¹ Lia Loŋpii namá Majira wa̱yyéŋa sabe jaŋo, namá dééŋ ta̱bʉŋ adden piá, Deem bi Deem ǎl Yé kóeliŋi áláŋ jee . ² Namás yeeŋ in kwǎ," Taa suŋŋá–ii maraŋ táárí kwǎ itage, kâ̱y–ii Taa'ŋ loŋpii–sí bɨŋo áláŋ táárí kwa–sí dééŋ Taa'ŋ râ̱y adden piá. ³ Boo ná baáli baa, Ká in gí adden kawa inná kʉnɨŋa Toroŋa'ŋ dɨó. ⁴ Ná alá gal banní Jusulan wala gal Mellé wala perêt ás babʉ̂ba dǒra tin kwaŋ janilé adden ábaba ⁵ Abá tóŋ dig–lé ba̱rɨ main bá toŋ' íŋ kwa–sí dóŋa baní nás in buwa aw ná in toŋ–lé appeŋ kee. ⁶ Abá ilaŋ ná Dʉó kee nás bora kilmá kee Wʉ́o'ŋ appíŋ baŋ dééŋ írí bʉŋɨ, ná ábabʉ̂boŋba Wʉ́o'ŋ appíŋ dééŋ írí aŋ bʉŋɨba. ⁷ Bá ila toŋ–lé boŋ ná bá a̱rɨ kɨ̂t bâm ná babá âl gí Yeeŋ kaní,ɨdɨ̂ɨŋ ná táárídʉŋo inloŋ áláŋ kééŋ dʉléŋá bʉ̌w, tóŋa'ŋ tasa–lé abɨlŋɨba. ⁸ Abá Deem dig–lé ba̱rɨ́ ná gis kɨ́tɨ́reŋi a̱rɨ̂t náis dɨ́eŋ ta̱bʉŋ káyé bá bâm. ⁹ kwa kɨ̂t ná waján gé bá dawíŋ baa ná in sí buwa Wʉ́o'ŋ kuriŋ ǎl dɨ́eŋ dakki kela. ¹⁰ Maraŋ abá Deem dig–lé ba̱rɨ ná ágis kɨtɨreŋiba, Bá Deem' íŋ oroŋa–lé boo ná in bámíŋ. ¹¹ Namaŋ dɨ́eŋ Deem' íŋ turîl ǎl gis kɨ́ŋa tǎrŋa–lé tɨ̌yo áláŋba petpet kaa náis Bɨ́ŋa tɨŋɨ, Maraŋ aw nás in bɨw Wʉ́o'ŋ Kuriŋ ǎl dakki kéla, ¹² Ná ká kámíŋ gîs ila Jansîŋ sog–lé mááŋ níŋ Sodoma'ŋ rɨ́mo suŋŋá hɨnɨ main kí in Deem' íŋ rɨ́mo ¹³ Mine kásáŋ Kurazini'ŋkwa–sí eeŋ ná mine kasâŋ Besédakkwa–sí eeŋ ɨdɨ̂ɨŋ naŋ in pirjeŋa dɨ́eŋ taas–lé Tira ná Sidon ka̱ɨŋɨ, kwa baŋ main toorig tubeŋ ka̱ɨŋɨ naŋ jurɨŋa nyérta kiŋi. ¹⁴ Maraŋ mááŋ in Tira kí Sidon suŋŋá rɨmol ila Jansîŋ sog–sí main kɨ Bɨ́. ¹⁵ Ná Bɨ́ ka̱pa̱nɨŋa aslaŋ kí írí ka̱gɨ́l áláŋ gís jawîl kɨ́yál? Lolo Bɨ́ŋa–sí dǔu'ŋ dǔu gí síŋ kɨ́ya. ¹⁶ Dʉó kɨ̂t ǎl gís bɨ́ŋa kélkám, Báis Ká sí kélám, Ná kɨ̂t ná gi Bɨ́ŋa urel bá gi Ká urel, ná kɨ̂t ná Ká sí irel, bá Dʉó kɨ̂t sí irel ǎl gi Ká sí adden piá," ¹⁷ Ǎlbás kila wa̱yyeŋa sabe kí kilma'ŋ sɨmmɨ̂ŋ ka̱yŋol ná ka̱ɨŋe ná in ááŋe," Loŋpii kɨ́ŋa–sí namaŋ gí A̱rɨta dɨ́ɨ́ŋ kona'ŋ ba̱gɨ pii . ¹⁸ Îsa namás in kwǎ Ká A̱rɨt appâ ka̱gɨl ná míŋ jawǐl in polé niná kuŋi 'ŋ julmola. ¹⁹ Ká Bɨŋa kuriŋ gí kaní ásáŋ Garima'ŋ kʉro sí nyét kʉro'ŋ baw, niná áláŋ kʉmɨ́ ná Nyéŋá–sí barnyiŋ, ná a̱rɨ ágíŋ bʉlɨtɨba . ²⁰ Naa ná mááŋ kilmaŋa sɨmmó ágí ɨŋɨba ilaŋ ǎl gi A̱rɨda ba̱gɨ piá, maraŋ baw nii kilmaŋa sɨmmó ɨŋɨ áláŋ kɨ́eŋ kona jaiŋi'ŋ domobore–lé kawal ²¹ Ila tin–lé Îsa namás kí kʉo teeyaŋa'ŋ dóra kí kilma'ŋ sɨmmɨ̂ŋ piis eŋa, namá in kwǎ," Ká assó gís kamíŋ Âbba alá jawîl ná sʉʉrʉ'ŋ Loŋpii jaŋ, ɨdɨ̂ɨŋ ná Jɨ́ kin lótá kwa riyaŋa ná gʉʉdkwa–sí jʉla namás kwa da̱lʉla–sí jawli niná kin dogólá dokkeŋa, Ee Âbba in ʉʉ ilaŋ eŋa náis Jɨɨ tulléŋ ²² Dúíŋ Âbba lótá nyét Kaa dóŋá jaa, Dʉó ákeba nás loŋ Kwě dee kii–ii bás Âbba diliŋ loŋ, Ná Dʉó á keba nás loŋ Âbba kii–ii bá diliŋ Kwě–ii nás loŋ, Ila kwa dog sí kaloŋ ǎl kwědee jaŋo ásáŋ Âbba–sí kaloŋa." ²³ Ila namás kééŋ Majira–lé ja̱ɨŋo nás kí bʉtʉ in kwǎ," kwa kila sí ǎw nás bora patta eeŋ ǎl lóóta kila ka̱lwɨ́e ǎl Bɨ́ ba̱lɨ. ²⁴ Ilaŋ ŋi nás ká in naŋ ámíŋ ná Domoŋkwa suŋŋá ná Abukuriŋa kóeliŋi áláŋ óta kin–sí ka̱gɨ́l ǎl Bɨ́ ba̱lɨ, maraŋ á ka̱gɨ́leba naŋ dog kóeliŋi áláŋ lóta kɨ̂t kékámmíe maraŋ kélámmíeba." ²⁵ Asidíg Mûsa'ŋ gʉʉdpááli dig namás jwala áláŋ Îsa–sí arri namá in ɨŋo, Gʉʉdpááli kaa nîŋ aa áláŋ jaiŋ lʉŋɨ wariseŋ eeŋ?" ²⁶ Îsa namá in ɨŋo dalilé aa–ii remmeŋ eŋa? Ná jɨ́ dééŋ arrá ai–ii jereŋel?. ²⁷ Ila dʉó namá in jawí, áláŋ Loŋpii dɨ́ɨ́ŋ Wʉ́o–sí ba̱gɨ jaa, kí dɨ́ɨ́ŋ kilmá nyét ná kí dɨ́ɨ́ŋ kuy nyét ná kɨ́ɨ́ŋ kʉro nyét ná kí dɨ́ɨ́ŋ ta̱bʉ nyét joyŋi, Ná dɨ́ɨ́ŋ jɨ́rîŋ–sí in joŋi ǎl Jɨ́ dɨ́ɨ́ŋ suur–sí jóel. ²⁸ Îsa namá in jawí bat taras jaw bá innálaŋ jaw ǎl dalí beléŋ namás jaiŋ lʉjɨŋ jaŋ ²⁹ Maraŋ Mûsa'ŋ dali'ŋ gʉʉdpáálí bá kóeli ásáŋ dééŋ suúr in raŋ,Ǎlbá yé–ii Îsa–sí ná jɨ́lel kii ná dúíŋ jɨrani?. ³⁰ Jawíla Îsa namás in kwǎ," bá Dʉó kéŋá ná Jʉrasalam jawla ná Jariko duyéŋi namá Gammáyé'ŋ dóŋa poy, Gammáyéŋa namás kééŋ jʉrɨŋa kɨ́rɨye ná kaladdíe ná Yeeŋ ná ka̱kkɨ́e ná kééŋe ná Yé–sí ná kundíe nás kira kí kariŋa ɨ́tɨ ³¹ Ɨdé sememeŋ namás pa̱gɨ tan ná Jʉrasalam kí ila dóra duyaŋi, ǎlbá ila Dʉó–si ja̱gɨla namá kí dóra ker taga panyo. ³² Naŋ dog Leba dʉŋo dig kéla kí ila dóra naŋ dog taga panyo ná nyaŋá ³³ Maraŋ Samáradʉŋo ǎlbá êl ná kí ila dóra kɨloŋa ǎlbá ila dʉó–sí ja̱gɨ́la namás dééŋ ʉʉ áyiŋ eŋa. ³⁴ Samáradʉŋo namá nyáŋa nás kééŋ kiyaŋa kí kira ná da̱y liyo namás rɨgo lia Samaradʉŋo namá bawa ná dééŋ leeli'ŋ írí jaa nás Sola'ŋ tóŋ kere namá dééŋ oro piá. ³⁵ Elelí'ŋ namá dɨnara aw raŋa namá ila sola'ŋ toŋ' íŋ sɨt sí iní, namás in kwǎ ka̱y in dʉó–sí ja̱lʉya namaŋ lia ába ká â̱yŋa nama gí soŋgoŋa ila kaní asá írí nyíye ³⁶ Kin ɨɨs' íŋ dɨó a̱y dig nás jɨ́ in loŋ ǎl ila dʉó'ŋ jɨrani ǎl Gammayeŋa kaladdie?. ³⁷ Mûsa'ŋ dali'ŋ gʉʉdpáaáli namá in jawí ǎl ila dʉó–ii asá dééŋ ʉʉ kaiŋ kéŋá,Yé Îsa namá in jawí ǎl joo ná in jaa ǎl in Dʉó piá ³⁸ Îsa kí kééŋ Majira'ŋ bá dóra ka̱ɨŋ kɨloŋi namá toŋ dig–lé paago, ǎl dee–lé Yáa kéŋá ná Marsa ka̱rɨ ila Yáa namás Îsa dééŋ tóŋ dɨre . ³⁹ Namás ditan kéŋá Moo ka̱rɨŋ, Moo namá êl ná Loŋpii'ŋ tǎrŋa kîli oŋo ná kee nás Îsa'ŋ beléŋa kéláma ǎl risiŋ ⁴⁰ Maraŋ Marsa–sí namás kí ájíŋa tɨ̌e, ná kéŋá nás kwa–sí lótáŋa ásilaŋ pii. namá Îsa êl ná in ɨŋo Loŋpii, Jɨ́ bása ája̱ymelba ǎl ká dúíŋ ditan ditin jundi? ná táárí ditin âw ka̱y jawlas nás janyiŋi , ⁴¹ Loŋpii namá in jawí." Marsa Jɨ́ aŋ ʉdóŋa suŋŋǎ naŋ gí kilmá sondorôg ʉndeliŋ , ⁴² Maraŋ tog deliŋ dɨ́ɨ́ŋ jaiŋ–lé ná dɨɨ–lé tullé–ii , Moo a̱rɨt jaŋo ǎl tullé–ii ná a̱rɨ dee–lé taga aŋ kabeba.