¹ I kare meno lupwonnye gubino bot Yecu, gupenye ni, “Aŋa ma loyo ki dit i ker me polo?” ² Ci Yecu olwoŋo latin mo bote, ocibo ocuŋ i kingi, ³ ka owaco botgi ni, “Ada awaco botwu ni, ka pe wulokke wudoko macalo litino, pe wubidonyo i ker me polo wacel. ⁴ Dano ma mwolle woko kekene calo latin man, en aye ma loyo ki dit i ker me polo. ⁵ Dano ma jolo latin mo acel macalo man i nyiŋa, noŋo ojolo an. ⁶ “Ento dano ma miyo ŋat acel ma i kin jo magi matino ma guye an-ni poto i bal, onoŋo bedo ber makato ducu ka gitweyo kidi rego madit i ŋute ci gibole kwede woko wa i nam matut. ⁷ “Lobo bineno can pi gin ma miyo dano gipoto i bal. Pien gin ma miyo dano poto i bal myero obin, ento dano ma kelo gin ma miyo dano poto i bal bineno can! ⁸ Ka ce ciŋi nyo tyeni aye miyo ipoto i bal, ci toŋ iŋun ibol woko; twara ma idonyo i kwo ma ciŋi lakucel peke nyo laput, ber makato ma ibedo ki ciŋi aryo nyo tyeni ducu giboli kwede woko i mac ma pe to. ⁹ Ka ce waŋi aye miyo ipoto i bal, ci kol woko; twara ma idonyo i kwo ma waŋi lakucel, kato ma kono giboli ki waŋi aryo ducu i mac Geena. ¹⁰ “Myero wunen ni pe wucayo ŋat mo acel ki i kin jo magi matino-ni; pien awacciwu ni, i polo kuca lumalaikagi neno waŋ Wora ma tye i polo kare ducu. ¹¹ Pien Wod pa dano obino ka laro jo murwenyo. ¹² Wutamo gin aŋo? Ka ce dano mo tye ki romine miya acel, ka acel i kingi ocito orwenyo woko, pe biweko romi pyeraboŋwen wiye aboŋwen-ni i wi cere-gu, ci cito ka yenyo en murwenyo-ni? ¹³ Ka onoŋe, ada awaco botwu ni, cwinye bibedo yom pire makato pi romi pyeraboŋwen wiye aboŋwen ma pe onoŋo gurwenyo-ni. ¹⁴ Kit meno Wora ma tye i polo bene pe mito ni ŋat mo acel i kin jo magi matino myero oto. ¹⁵ “Ka ce omeru obalo bal mo boti, cit bote inyutte balle, i kin in ki en keken. Ka owinyo lokki, ci doŋ inoŋo omeru. ¹⁶ Ento ka pe owinyo lokki, kwany dano acel nyo aryo mukene wucit kwedgi, wek lok ma caden aryo nyo adek giloko omok lok ducu. ¹⁷ Ka ce okwero winyo lokgi, tit pire bot lwak jo muye an; ka ce okwero winyo wa lok pa jo muye an, wek obed boti calo Larok ki lajog-mucoro. ¹⁸ “Ada awaco botwu ni, gin mo ducu ma wutweyo i wi lobo man gibitweyo kadi wa i polo, gin mo ducu ma wubigonyo i wi lobo man gibigonyo bene wa i polo. ¹⁹ Dok bene awaco botwu ni, ka jo aryo i kinwu biye kacel lok i kom gin ma gilego, ci Wora ma tye i polo bitimo pigi. ²⁰ Pien ka ma jo aryo nyo adek gucokke kacel i nyiŋa, an bene noŋo atye kunnu i kingi.” ²¹ Petero oa obino bot Yecu ci openye ni, “Rwot omera mono bibalo bal bota tyen adi, ka dok atim kica bote. Pud dok abitimo bote kica ka obalo tyen abiro?” ²² Yecu owacce ni, “Pe awacci ni ma romo tyen abiro, ento ma romo tyen pyerabiro tyen abiro. ²³ “Pi meno ker me polo gitwero poro ki kabaka mo ma onoŋo yam omito yubo lok me banya ki luticce. ²⁴ I kare ma doŋ ocako kwano wel, ci gikelo ŋat mo acel ma onoŋo tye ki banyane ma romo milion mapol ata. ²⁵ Kit macalo onoŋo doŋ pe twero culo banya-nu, ci laditte ociko ni myero gicate woko i opii, en kacel ki dakone ki litino, ki kit jami ducu ma onoŋo en tye kwede, wek gicul ki banya meno. ²⁶ Cutcut latic-cu orumo coŋe piny i nyime, kun bako doge bote ni, ‘Ladit, koŋ idi cwinyi i koma do, ci abiculli gin ducu.’ ²⁷ Ci kica omako ladit i kom laticce-nu, ogonye woko dok oweko banyane bene. ²⁸ Ento latic-cu i kare ma okato woko, orwatte ki latic mo i kom lutic wadigi ma onoŋo tye ki banyane ma romo ciliŋ miya abic, ci omake ki ŋute kun peye ma wacci, ‘Cul banyana!’ ²⁹ Ento latic lawote-ni oryebbe piny kun bako doge bote ni, ‘Koŋ idi cwinyi i koma, abiculo banyani.’ ³⁰ En okwero woko, ocito otweye i mabuc nio ka biculo banyane. ³¹ Ka lutic wadigi guneno gin ma otimme-ni, ci cwinygi ocwer matek twatwal, gucito gutito gin ducu ma otimme bot laditgi. ³² Cutcut ladit olwoŋe ci owacce ni, ‘In latic marac! Aweki banya ca woko ducu pien onoŋo ilega kun ibako dogi bota; ³³ onoŋo in bene pe kica twero maki i kom latic lawoti-nu, kit macalo onoŋo kica omaka i komi-ni?’ ³⁴ Kiniga omako ladit twatwal oweko omiye bot askari lugwok mabuc, nio ka oculo banyane ducu. ³⁵ Wora ma tye i polo bene bitimowu kit meno, ka ce pe wutimo kica bot dano ki i cwinywu, dano acel acel ki ominne.”