¹ Apenyo ni, “Lubaŋa mono doŋ okwero jone woko?” Pe kumeno gire. An kikoma bene an Laicrael, lakwar Abraim, ma i kaka pa Benjamin. ² Lubaŋa pe okwero jone ma yam en oŋeyogi con. Pe wuŋeyo gin ma yam gicoyo i ginacoya ma oloko lok i kom Elia, kit ma en obako kwede doge bot Lubaŋa i kom jo Icrael ni, ³ “Rwot, doŋ guneko lunebini woko, gumuko keno tyerri-gu woko ducu, an kena aye doŋ adoŋ, dok bene gimito neka woko.” ⁴ Ento Lubaŋa yam odokke iye gin aŋo? Odok iye ni, “Pud aweko jo alip abiro gudoŋ bota, ma peya gurumo coŋgi i nyim Baal.” ⁵ I kit yo acel-lu tye jo mogo i kare man ma gudoŋ, ma Lubaŋa oyerogi pi kicane. ⁶ Ci ka giyerogi pi kica, man noŋo doŋ pe ocuŋ i kom tic ma gin gutiyo; ka nene ocuŋ i kom tic ma dano otiyo, kono kica doŋ pe gilwoŋo ni kica. ⁷ Gin aŋo doki? Jo Icrael pe gunoŋo gin ma gubedo ka yenyone. Jo ma giyerogi keken aye gunoŋo, ento jo mukene onoŋo cwinygi odoko nwaŋ, ⁸ kit macalo yam gicoyo ni, “Lubaŋa doŋ omiyo botgi cwiny me diŋo, omiyo waŋgi pe neno, itgi bene pe winyo lok, kadi wa onyoo.” ⁹ Daudi bene owaco ni, “Wek karamagi ma gicamo-ni otyekgi woko macalo owic ma makogi; wek obed gin ma miyo gipoto ibur pi culo waŋ balgi. ¹⁰ Mi waŋgi ocor woko, wek pe gunen piny; mi pyergi ogom woko matwal.” ¹¹ Dok apenyo ni, “Jo Icrael yam guyokke gumito poto woko piny?” Pe kumeno! Pi balgi omiyo larre bene doŋ obino bot Lurok, wek omi nyeko omak jo Icrael. ¹² Ka balgi doŋ okelo lonyo bot lobo, dok bene ka potogi okelo lonyo bot Lurok, berre doŋ bibedo rom mene ka gin ducu gudwogo woko liweŋ? ¹³ Kombeddi atye ka lok kwedwu, wun Lurok. Doŋ kit macalo an lakwena kwede bot Lurok-ki, adworo ticca, ¹⁴ wek gwok nyo ami nyeko omak jo me rokka, ka wek alar jo mogo ki i kingi. ¹⁵ Pi bologi woko omiyo Lubaŋa odwoko lobo ducu bote; ka doŋ ogamogi, ci bikelo aŋo? Pe bibedo calo kwo ma oa ki i kin jo muto? ¹⁶ Ka ginywaŋo moko manok ma gityero calo gin me wi mwaka, moko ducu noŋo doŋ leŋ; ka ce lwit yat leŋ, ci jaŋe ducu bene gibedo leŋ kit meno. ¹⁷ Ento ka ce jaŋe mogo gituro woko ki i kom yat jeituni maberrre, ka doŋ gijako jaŋ yat jeituni mo me tim, ci gicomo ka-kagi wek omok i tyen yat maber ca, ka doŋ cako nywako ywayo pige ma miyu ma a ki i lwite. Jaŋ yat ma gijako ki i tim ca en aye in; ¹⁸ ento pe myero iwakke i kom jaŋe mukene ca. Kadi bed iwakke, pe in aye ma itiŋo lwite, ento lwite aye ma otiŋi. ¹⁹ Ibiwaco ni, “Yam gituro jaŋe mogo ni wek gicoma i kom yat.” ²⁰ Adada, yam giturogi woko pien gin pe guye Lubaŋa, in pud icuŋ pien niyeni tye. Pe myero ibed ki tam me wakke, ento bed ki lworo. ²¹ Ka Lubaŋa yam pe oweko jaŋ yat kikome, ci doŋ pe biweki. ²² Koŋ inen kica pa Lubaŋa ki gerone. En ger i kom jo ma gupoto, ento nyuto kicane boti, ka imedde kun icuŋ i kicane. Ka pe, gibitoŋi woko bene. ²³ Dok gin Lujudaya bene ka guweko bedo laboŋo niye, ci gibidwokogi i kom yat; pien Lubaŋa tye ki twero me dwokogi iye. ²⁴ Pien in Larok irom ki jaŋ yat jeituni me tim ma gitoŋo woko, gicomo i kom jeituni maberre, ma yam onoŋo pe olot i kom yat jeituni ma gipito apita. Pe bedo yot twatwal bot Lubaŋa me dwoko jaŋ yat mukene ca i kom yat kikome ma yam giturogi ki iye-ni? ²⁵ Utmegina, tye muŋ mo ma amito wuŋe, wek omi pe wutam kekenwu ni wuryek; man en aye ni, jo Icrael cwinygi odoko nwaŋ pi kare mo manok, nio ka wel Lurok biromo. ²⁶ Lacen doŋ Lubaŋa bilaro jo Icrael ducu, kit macalo yam gicoyo ni, “Lalar bibino kun a ki i Cion, en bikwanyo kit me lworo Lubaŋa woko ki bot Yakobo”; ²⁷ “man aye gicikke ma abiketo kwedgi i kare ma abikwanyo balgi woko.” ²⁸ Doŋ pi lok ma dok i kom lok me kwena maber, gin gudoko lukwor pa Lubaŋa piwu, ento pi lok ma kemo yer, Lubaŋa marogi pi kwarogi. ²⁹ Mot me kica pa Lubaŋa, ki lwoŋone, pe twero lokke. ³⁰ Yam pe wuwinyo dog Lubaŋa, ento kombeddi doŋ en otimo kica botwu, ma onoŋo doŋ gin gukwero bedo ki winy woko i kome. ³¹ I kit acel-lu kombeddi doŋ gukwero winyo doge i kare ma en otimo botwu kica, wek omi gin bene gitim kica botgi kit meno. ³² Pien Lubaŋa oketo dano ducu i mabuc me kwero winyo doge, wek etim kica bot jo ducu. ³³ Lonyo pa Lubaŋa dwoŋ ma okato kare! Ryekone kacel ki ŋecce tut twatwal! Lok ma en ŋolo tere pe tatte, niaŋ i kite tek! ³⁴ “Aŋa ma ŋeyo tam pa Rwot? Aŋa ma yam miye tam?” ³⁵ “Aŋa mono ma yam koŋ omiye gin mo me mot, ka en bene odwoko cen bote?” ³⁶ Pien en aye yam oketo jami ducu, jami ducu yam obedo tye pire, dok bene obedo mere. Deyo obed bote nakanaka. Amen.