¹ Yecu oa woko ki kunnu, odok i lobo tugi, lupwonnyene gulube. ² Ocako pwonyogi i kacokke i ceŋ cabit. Jo mapol ma guwinye, guuro, kun giwaco ni, “Laco man onoŋo ryeko man ducu ki kwene? Kit ryeko aŋo ma gimiye-nu? Dok kit tic aŋo matek madito ma rom man ma en tiyogi-ni? ³ Man pe lapac, wod pa Maliam, omin Yakobo, ki Yoce, ki Juda ki Cimon? Dok nyimegine pe gitye botwa kany?” Ci cwinygi ocako a woko i kome. ⁴ Yecu owaco ni, “Lanebi giketo deyo i kome, ento pe giketo deyo i kome ki i lobo tugi ki i kin jo tugi, ki i ode.” ⁵ Pe otwero tiyo tic matego kunnu, ento oketo ciŋe i kom lutwo mogo, ocaŋogi. ⁶ Yecu ouro pien pe gitye ki niye. En obedo ka wirre i kin gaŋi kun pwonyo dano. ⁷ Yecu olwoŋo bote jone apar wiye aryo, ci oorogi ki aryo aryo, omiyogi twero i kom cen maraco. ⁸ Ocikogi matek ni pe guwot ki gin mo, kono odoo keken, laboŋo cam mo, kadi kicaa, kadi lim mo i del pyergi; ⁹ ento guwot kun giruko war tyengi, pe guwot ma gubamo kanyi aryo i komgi. ¹⁰ Ocikogi ni, “Ka wudonyo i ot mo, wubed kenyo nio ka wubia ki i kabedo meno. ¹¹ Kabedo ducu ma pe bijolowu, ma pe biwinyowu, ka ce wubia woko ki kunnu, ci wuteŋ apwa woko ki i tyenwu wek obed caden botgi.” ¹² Kit meno gucako cito, gutito lok ni myero dano oŋuti. ¹³ Guryemo lwak cen mapol, dok guwiro lutwo mapol ki moo kun gicaŋogi. ¹⁴ Kabaka Kerode owinyo pire, pien onoŋo nyiŋ Yecu doŋ oywek twatwal. Jo mogo guwaco ni, “Jon Labatija aye ocer woko ki i kin jo muto; en aye mumiyo lakit teko macalo meno tye ka tic i kome.” ¹⁵ Ento jo mukene guwaco ni, “En Elia”, jo mukene ni, “En lanebi, cal ki ŋat mo i kin lunebi macon.” ¹⁶ Ka Kerode owinyo pire ci owacci, “Jon ma yam atoŋo wiye en aye ocer woko.” ¹⁷ Pien Kerode yam ooro dano, gumako Jon, gutweyo i mabuc, pi Kerodia ci-ominne, dako pa Pilipo, ma yam okwanyo me bedo dakone. ¹⁸ Pien Jon owaco bot Kerode ni, “Cik pe oye ni ibed ki ci-omeru.” ¹⁹ Kerodia obedo ki keccwiny i kome, omito neke woko, ento pe otwero, ²⁰ pien Kerode onoŋo lworo Jon, kun ŋeyo ni en dano ma kite atir, ki maleŋ, ci obedo ka gwoke maber. Ka owinyo lok ma en otito, lokke otwoyo doge woko, ento pire obedo mit bote ka winyo lokke. ²¹ Ento kare maber oromo i nino ma Kerode oyubo iye karama me po pi nywale, ci olwoŋo iye luditone ki lutel-wi-lweny ki ludoŋo me Galilaya. ²² Nya pa Kerodia odonyo i ot omyelo, ci oyomo cwiny Kerode ki welone. Kabaka owaco bot nyako ni, “Legga gin ducu ma imito, abimiyi.” ²³ Okwoŋo akwoŋa kun wacce ni, “Gin ducu ma ibilegga abimiyi, kadi bed nucu kerra.” ²⁴ Nyako okato woko, openyo minne ni, “Abilego gin aŋo?” Odok iye ni, “Leg wi Jon Labatija.” ²⁵ Oyotoyot odwogo i ot bot kabaka ki mit kome, olege ni, “Amito imiya wi Jon Labatija i weer kombeddi.” ²⁶ Kabaka okumo matek, ento pi kwoŋŋe ki pi welone omiyo pe omito twonne. ²⁷ Oyotoyot kabaka ooro askari ma lakur, ocike ni okel wi Jon. Ocito oŋolo ŋute ki i ot mabuc, ²⁸ okelo wiye i weer, omiyo bot nyako; nyako omiyo bot minne. ²⁹ Ka lupwonnye pa Jon guwinyo pire, gucito gutiŋo kome, guyiko i lyel. ³⁰ Lukwena gudwogo bot Yecu gutitte lok ducu ma gutiyo ki ma gupwonyo. ³¹ En owaco botgi ni, “Wubin kenwu ka ma dano pe iye, wuywe manok.” Pien jo mapol onoŋo gibedo ka bino, gidok cen, kun gigwennye agwenya, omiyo pe gubedo ki kare mo me cam. ³² Gucito kengi ki yeya i kabedo ma dano pe iye. ³³ Jo mapol gunenogi ka gicito, guŋeyogi, ci guriŋo kunnu ki tyengi kun gia ki i gaŋi ducu; gin aye gukwoŋo o kunnu wiati. ³⁴ Ka Yecu okato i wi tera, oneno lwak madwoŋ; kica ocako make i komgi, pien gitye macalo romi ma gipe ki lakwat; ci opwonyogi ki lok mapol. ³⁵ Ka oo otyeno, lupwonnyene gubino bote guwacce ni, “Kabedo man tye i dye tim, cawa bene doŋ okato. ³⁶ Cwal lwak gucit i kin paco ki i gaŋi ma cokcok, guwil ginacama pigi kengi.” ³⁷ Ento en odok iye ni, “Wun aye wumigi ginacama.” Gin gugamo ni, “Wacit wawil kwon me ciliŋ miya aryo, wami botgi wek gucam?” ³⁸ Ento en openyogi ni, “Wutye ki mugati adi? Koŋ wucit wunen.” Ka guŋeyo guwacce ni, “Abic, ki rec aryo.” ³⁹ Yecu ociko jo ducu ni gubed piny i dul ki dul, i kom lum alita. ⁴⁰ Kit meno lwak gubedo piny i dul ki dul, miya miya, ki pyerabic pyerabic. ⁴¹ Okwanyo mugati abic ki rec aryo, oneno malo i polo olego gum, obaro i mugati, omiyo ki lupwonnyene wek guket i nyim lwak; dok opoko rec aryo i kingi ducu. ⁴² Gin ducu gucamo, guyeŋ ⁴³ Gicoko ŋide mugati ma obaro-nu mudoŋ, ki rec bene, opoŋo aduku apar wiye aryo. ⁴⁴ Jo ma gucamo mugati giromo co alip abic. ⁴⁵ Oyotoyot Yecu ociko lupwonnyene ni gudony i yeya, gukwoŋ nyime me cito loka ca, wa i Betecaida, kun en pud ciko lwak. ⁴⁶ Ka doŋ ocikogi, ci ocito i wi got ka lega. ⁴⁷ Ka piny oyuto, yeya onoŋo doŋ tye wa i dye nam, en kene aye onoŋo tye i wi tura. ⁴⁸ En onenogi kun gicanne ki cero yeya, pien onoŋo yamo kodo bino ki i nyimgi. I kine me koko gweno, en ocako bino botgi kun woto i wi nam ki tyene. Omito katogi akata, ⁴⁹ ento ka gunene kun woto i wi nam ki tyene, gutamo ni gwok nyo tipo, ci gudaŋŋe matek; ⁵⁰ pien gin ducu gunene, ci tipo komgi oto woko. Ento oyotoyot oloko kwedgi kun waco ni, “Wudi cwinywu. An enni; gwok wulwor.” ⁵¹ Odonyo botgi i yeya, ci yamo oliŋ mot. Gin guuro matek twatwal ki i cwinygi, ⁵² pien nakanen pe guniaŋ lok ma i kom mugati, ento cwinygi pud obedo nwaŋ. ⁵³ Ka doŋ gukato loka ca, ci gukato wi tura i lobo Genecaret, gutweyo yeya kunnu. ⁵⁴ Ka gutyeko a woko ki i yeya, ci lwak guŋeyo Yecu oyotoyot. ⁵⁵ Gucako riŋo gurumo kabedo ducu ma tye kunnu, kun gikelo lutwo ma gutiŋogi ki kitara, giterogi i kabedo ducu ma guwinyo ni en tye kunnu. ⁵⁶ I kabedo ducu ma yam en obino iye, i kin paco-gu, ki i gaŋi-gu, ki i kin caro, gipyelo lutwo wa i cuk-gu, kun gibako doggi bote ni oye wek gugud kadi dog ginarukane keken; ci lutwo ducu ma gugudo gucaŋ.