¹ Ka piny doŋ oru, oyotoyot ajwagi madito ki ludoŋo ki lupwony-cik ki jo ma i Lukiko ducu, gupiro lok kacel. Ci gutweyo Yecu woko gutere kwede gumiye bot Pilato. ² Pilato ocako penye ni, “In i kabaka pa Lujadaya bo?” Yecu ogamo ni, “Iwaco kakare gire.” ³ Ajwagi madito gucako dote ki lwak adot mapol. ⁴ Pilato dok openye ni, “Pe koŋ idok iye ce? Pe ineno kit lwak lok mapol ma gidoti kwede-ni?” ⁵ Yecu dok pe omedo ki dok iye lok mo, omiyo Pilato ouro matek. ⁶ Ka i kare me nino madito onoŋo Pilato gonyo lamabuc mo woko ma dano gulege pire. ⁷ I kare-nu onoŋo tye laco mo ma nyiŋe Baraba, ma yam gitweyo i mabuc i kin jo mujemo ma guneko dano i kare me jemogi-nu. ⁸ Lwak gucako cito bot Pilato, gupenye wek otim kit ma yam tiyo-ni. ⁹ Pilato openyogi ni, “Wumito mono ni agonnyiwu kabaka pa Lujudaya?” ¹⁰ Onoŋo Pilato oŋeyo ni ajwagi madito gumiyo Yecu bote pi nyeko. ¹¹ Ajwagi madito gupiyo lwak ni twara gigonnyigi Baraba. ¹² Pilato dok openyo lwak ni, “Dano ma wulwoŋo ni kabaka pa Lujudaya-ni doŋ abitimo niŋniŋ?” ¹³ Lwak gucako wo ni, “Gure woko i kom yatariya.” ¹⁴ Pilato dok openyogi ni, “Piŋo kaa, otimo kit gin aŋo marac?” Ento lwak gumedde ki wo ni, “Gure woko i kom yatariya.” ¹⁵ Pi mito kweyo cwiny lwak, omiyo Pilato oye gonnyigi Baraba, ocako pwodo Yecu ki del, ka omiye wek gigure woko i kom yatariya. ¹⁶ Askari gutero Yecu wa i ot pa kabaka, ma gilwoŋo Praitorion, ci gulwoŋo buca monygi ducu gucokke kacel. ¹⁷ Ka gucako ruko Yecu ki boŋo makwar, ka gucweyo lulakana okuto, gurwako i wiye, ¹⁸ kun gimote ni, “Itye ba, kabaka pa Lujudaya!” ¹⁹ Gucako goyo wiye ki gayi, ka guŋulo laa i kome-gu, kun girumo coŋgi me miye woro. ²⁰ Ka doŋ gutyeko ŋale, ci gulunyo boŋo makwar woko ki i kome, ka dok guruke ki boŋone kikome, ci gutere kwede woko ka gure i kom yatariya. ²¹ Gucako mako dano mo ma onoŋo obekato mua ki i kin gaŋ ci gudiye ka tiŋo yatariya pa Yecu, nyiŋe Cimon dano me Cirene, ma won Alegijanda ki Rupo. ²² Gutero Yecu i kabedo ma gilwoŋo ni Golgota, ma te lokke ni kabedo me cogo wic. ²³ Gucako miye koŋo vino ma girubo iye yat murra; ento en okwero matone woko. ²⁴ Ka doŋ gugure i kom yatariya, ci gupoko boŋŋine woko i kingi, kun gibolo kwir wek ginen boŋŋi ma ŋat acel acel bitero. ²⁵ Giguro Yecu i kom yatariya i cawa adek me odiko. ²⁶ Gicoyo i waraga gin ma nyuto lok ma gidote iye ni, “Kabaka pa Lujudaya.” ²⁷ Gigure kacel ki luyak mogo aryo, dano acel tuŋ lacuc ki acel tuŋ lacam. ²⁸ Omiyo ginacoya ocobbe kakare ni, “Gikwane i kin lubalo.” ²⁹ Jo ma yam gimol gikato ki ka ŋete gubedo ka yete, kun giyeŋo wigi, ma giwacci, “Nye, in ma imuko ot pa Lubaŋa woko, ci igero pi nino adek-ki, ³⁰ doŋ ilarre keni, a woko ki i kom yatariya!” ³¹ Ki ajwagi madito bene guŋale, ma giloko ki luwotgi kacel ki lupwony-cik-gu, kun giwacci, “Yam bedo ka laro jo mukene, pe twero larre kene. ³² Wek tin Kricito, ma kabaka me Icrael, olor piny ki i kom yatariya, wek wanen ka wacak ye.” Wa jo ma gigurogi kacel kwede bene gucaye. ³³ Ka cawa oromo abicel, piny ocido woko macol i lobo ducu, nio kwede wa i cawa aboŋwen. ³⁴ I kom cawa aboŋwen Yecu odaŋŋe ki dwan maloŋo ni, “Eloi, Eloi, lama cabaktani?” ma te lokke ni, “Lubaŋana, Lubaŋana, itenya woko piŋo?” ³⁵ Ka jo ma onoŋo gucuŋ kunnu guwinyo lokke, ci guwacci, “Winyu ka en lwoŋo Elia ca.” ³⁶ Ci dano acel oriŋo, okwanyo amor, oluto i koŋo vino mawacce, orwako i wi tal gayi, omiyo ki Yecu ni omati, kun wacci, “Weku mono koŋ wanen ka Elia bino ka kwanye woko ki i kom yatariya.” ³⁷ Yecu dok odaŋŋe ki dwan maloŋo, ka oto. ³⁸ Ci boŋo kicika ma i ot pa Lubaŋa ocako yec woko opokke dul aryo, oyec ki malo, nio kwede wa i tere piny. ³⁹ Ladit ma loyo askari, ma onoŋo ocuŋ cok i nyime, ka oneno kit ma Yecu oto kwede, owacci, “Adada, dano man onoŋo Wod pa Lubaŋa!” ⁴⁰ Dok onoŋo tye mon mogo ma gucuŋ ki cen ka nenone; onoŋo tye Maliam Lamagdala, ki Maliam min Yucepu matidine ki Yoce, ki Calume. ⁴¹ Gubedo ka lubo kor Yecu ki i Galilaya, gubedo ka konye bene, dok onoŋo tye lwak mon mapol ma gubino kwede wa i Jerucalem. ⁴² I kom nino me Yubbe, en nino ma i nyim cabit, ka piny doŋ oyuto, ⁴³ Yucepu me Arimataya obino; en yam dano madit ma lamemba me Lukiko ma gipwoyo bene, en kikome obedo ka kuro ker pa Lubaŋa. En odiyo cwinye, ci odonyo wa bot Pilato, olego kom Yecu. ⁴⁴ Pilato ouro ka doŋ otyeko to woko oyot kumeno; ci olwoŋo ladit ma loyo askari, openye ka ce doŋ oto woko. ⁴⁵ Ka ladit ma loyo askari otyeko niaŋo en, ci omiyo kom Yecu bot Yucepu. ⁴⁶ Yucepu owilo boŋo camanini, ci okwanyo kom Yecu woko ki i kom yatariya, oboyo ki boŋo camanini, otero kome opyelo i lyel ma en okwinyo oroko i got, ci ocego wiye woko ki got ma oloro ki dog lyel. ⁴⁷ Maliam Lamagdala ki min Yoce guneno ka ma giyiko iye kome.