́ya. ³⁴ Dɨɨ́ŋ Nʉŋɨ dɨ́ɨ́ŋ suur' íŋ hêrra, ila tin–lé dɨ́ɨ́ŋ Nʉŋɨ teeye–ii dɨ́ɨ́ŋ suur nyét bás kí hêrra pisi, Maraŋ ila tin–lé ǎl kɨ́ɨ́ŋ kʉŋɨ nyókége dɨ́ɨ́ŋ suur bás lʉmʉsɨ. ³⁵ Bale jaa áláŋ hêrra ása dɨ́ɨ́ŋ dɨó kéŋá ás waiba. ³⁶ Naa naa ábas dɨ́ɨ́ŋ suur hêrra pisiŋ kee nás dɨkkɨŋ á keba básáŋ kí dééŋ hêrra nyéttiŋ erriŋ inala Masaraja kee nás Jɨ́ ereŋel ³⁷ Ǎlbás Yé belé age, parisí dig namá Yé–si na̱mɨŋ ímaŋa namá nyáŋa ná sidabin dakki oŋo áláŋ kíe na̱mɨ́ kawe. ³⁸ Maraŋ pa̱rɨsɨ–sí namás pirje eŋa ǎl Îsa main koŋa á liyoba. ³⁹ Lia Loŋpii namá in kwǎ," Naná Bɨ pa̱rɨsɨŋa kasa ná páŋgá–sí bá dééŋ sor báli ná dééŋ dɨyo ábaliba, Maraŋ namás dɨó'ŋ bʉndɨ , maraŋ namás dɨó'ŋ kilmaŋa kurru ná jɨtɨbaŋ. ⁴⁰ Bɨ́ bat kin lulla dʉó ǎl sor–sí taan dɨó–sí á tewaba. ⁴¹ Maraŋ pa̱gɨrɨŋa kɨ̂t baní ǎl paŋgá–lé kee ná Bɨ́ŋa–sí ná máis ʉ́dóŋa nyét teeya ɨŋɨ. ⁴² Mine a̱w ná dɨ́e–lé Bɨ́ pa̱rɨsɨŋa bɨ́ Wʉ́o–sís kɨ́eŋ Naneŋa ná Mʉrɨŋa ná kɨ́eŋ pɨla kerŋa nyét ǎl kɨ́eŋ káríta–lé béréŋel baríŋi áláŋ Wʉ́o–sí ban' áláŋ wa̱y–ii jeŋ dɨó tog bannie ,ná Wʉ́o'ŋ joiŋí sís nʉŋɨ bapa maraŋ bá inloŋa áláŋ Wʉ́o joiŋ ná arra jaá–sí báa ná wa̱yye'ŋ dɨó tog' íŋ jani sí aŋ bundiba. ⁴³ Mine aw ná dɨ́e–lé jee Bɨ́ pa̱rɨsɨŋa ɨdɨ̂ɨŋ ná Ya̱hʉda'ŋ daara–lé kʉdɨŋa bǎrŋa'ŋ tulléŋa–sí í bóel ná doŋa'ŋ janí Wělieŋa'ŋ looŋa–lé bóel . ⁴⁴ Mine aw dɨ́e–lé jee ɨdɨ̂ɨŋ bɨ́ in baluŋ inná Turbaŋa ása sɨgela aka̱ɨŋbaná kwa dééŋ írí kɨloge ás kalŋaba ása dɨó maŋ ka̱y." ⁴⁵ Mûsa'ŋ gʉʉdpáálíŋ dɨó díg namá in jawí," Gʉʉdpáálí kí dɨ́ɨ́ŋ belé in jirsiŋ tara iila dog Kɨŋa janiŋ. ⁴⁶ Îsa namá in jawí, Ná bɨ́ ǎl Mûsa'ŋ gʉʉdpáálíŋa mine aw ná dɨ́e–lé jee ɨdɨ̂ɨŋ bɨ́ kwa–sí kóta dɨ́roŋa betebel ná kí tabaŋ ka̱bɨya ná Bɨ ná ittiriŋ dog á bányitiba. ⁴⁷ Mine aw ná dɨ́e–lé jee ɨdɨ̂ɨŋ ná Bɨs Domoŋkwa–sí turba burrtu, ná ba kɨ́eŋ Báaŋa war kwaŋ gé ná Yeeŋ–sí ka̱wŋɨ . ⁴⁸ Innaŋ namás kɨ́eŋ Báaŋa warkwa–sí nʉŋɨ bɨndel ná kɨ́eŋ tááríŋǎ–sis bɨnel Yeeŋ domoŋkwa–sí ka̱wŋɨ ná bɨ nás Yeeŋ–sí Turbaŋa bʉtʉ́m. ⁴⁹ Inniŋ ná Wʉ́o kí dééŋ rɨɨŋ namá in kwǎ,"ná Ká ásáŋ yeeŋ–si Domoŋkwa ná Kʉréméŋa adden áa dǐi–sí ná mineŋ kawa ná kerŋa–sí ná ka̱we . ⁵⁰ Náná namá ilaŋ gé ná domoŋkwaŋ kewa alá ka̱wɨŋ main juŋ–lé bás in tini'ŋ porreŋa'ŋ táala–lé tǎ̱ɨl . ⁵¹ In ná namás main Ebeli'ŋ kewa–lé dɨɨlɨ namá níŋ Zaka̱rɨ'ŋ tin–lé jaago ǎl Gʉbboŋa'ŋ tóŋ' íŋ tasa–lé kí Toŋteyeŋa'ŋ –lé ka̱wŋɨ Eee ná Bɨ́–sí bais in kámíŋ in ʉ́dóŋa'ŋ táala–lé bás in porreŋa–lé tǎ̱ɨl. ⁵² Mine aw ná dɨ́e–lé Mûsa'ŋ dali'ŋ gʉʉdpáálíŋa ɨdɨ̂ɨŋ nás bɨ́ jɨwɨ–sɨ gansraba ná bɨ́ kí kɨ́eŋ sǔrŋa dog ába̱rɨba nás kila kwa–si bariŋi áláŋ ka̱rɨya." ⁵³ Lia Îsa namá kurro ná nyaŋá, main ila tin–lé Pa̱rɨsɨŋa ná Mûsa'ŋ dali'ŋ gʉʉdpáálíŋa namás kayé ná yé–sí tekké sa̱w kawyél . ⁵⁴ Ná jɨŋoŋa suŋŋá kannía ná wóel áláŋ ɨŋo dg–lé poyya.