¹ Li–ii kwa soŋŋâ kʉrro kané, ná kila aldíŋá rímmeŋ káwe kila ʉ́dóŋá'ŋ ǎl dáíŋ tâs–lé ɨŋɨ, ² Alá îsa'ŋ ŋiŋ risíŋá in ǎila kɨŋa kila kwa kaníe, kwa kɨd alá waar ka̱gɨle namá ila belé'ŋ táárí kwǎ kɨŋɨ. ³ Na naa ǎl ká kúdííŋ dorol miǐn waar kin ʉ́dóŋá–sí nyéttin táráásiŋ kwě'ŋ a̱gɨla, ka–sí dog gîs tullé lóóŋíti dúíŋ sagal Sopilaas, ⁴ áísáŋ jɨɨ aldí terere rímmeŋâ, áísáŋ jɨɨ in beé see eeŋ aísa jɨɨ káwlíe. ⁵ Yáaye jálíŋodʉŋo'ŋ Da̱a̱rɨŋꞌíŋ Súrrin jâ: ába kuri Hiródꞌíŋ tin–lé Ya̱ʉ́da'ŋ pá̱gɨ kéŋá ná in ka̱rɨ̂ŋɨ Za̱kkrɨ́ya ná a̱bɨla'ŋ dorá'ŋ kwa–lé aáŋá na dééŋ yáa'ŋ kwě a̱lɨ́zabés a̱rʉ̂nꞌíŋ atineaáŋá. ⁶ Yeeŋ kwa a̱w dog Wʉ́o'ŋ ere wá̱rɨga ka̱ɨ̌ŋ, ila namá dééŋ arrá in lóŋ Loŋ piíŋ káálíŋtá na koraŋ nyét–le lôm ás ka̱ɨ́ŋba. ⁷ Marraŋ yeeŋ dogólá ás ka̱ɨŋba ɨdɨɨ̌ŋ ná a̱lɨ́zabés baaru aáŋá, na yeeŋ kwa a̱w dog appâ kɨŋɨ. ⁸ Asi díg asá Za̱ka̱rɨ́ya'ŋ kwǎ'ŋ táárí'ŋ della aáŋá, yé Wʉ́o'ŋ ta̱bʉ'ŋ pá̱gɨ aáŋá nás Wʉ́o–sí táárí píéŋí. ⁹ Na yee–sí kí aara'ŋ ja̱bɨ́ ka̱á̱ŋʉl kí kila koraŋa alá pá̱gɨŋa–sí kǎwŋeli, álá Loŋ piíŋ toŋ tiyyâ–lé jee nás sʉ́ʉ́lá̱ sʉ́ʉ́l piyá. ¹⁰ Na abá sʉ́ʉ́lá̱'ŋ jʉɨ́ŋ tin paago kwa soŋŋâ ǎl paál ka̱ɨ́ŋ ná kʉ́meliŋ–ii. ¹¹ Za̱ka̱rɨ́ya–sí namá Loŋ piíŋ meleg lóóŋóla ná sʉ́ʉ́lá'ŋ saba gôboŋá'ŋ saba súru'ŋ eré kééŋá ná kɨɨréliŋi–ii. ¹² ǎlbá já̱gɨ́la namás bíí namá ka̱lɨ tɨ́o nás jáá ná kítíŋ. ¹³ Marraŋ meleg namás in kwǎ,"Za̱ka̱ríya ka̱lɨ aítɨ̂ba, Wʉ́o áisa dɨ́ɨ́ŋ jʉ̂m kelamí. Dɨ́ɨ́ŋ dʉó'ŋ yáa Alízabes áláŋ kwǎ dee tɨɨ̂ námás kona Yáaye janí. ¹⁴ Na jɨɨ áíláŋ bát kilmá sɨmmó eeŋ, Na áláŋ kwa soŋŋâ–sí dééŋ da̱a̱rɨŋꞌíŋ írí kilmaŋa sɨmmó ɨŋɨ. ¹⁵ ɨdɨ̂ǐŋ ná Loŋpiíŋ kʉ́ŋɨ́–le. áláŋ soŋŋâ appá–ii, Na yé kira wala kira ka̱kkɨ́reŋa asá kwa–sí tɨɨlɨ péllét áláŋ á baaba, NA ásáŋ miǐn dééŋ íya'ŋ dɨó kí kuo tiyyâŋa pis eeŋ. ¹⁶ Na ásáŋ Israílíŋá'ŋ kwa soŋŋâ–sí Loŋpii dɨ́eŋ Wʉ́o–lé wá̱ɨ́ŋa. ¹⁷ Yé áláŋ Loŋpiíŋ eré ɨlŋɨ́ Elíja'ŋ kʉo na kʉrro'ŋ dɨó, ásáŋ bâŋa–sí kɨ́ kɨ́eŋ dogólá'ŋ suuleŋ piyá na kwa asá ba̱gɨ á ka̱ɨba ná kwa wá̱rɨga'ŋ rɨɨŋ íní ná wá̱rɨga kawŋíyal na áláŋ kwa–sí ásíleŋ piyá ná Loŋpii–lé kawŋíyal. ¹⁸ Za̱ka̱rɨ́ya namá meleg–sí ɨŋo, " Na ká inîǐŋ arrá ay–ii níŋ aráŋ? Ná ká̱ dʉóbain eŋa na dúíŋ yáa'ŋ kwě naŋ dog yáa toy–ii eŋa. ¹⁹ Meleg namá in jáwí, " Ká Jɨbrɨ̂l aŋ, ká Wʉ́o'ŋ ta̱bʉ'ŋ éérél. Kaa ádden gî káwe áísáŋ jɨɨ írsíŋo na áísáŋ in belé tullê wa. ²⁰ Na naa jɨ́ áláŋ dirrig jôŋ ná taga á jírsíŋobaʉ, namaŋ nîŋ ʉʉ eŋ, iláiŋ ná jɨ́ dúíŋ belé see á jeyába ila ǎl dúíti áláŋ dééŋ tin tullê–lé see eŋ." ²¹ ila tin–lé kwa namá Za̱ka̱rɨ́ya–sí kaane, kila kwa–sí namás pirje eŋa Za̱ka̱rɨ́ya toŋ tiyyâ'ŋ dɨó innâŋ kurrá kaáŋ ooŋo. ²² ǎlbá tawrá koro namá toyŋo ásáŋ kwa–sí risíŋó, yeeŋ namás kɨ́wé yé âl toŋ teyyâ'ŋ dɨó jaluŋa dííg já̱gɨ́la iláiŋ ná yé kééŋá nás kwa–sí kí torí arrítíeŋi marraŋ bás ká̱ɨ́ŋá ná tóíŋ áláŋ risíŋó. ²³ ǎlbás dééŋ táárí'ŋ tin agíŋí namás ja̱ɨŋo ná tóŋ píŋí. ²⁴ Asá bá in tin beto, dééŋ yáa'ŋ kwě Elízabes namás oome eŋa namá kí kôlda oos díítinꞌíŋ ooŋo. Yé yáa namá in kwǎ, ²⁵ "in ka–sí áísa Loŋpii piá kila ayéŋá'ŋ dɨó ǎl toy eŋa yé áísa kaa tʉllɨŋ pulŋínamá dúíŋ ôra–sí kwa'ŋ tâs–lé túga jáwí." ²⁶ îsa'ŋ da̱a̱rɨŋꞌíŋ kwa waar si súrren káwe: Elízabesꞌíŋ kʉʉlɨŋꞌíŋ kôlda oson–dígꞌíŋ dɨó Wʉ́o namás meleg Jɨbrɨ̂l–sí Ga̱lɨ́ɨlꞌíŋ deem Nazaras–lé ádden piá, ²⁷ Kwě nɨw selbé–le asá ila dʉó tɨ́o ásáŋ jee alá ɨ́sɨb ka̱rɨ́ya, asá Da̱ʉ̂dꞌíŋ atine aáŋá na ila Selbé'ŋ kona Moos ka̱ɨ́ŋ. ²⁸ Meleg namá dêlé nyáŋá nás in kwǎ,"Jaiŋ–lá Jɨ́ ǎl dɨ́ɨ́ŋ tʉllɨŋ saasoŋá eŋa Loŋ pii kíe baŋ. Moo–sí kí kééŋ beléŋá ila namás bát ta̱bʉ urruŋo ²⁹ Namás jáá ná ʉrgʉl áláŋ dééŋ arrá rááŋ in kaa dóŋá'ŋ janí–ii. ³⁰ Marraŋ meleg namás in kwǎ, "Moo ka̱lɨ péllét ái–ii tɨɨ̌ba, iláiŋ nás Wʉ́o–sí dɨ́ɨ́ŋ rɨɨŋ tullé eŋa. ³¹ Jɨ́ ásáŋ dɨo dʉŋo jeeŋ námás kwě dee ja̱a̱rɨ námás kona ' îsa' janí. ³² Na yé áláŋ dʉó appâ–ii na áláŋ Wʉ́o appâ kʉŋo'ŋ kwě dee ka̱rɨ́ya. Na Wʉ́o Loŋpii áláŋ yee Wʉ́o Da̱ʉ̂dꞌíŋ kʉtɨ íní. ³³ Na yé ásáŋ Ya̱gʉ̂bꞌíŋ toŋ bóyé ná dééŋ–i móllóg na dééŋ kʉʉrɨŋ pélét á síŋ a gíŋíba." ³⁴ Moo namá meleg–sí ɨŋo, "Na in niiniŋ ay–ii níŋ eeŋ alá ká selbé aŋ? ³⁵ Meleeg namá in jáwí, "Kʉo tiyyâŋa áláŋ dɨ̂ɨ–lé bʉʉŋol, na Wʉ́o appâ kwaŋꞌíŋ kʉrro áísáŋ nima pɨ́ya̱. Na kwě tiyyâ alá janni áláŋ ja̱a̱rɨ áláŋ Wʉ́o'ŋ kwě dee ka̱rɨ́ya. ³⁶ Namaŋ Elízabes dɨ́ɨ́ŋ aal ǎl in nâŋ toyy–ii dog ásáŋ kwě kee. Alá yé in kwǎ, âl baaru–ii mááŋ ása kôlda oson dííg kee nás dɨo dʉŋo–ii. ³⁷ iláiŋ ná a̱rɨ á keba ása Wʉ́o–sí tárrá–ii. ³⁸ Moo namá in jáwí, "Ká Loŋpiíŋ koy–ii aŋ. kalâŋ gîs a̱rɨ ila eeŋ alá jɨ́ juwa." liyáŋ meleg namá júní ná nyáŋa. ³⁹ Moo Elízabesꞌíŋ nyáŋa ila tin–lé Moo namá ásíleŋ eŋa ná kájíleŋ piá ná Jʉ̂dɨya'ŋ pʉ́gó'ŋ ba̱rʉ'ŋ deém nyáŋa. ⁴⁰ namá Za̱ka̱ríya'ŋ tóŋ ká̱rɨ́ ná Elízabes–sí dóŋá íní Elízabes. ⁴¹ ǎlbá Moo'ŋ dóŋá'ŋ janí ila kilamí kwě dééŋ dɨó namás ʉ́ʉ́rʉ́óla, Elízabes namás kí kʉo tiyyâŋa pis eŋa. ⁴² Namá jɨlɨ́l piyá ná in kwǎ, "âlbá jɨ́ jaŋ yáaŋa'ŋ dɨó náis bora pattá káwe, na bora pattá jâ ila kwě'ŋ–ii asá dɨ́ɨ́ŋ dɨó kee. ⁴³ Marraŋ kaáŋ ʉʉ́ŋ ŋɨ náis kaa in ʉʉ tullé eŋ, áláŋ dúíŋ Loŋpiíŋ íya dûy–lé ʉ́ndʉl áíláŋ kaa já̱gɨl? ⁴⁴ Péttin ǎlmíŋ dɨ́ɨ́ŋ dóŋá'ŋ janí dúíŋ dɨ́lo paago, kwě dúíŋ dɨó bá kí kilmá'ŋ sɨmmɨŋ ʉ́ʉ́rʉ́ ŋóla. ⁴⁵ Bora pattâ–ii alá ila belé see jeyá alá Loŋ pii kwǎ, na yee ila belé básíŋ see eeŋ." ⁴⁶ Moo'ŋ kona asá yé kíeŋ Wʉ́o–sí mʉjjé pi–ii: Moo namá in kwǎ, "Dúíŋ kuy–ii Loŋ pii–sí ba̱gɨ pi–ii, ⁴⁷ Na kúíŋ kʉo–sí ná kilmaŋa sɨmmó ge Wʉ́o dúíŋ jopó dʉŋo'ŋ ʉʉ̌ŋ. ⁴⁸ ɨdɨ̂ɨ́ŋ nás yee–sí koy–ii da̱lʉ̂llꞌíŋ lóóŋéli kwa miǐn attô namaŋ porreŋa nyét báŋ gíŋ bora pattá ka̱rɨ́ya. ⁴⁹ iláiŋ nái Wʉ́o appâ gîs kaa a̱rɨ appâ piyá tiyyá bás kééŋ kona gé. ⁵⁰ Na dééŋ urma kila kwa–lé péégél ǎl yee ka̱lɨ kaawe, porreŋa bi porreŋa ǎlbá kʉ́ndʉla. ⁵¹ Yé kí kééŋ kʉrro ʉ́dóŋá appâŋa piyá kí dééŋ durú, yé kila kwa–sí nyét perra piyá asá kí kɨ́eŋ kʉrro doŋgóré kɨ́ndélíŋá. ⁵² kʉrɨŋa sís dû wá̱ɨ́ŋŋa kɨ́eŋ kʉttɨŋa–lé, marraŋ namá da̱lʉ́la–sí írí já̱gɨ. ⁵³ Yé kwa durŋa sís kí ʉ́dóŋá tulléŋa pispiá, namá marraŋ kawâjja–sí pʉttôŋa–sí ádden piá. ⁵⁴ Yé dééŋ koy–ii Israîl–sí saas nyiǐŋí ásáŋ á yɨ́alba ásáŋ urma kee ⁵⁵ Namaŋ Biráim–sí kí kééŋ atineŋaŋ namaŋ níŋ kee (in náiŋ asábá yé kééŋ Wʉ́oŋa ta̱bʉŋa kwǎ–sí kwǎ." ⁵⁶ Moo kí Elízabes dákkin kôlda ɨɨs–si kʉʉ́ŋɨ namá tóŋ píŋí. ⁵⁷ Yáaye jálo dʉŋo'ŋ da̱a̱rɨŋ: Asábá ila tin dakki piá áláŋ Elízabés kiri, bá kiri namá kwě dee ééla. ⁵⁸ Jɨɨrána na aala namá in kel kámmíe ása yee–sí Loŋpii urma appâ paalí, namá kíeŋ kilmaŋa sɨmmó arrá tág ɨɨŋɨ. ⁵⁹ Soog oson na ɨɨsꞌíŋ–dɨó namá kɨ́sɨ́ŋʉl asáŋ ila kwě–sí kande naŋ kôli ásáŋ kona kí dééŋ bâ Za̱ka̱rɨ́ya'ŋ kaníya. ⁶⁰ Marraŋ dééŋ íya bá jáwla ná in kwǎ, "Lôlo Kééŋ kona ásáŋ Yáaye gé." ⁶¹ Yeeŋ namás in aáŋé kɨ́ɨ́ŋ ala'ŋ dɨó dʉó ála á keba nás kila kona kee." ⁶² Liya namás dééŋ âba–sí kí jiǐma kiimé, ásáŋ in kʉ̌mal kwě–sí kona ay–ii síŋ kaníyal, ⁶³ Yé namás in kwǎ ásáŋ loo kéélal, namás in rímmeŋ piyá kééŋ kona ása Yáaye gé. Kwa–sí namás pirje eŋa. ⁶⁴ In nálaŋ ʉto namás jáá ná pa̱a̱lɨ́ŋtɨ na dééŋ dáálí nás perra jállíŋ namás tuuŋa ná risíŋ nás Wʉ́o–sí bora pattá pi–ii. ⁶⁵ kééŋ jɨɨrá̱na–sí namá ma̱y eŋa. Pʉ́gó'ŋ ba̱rʉ ǎl Yôda kééŋá. ⁶⁶ Namá kila ʉ́dó nyéttinꞌíŋ risíŋá, kwa nyét ǎl in belé kil kámmíe namás kí kilmaŋa kábé, namás kayé ná in ká miŋa? "bát yíe in kwě dúíti áláŋ kii eeŋ, bá iláiŋ kééŋá ná Loŋpiíŋ dóŋá kí kíe ka̱ɨ́ŋ. ⁶⁷ Za̱ka̱rɨ́ya'ŋ kona: Dééŋ bâ Za̱ka̱rɨ́ya namás kí kuo tiyyáŋa pis eŋa, namás Wʉ́o'ŋ belé risiŋo namá in roo, ⁶⁸ "ǎ̱w ná bora pattâ Loŋ piíŋ–ii Isríílꞌíŋ Wʉ́o iláiŋ ná éla ásáŋ kééŋ kwa–sí nyiŋí nás jópó. ⁶⁹ Yé kɨŋa–sí gis jopó dʉŋo ka̱kkɨ́re ééla dééŋ koy–ii Da̱ûdꞌíŋ tóŋ. ⁷⁰ (In nálaŋ alá Yé kí dééŋ domoŋ kwǎ tiyyâŋa'ŋ dorá tóóríg kwǎ), ⁷¹ áísáŋ káíŋ gârima–lé na kwa nyét áila kɨŋa̱ kanane–lé lópó. ⁷² Nás káíŋ Wʉ́oŋa–sí urma paalí náŋ dééŋ sǎrta tiyyâ lóŋíti, ⁷³ Sǎrta'ŋ a̱lɨ́pe ila asá dáíŋ Wʉ́o Birâim–sí já̱bɨ́. ⁷⁴ áísáŋ kɨŋo káíŋ kârima'ŋ koŋa–lé jópó,áíláŋ kʉrro íní nás yee táárí kâ na asáŋ ka̱lɨ kiǐlma á kaŋba, ⁷⁵ Kí tɨyyɨŋ na kí wa̱rɨgɨŋ na dééŋ ta̱bʉ'ŋ eré kí káíŋ sooga nyéttin. ⁷⁶ Na jɨ́ dúíŋ kwě, jɨɨ áíláŋ Wʉ́o appâ kʉŋo'ŋ domoŋdʉŋo ka̱rɨ́ya ɨdɨ̂ŋ ná jɨ́ áláŋ Loŋpiíŋ ta̱bʉ'ŋ eré joo nás yee dorá joo ásáŋ kééŋ kwa–sí jopóŋó'ŋ, ⁷⁷ domoŋ jaagó kí ila dorá ásŋ kɨ́eŋ ka̱ttɨ́eŋa jááso . ⁷⁸ Dáíŋ Wʉ́o'ŋ urma'ŋ ʉʉ́ŋ, bá yé–ii náis dʉlé jaawíl kórél, ⁷⁹ ásáŋ kwa kila–sí erreŋ ǎl lóó dɨkkô–lé ka̱ɨŋ na ǎl wayyiŋ nimá ka̱ɨŋ. áísáŋ ta̱bʉ'ŋ poyí ná–ii dóŋá'ŋ dóra já̱bɨ́." ⁸⁰ Kwě namás tʉ́yɨ́ namá kí kʉo ka̱kkɨ́rɨ́ eŋa namá jutá ooŋo namaŋ–si Israílíŋá–sí nyét lóóŋóla.