¹ Utmegina, atye ka lok ki jo ma ŋeyo cik; pe wuŋeyo ni cik mako dano ka pud kwo keken? ² Dako ma ginyomo bene cik tweyo i kom cware ka cware pud kwo, ento ka cware doŋ oto, en gonnye woko i cik pa cware. ³ Mumiyo ka cware pud kwo, ce dako-nu oa okobe woko bot laco mukene, gibilwoŋe ni latim abor. Ento ka cware doŋ oto, en noŋo ogonnye woko i cik meno; ka dok onyomme ki laco mukene noŋo pe otimo abor. ⁴ Kumeno, utmegina, wun bene yam wuto tuŋ bot cik pi Kricito ma wuribbe i kome-ni, wek wudok bot ŋat mukene, en aye ŋat ma yam gicere woko ki i kin jo muto, wek wanyak nyig pi Lubaŋa. ⁵ Pien i kare ma yam pud watye i kwo me anywalli, gin maraco me bal ma cik doŋ otugo woko onoŋo tye ka tic i dul komwa mapatpat me nyako nyige pi to. ⁶ Ento kombeddi doŋ gigonyowa woko i kom cik, doŋ wato ki tuŋ bot gin ma con omakowa. Omiyo wan doŋ watye ka tic i yo manyen me Cwiny, pe dok i yo macon ca me lubo cik ma yam gicoyo acoya. ⁷ Wabiwaco lok aŋo mono? Cik mono bal? Pe kumeno gire! Ento kono yam cik pe obedo tye, onoŋo kono gira pe aŋeyo bal. Ka kono yam cik pe owaco ni, “Cwinyi pe opukke i kom jami pa ŋat mukene,” kono onoŋo bene pe abedo ki miti macalo meno. ⁸ Ento bal onoŋo kare odonyo i cik ca, ka doŋ ocako kelo kwa miti ducu me pukke cwiny i cwinya. Pien ka cik pe, ci bal to woko. ⁹ Yam onoŋo abedo kwo laboŋo cik mogo, ento i kare ma cik ca obino, bal ocako bedo kwo, an ato woko. ¹⁰ Cik ca-ni kikome onoŋo myero okel kwo, ento dok okelo to bota. ¹¹ Pien bal onoŋo kare odonyo i cik, obwola, ka doŋ oneka woko. ¹² Pi meno, cik leŋ, ki gin ma giciko bene leŋ, tye atir, dok ber bene. ¹³ Gin ma yam ber ca aye dok okelo to i koma? Pe kumeno! Bal aye onoŋo mumiyo ato, kun tiyo ki gin maber, wek omi onen woko ka maleŋ ni meno bal ennu. Kit meno gin ma giciko ca omiyo bal odoko marac mukato kare. ¹⁴ Waŋeyo ni cik obedo gin me cwiny; kun an dano me kom ma gicato woko macalo opii i te bal. ¹⁵ Gin ma atiyo-gu ducu pe aniaŋ iye. Pien gin ma amito pe atiyo, ento dok atiyo gin mogo ma pe amito-ni. ¹⁶ Doŋ ka atiyo gin ma pe amito, noŋo aye ni cik ber. ¹⁷ Meno doŋ pe an aye ma atiyo, ento bal ma bedo i iya aye ma tiyo gire. ¹⁸ Pien aŋeyo ni gin mo maber pe ma bedo i iya, ma en aye i koma ma ginywala kwede. Atwero mito gin ma atir, ento pe atwero tiyone. ¹⁹ Pien pe atiyo gin maber ma amito-ni, ento gin marac ma pe amito-ni aye dok atiyo. ²⁰ Ci ka atiyo gin ma pe amito-ni, meno doŋ noŋo pe an aye ma atiyo, ento noŋo bal ma bedo i iya aye tiyo. ²¹ Mumiyo doŋ onen bota macalo cik ni, ka amito tiyo gin ma atir, ci gin marac nyiko cok kweda. ²² Pien amaro kwano cik pa Lubaŋa, kun alwodo lokke ki iya. ²³ Ento dok aneno cik mukene i dul koma ducu, kun tye ka lweny ki cik ma i tamma, tera i opii i te cik me bal ma bedo i dul koma ducu. ²⁴ An ma koma kec kuman-ni, aŋa ma bilara ki i kom man ma to woko-ni? ²⁵ Apwoyo Lubaŋa pi Yecu Kricito Rwotwa! Doŋ an kikoma aworo cik pa Lubaŋa ki tamma, kun i koma ma ginywala kwede aworo cik me bal.