¹ I kare ma Yecu doŋ otyeko loko lok magi ducu, owaco bot lupwonnyene ni, ² “Wuŋeyo ni odoŋ nino aryo ci doŋ bedo nino madit me Kato (Paska), ci Wod pa dano gibimiye woko me agura i kom yatariya.” ³ I kare meno ajwagi madito pa Lubaŋa ki ludoŋo pa lwak gucokke i gaŋ kal pa ajwaka madit pa Lubaŋa, ma nyiŋe Kayapa, ⁴ ci guporo lok kacel me mako Yecu ki ryeko ka doŋ gineke. ⁵ Ento guwacci, “Pe i nino madit, miyo lwak bitugge.” ⁶ I kare ma Yecu tye i Betania i ot pa Cimon ladobo, ⁷ ci dako mo obino bote kun tye ki adomo moo ma ŋwece kur, ma welle bene dit, ci oonyo i wiye ma onoŋo en obedo ka cam. ⁸ Ento ka lupwonnye guneno, cwinygi ocwer, guwacci, “Piŋo moo man gibalo abala kit man? ⁹ Pien moo man ka kono gicato acata, onoŋo kono okelo lim madit atika, ka wek gimi bot lucan.” ¹⁰ Ento Yecu oŋeyo lok man, ci owaco botgi ni, “Wuyelo dako-ni piŋo? En otiyo gin maber twatwal i koma. ¹¹ Pien wun wutye kacel ki lucan kare ducu, ento pe wubibedo kweda kare ducu. ¹² Moo man ma dako-ni oonyo i koma-ni en otimo man pi yubo koma me ayika. ¹³ Ada awaco botwu ni, i wi lobo ducu ka ma gibitito iye lok man me kwena maber-ri, gin ma dako-ni otiyo bene gibitito pire, wek obed me po en.” ¹⁴ I kare meno Juda Lakeriot, ma en dano acel ma i kin jo apar wiye aryo-ni, ocito bot ajwagi madito pa Lubaŋa, ¹⁵ ci openyogi ni, “Wubimiya gin aŋo ka amiye i ciŋwu?” Ci gucule ki lim ryal pyeradek ma onoŋo obedo lim me kare ca. ¹⁶ Cakke i cawa meno cutcut Juda ocako yenyo kare maber ma eromo miyo kwede Yecu i ciŋgi. ¹⁷ I nino mukwoŋo me nino madito me Mugati ma Tobi Pe Iye, lupwonnye gubino bot Yecu, ci gupenye ni, “Imito waciyubbi kabedo kwene wek icam iye cam me Kato?” ¹⁸ Yecu ogamo ni, “Wucit i Jerucalem bot dano mo-ni, ci wuwacce ni, ‘Lapwony owaco ni, Karena doŋ cok. Abicamo cam me Kato i odi kacel ki lupwonnyena.’ ” ¹⁹ Lupwonnye gucito gutiyo kit macalo Yecu ocikogi kwede, ci guyubo cam me Kato kunnu. ²⁰ Ka piny doŋ oyuto, ci Yecu obedo piny kacel ki lupwonnye apar wiye aryo. ²¹ I kare ma doŋ gitye ka cam, Yecu owaco botgi ni, “Ada, awaco botwu ni, ŋat acel i kinwu bidoba.” ²² Ci lupwonnye gucako kumo cut, kun gipenye ki acel acel ni, “An bo, Rwot?” ²³ Yecu odok iye ni, “Dano ma tye ka gweyo dek i atabo acel kwedani aye bidoba. ²⁴ Wod pa dano tye ka wot kit macalo yam gicoyo i kome-ni; ento dano ma odobo Wod pa dano-ni bineno can mada! Kono nene obedo ber ka dano-nu pe ginywalo.” ²⁵ Juda ma en ŋat ma odobe openye bene ni, “Lapwony, an mono?” Yecu odokke iye ni, “In iwaco giri kit meno.” ²⁶ Ka gitye ka camo cam, Yecu omako mugati, ci olego gum i kome, ka ocako baro iye, omiyo bot lupwonnye, kun wacci, “Wugam, wucam; man aye koma.” ²⁷ Ka dok otiŋo kikopo, ka doŋ opwoyo, ci omiyo botgi, kun wacci, “Wun ducu wumat man; ²⁸ pien man aye remona me gicikke, ma oo pi jo mapol pi weko bal. ²⁹ Atito botwu ni, cakke tin, pe dok abimato pig olok, nio wa i nino maca ka abimatone doki kacel kwedwu i ker pa Wora.” ³⁰ I kare ma doŋ gutyeko wero wer, gua gucito i wi got Jeituni. ³¹ Yecu owaco botgi ni, “I dyewor matin, wun ducu wubitenya woko kena, pien yam gicoyo ni, ‘Abigoyo lakwat, ci romi gibiket woko ata.’ ³² Ento lacen ka doŋ acer woko abitelo nyimwu me cito i Galilaya.” ³³ Petero otuco bot Yecu ni, “Kadi ka jo mukene ducu gibitenyi woko, ento an pe abitenyi ata.” ³⁴ Yecu owacce ni, “Ada awacci ni, tin ki i dyewor, ma noŋo twon gweno peya okok, ibikwera woko tyen adek.” ³⁵ Ento Petero dok ogamo ni, “Kadi bed mitte ni myero ato kacel kwedi, pe abikweri.” Lupwonnye mukene-ni bene ducu guwaco kit meno. ³⁶ Lacen Yecu ocito kwedgi i kabedo mo ma nyiŋe Gececemane, ci ociko lupwonnyene ni, “Wun koŋ wubed kany, an koŋ acit kuca ka lego Lubaŋa.” ³⁷ Okwanyo Petero ki litino pa Jebedayo aryo me wot kwede, ci cwinye ocako poto matek ki kumo bene madwoŋ. ³⁸ ci owaco botgi ni, “Cwinya tye ka waŋ matek, mito neka woko. Wubed ka kiyo piny kacel kweda.” ³⁹ Ocako cito anyim manok, ci oguŋo oryebbe piny olego ni, “Wora, ka ce imito, kwany kikopo man woko ki i koma; ento pe obed kit macalo an amito, gin ma in imito aye myero otimme.” ⁴⁰ Ka oa odwogo bot lupwonnye onoŋo gunino woko, ci owaco bot Petero ni, “Pe itwero kiyo piny pi cawa acel mo kacel kweda? ⁴¹ Wuki wuleg Lubaŋa, wek pe wudony i abita mo; cwiny kikome mito loyo abita pa Catan, ento kom aye nyap.” ⁴² Dok odok ka lego Lubaŋa tyen me aryo kun lego ni, “Wora, ka kikopo man pe twero kato ma pe amato, wek gin ma imito otimme.” ⁴³ Dok odwogo onoŋo gunino woko, pien onoŋo nino doŋ omako waŋgi twatwal. ⁴⁴ Ka dok owekogi ocito olego lubaŋa tyen me adekke, kun nwoyo lego lega acel-lu. ⁴⁵ Ka oa odwogo bot lupwonnye openyogi ni, “Wun pud wunino ce? Pud wutye ka yweyo bo? Nen, cawa doŋ onyiko cok, Wod pa dano doŋ gimiyo woko i ciŋ lubalo. ⁴⁶ Doŋ wua malo, wacitu; nen dano ma doba doŋ tye cok.” ⁴⁷ I kare ma Yecu pud tye ka lok, Juda otugi bino; en yam ŋat acel i kin jo apar wiye aryo-ni. Obino ki lwak ma gua bot ajwagi madito pa Lubaŋa ki ludoŋo pa lwak, kun gitye ki pala lucwan ki odoo-gu. ⁴⁸ Juda ma odobe-ni yam omiyo botgi lanyut. En owacci, “Dano ma abimoto kun anoto leme, meno aye en kikome; wutugi makone woko.” ⁴⁹ Cutcut obino bot Yecu atir, ocako mote ni, “Lapwony itye!” Ci onoto leme. ⁵⁰ Yecu owaco bot Juda ni, “Larema, ibino kany piŋo?” Ci gubino gutugi poto i kome, gumake woko cut. ⁵¹ Ento dano mo acel i kom jo ma onoŋo gitye kacel ki Yecu oryeyo ciŋe ci owoto pala lucwanne, otoŋo ki opii pa ajwaka madit pa Lubaŋa, oŋuno ite woko. ⁵² Ci Yecu owaco ki dano-nu ni, “Dwok pala lucwanni kakare i akura; pien jo ducu ma mako pala lucwan, gibinekogi bene ki pala lucwan. ⁵³ Itamo ni pe atwero lego Wora wek ocwalla lumalaika makato dul mony apar wiye aryo woko, i cawa man? ⁵⁴ Ci lok ma yam gicoyo i ginacoya-ni doŋ bicobbe kakare niŋniŋ, ni myero obed kit meno?” ⁵⁵ I kare meno Yecu owaco bot lwak ni, “Wubino bota ki pala lucwan ki odoogu me maka, macalo wubino i kom layak? Abedo ka pwony i ot pa Lubaŋa jwijwi, ci pe yam wumaka do. ⁵⁶ Ento gin magi ducu doŋ otimme, wek lok ma yam gicoyo i buk pa lunebi ocobbe kakare.” I kare meno cut lupwonnye gubwote guriŋo woko. ⁵⁷ Jo ma gumako Yecu gutere bot Kayapa ajwaka madit pa Lubaŋa, ka ma onoŋo lupwony-cik ki ludoŋo-gu gucokke iye. ⁵⁸ Ento Petero obedo ka lubo kor Yecu ki cencen, nio kwede wa i dyekal pa ajwaka madit; odonyo ci obedo kacel ki lukur-piny kun kuro wek enen gin ma bitimme. ⁵⁹ Ajwagi madito ki jo ma i Lukiko ducu guyenyo lok me caden me goba i kom Yecu wek gineke woko. ⁶⁰ ento pe gumedo ki noŋo lok mo, kadi bed lucaden ma lugoba mapol gukelo lok goba. Me agikkine jo aryo gubino, ⁶¹ guwacci, “Dano-ni owaco ni, ‘Atwero keto ot pa Lubaŋa, ka dok agero woko kakare i nino adek.” ⁶² Cutcut ajwaka madit pa Lubaŋa oa malo ci owacci, “Pe idok iye lok mo? Kit lok aŋo ma jo-ni gudoti kwede-ni?” ⁶³ Ento Yecu oliŋ woko aliŋa. Ajwaka madit pa Lubaŋa dok owacce ni, “Amito ikwoŋ kwoŋ ki nyiŋ Lubaŋa makwo, tit botwa ka ce in aye i Kricito ma Lubaŋa oyero, Wod pa Lubaŋa.” ⁶⁴ Yecu odokke iye ni, “In iwaco giri kit meno; ento awaco botwu ni, cakke kombeddi wubineno Wod pa dano ka obedo piny i kabedo me deyo ka ŋet Won Twer tuŋ lacuc, kun bino ki pol me polo.” ⁶⁵ Ci ajwaka madit pa Lubaŋa ocako yeco ginarukane woko kekene, kun wacci, “Oyeto Lubaŋa; pud dok wumito caden me ŋo? Kombeddi doŋ wuwinyo kit ma en oyeto kwede Lubaŋa. ⁶⁶ Wutamo iye lok aŋo?” Gudokke iye ni, “Balle romme to.” ⁶⁷ Cutcut guŋulo laa i waŋe, ka gudoŋe. Jo mogo gudoŋe kun giwaco ni, ⁶⁸ “In lanebi-ni! In Kricito ma Lubaŋa oyero-ni, tuci! Aŋa mugoyi?” ⁶⁹ Petero onoŋo tye woko, obedo piny i dyekal. Ci aŋeca mo obino bote, owacce ni, “In bene onoŋo itye kacel ki Yecu Lagalilaya.” ⁷⁰ Ento Petero okwero woko i nyim dano ducu, kun wacci, “An pe aniaŋ gin ma ibeloko-ni.” ⁷¹ Ka Petero okato woko i doggaŋ, aŋeca mukene dok onene, ci owaco bot jo ma onoŋo gucuŋ kunnu ni, “Dano man bene onoŋo tye kacel ki Yecu me Najaret.” ⁷² Petero dok okwero woko kun kwoŋŋe akwoŋa ni, “An gira pe aŋeyo dano-ni.” ⁷³ Ka kare okato manoknok, jo ma onoŋo gucuŋ kenyo gubino guwaco bot Petero ni, “Ada, in i ŋat acel i kingi, pien kit ma iloko kwede nyuti woko.” ⁷⁴ Petero ocako kwoŋŋe kun lamme kekene ni, “Pe aŋeyo danoni.” Cutcut twon gweno otugi kok. ⁷⁵ Ci Petero ocako po lok ma nene Yecu owacce ni, “Ma noŋo twon gweno peya okok, ibikwera woko tyen adek kulu.” Ci okato woko okok ki cwercwiny madwoŋ.