¹ Yecu olwoŋo jone apar wiye aryo kacel, omiyo botgi tek ki twero i kom cen ducu, ki me caŋo two, ² oorogi ka tito lok i kom ker pa Lubaŋa ki ka caŋo lutwo. ³ Ocikogi ni, “Pe wuwot ki gin mo, kadi ki odoo, kadi kicaa, kadi kwon, kadi lim, dok pe wubed ki kanyi aryo. ⁴ Ot ma wubidonyo iye, wubed kunnu, nio ka wubia, wucito giwu. ⁵ Ka ma pe gijolowu iye, ka wua ki i gaŋ meno, wuteŋ apwa tyenwu obed caden botgi.” ⁶ Gua gucito i kin gaŋ, gutito lok me kwena maber kun gicaŋo lutwo bene i kabedo ducu. ⁷ Ento Kerode rwot madit ka owinyo pi gin ducu ma obedo ka timme, wiye ocuŋ woko, pien jo mogo guwaco ni Jon Labatija aye ocer ki i kin jo muto, ⁸ jo mukene ni, Elia aye doŋ onen, jo mukene ni, ŋat acel i kin lunebi macon aye ocer. ⁹ Kerode owaco ni, “Jo yam atoŋo wiye woko do; ento man aŋa ma dok awinyo lok macalo magi i komeni?” Oparo pi nene twatwal. ¹⁰ Ka lukwena gudwogo, gutitte lok ducu ma gutiyo. Yecu oterogi, ocito kwedgi i gaŋ ma gilwoŋo Betecaida i muŋ. ¹¹ Ka lwak guwinyo, ci gulubo kore, en ojologi, otito botgi lok i kom ker pa Lubaŋa, ocaŋo jo ma komgi lit. ¹² Ka piny doŋ mito yuto, jone apar wiye aryo gubino bote, guwacce ni, “Cwal lwak gucit i kin gaŋ ki i pacci ma orumo kany, wek guyeny kabuto, gunoŋ cam; pien kany watye i dye tim.” ¹³ Ento Yecu odok iye botgi ni, “Wun wumi botgi cam.” Gugamo ni, “Watye ki mugati abic ki rec aryo keken, nyo ka ce imito waciwil cam pi lwak man ducu.” ¹⁴ Pien onoŋo gimito romo dano alip abic. Ociko lupwonnyene ni, “Wumi dano gubed piny i dul, i dul acel acel dano pyerabic.” ¹⁵ Gutimo kumeno, gumiyo dano ducu gubedo piny. ¹⁶ Yecu okwanyo mugati abic ki rec aryo-nu, oneno malo i polo, olego iye gum, obaro iye, omiyo bot lupwonnyene wek guket i nyim lwak. ¹⁷ Gin ducu gucamo guyeŋ. Gicoko ŋide mudoŋ oromo aduku apar wiye aryo. ¹⁸ Ka onoŋo en tye ka lega kaikene, kun lupwonnyene bene tye kacel kwede, en openyogi ni, “Dano mono giwacci an aŋa?” ¹⁹ Gudok iye ni, “Jon Labatija, jo mukene giwacci Elia, ki jo mukene ni ŋatti mo acel i kin lunebi macon aye doŋ ocer.” ²⁰ Openyogi ni, “Wun kono wuwacci an aŋa?” Petero ogamo ni, “In i Kricito ma Lubaŋa oyero.” ²¹ Ento Yecu ocikogi matek ni pe myero gutit lok man bot dano mo. ²² Dok owaco ni, “Wod pa dano myerone okany can madwoŋ, dok ludoŋo ki ajwagi madito pa Lubaŋa ki lupwony-cik myero gukwere woko, ci guneke, ento myero gicere woko i nino me adekke.” ²³ Dok owaco bot dano ducu ni, “Ka dano mo mito lubo kora, myero okwoŋ kwerre kekene, otiŋ yatariyane nino ducu, ci olub ki kora. ²⁴ Pien dano ma mito laro kwone, birwenyone arwenya, ento dano ma rwenyo kwone pira, bilaro kwone. ²⁵ Pien konyo dano ma olimo lobo ducu ki gin aŋo kun kwone rwennye woko, nyo balle? ²⁶ Dano ma lewic make pira ki pi lokka, Wod pa dano bene lewic bimake i kome, i kare ma en bidwogo i deyone ki deyo pa Lubaŋa Won kacel ki pa lumalaika maleŋ. ²⁷ Ento atito botwu ni, tye jo mogo ma gucuŋ kany ma pe gibibilo to, ma pud peya guneno ker pa Lubaŋa.” ²⁸ Ka nino ma mito romo aboro okato i ŋe lok magi, Yecu otero Petero ki Jon ki Yakobo, oito kwedgi i wi got ka lega. ²⁹ I kare ma onoŋo en tye ka lega, waŋe olokke mapat, ginarukane odoko matar ma ryeny lidaŋdaŋ. ³⁰ Nen, jo aryo gubedo ka lok kwede, jo-nu onoŋo aye Moses ki Elia, ³¹ ma gunen kun gitye ki deyo, guloko pi ane ki i lobo man, ma en myero ocob i Jerucalem. ³² Petero ki jo ma tye kacel kwedgi onoŋo nino omako waŋgi matek, ento gubedo ma waŋgi twolo, guneno deyone ki jo aryo ma gucuŋ kacel kwede. ³³ Ka jo aryo-nu mito a woko ki bote, ci Petero owaco ni, “Ladit, bedo kany ber; kono wagero aduc adek, acel meri, acel pa Moses, ki acel pa Elia”. Onoŋo Petero pe ŋeyo gin ma myero eloki. ³⁴ ka pud loko lok man, pol obino, oumogi; lworo omakogi ka gidonyo i pol. ³⁵ Dwan oa i polo ni, “Man aye Woda ma doŋ ayero; wuwinye.” ³⁶ Ka dwan man doŋ oloko, ci ginoŋo Yecu odoŋ kene. Lupwonnye guliŋ aliŋa; i kare meno, pe gutito bot dano mo lok mo i kom gin ma guneno. ³⁷ Orwone, ka doŋ gulor piny ki i wi got, lwak madwoŋ gurwatte kwede. ³⁸ Nen, laco acel ki i kin lwak odaŋŋe ni, “Lapwony, abako doga boti, inen woda, pien anywalo en acel kene. ³⁹ Nen, cen bino i kome, ci miyo kok cut; ryeye, kelo bwoyo i doge, nyoŋo kome woko, pe a ki i kome oyotoyot. ⁴⁰ Abako doga bot lupwonnyeni ni guryem woko, ento ryemone oloyogi.” ⁴¹ Yecu odok iye ni, “Wun yalwak me kare man, pe wutye ki niye, kitwu doŋ oballe woko. Abibedo kwedwu wa awene? Abidiyo cwinya i kwomwu nio wa awene? Kel wodi kany.” ⁴² Ka onoŋo tye ka bino, cen orete woko piny, oryeye matek. Ento Yecu ogerre i wi cen marac, ocaŋo awobi-nu, odwoke bot wonne. Dano ducu guuro dit pa Lubaŋa. ⁴³ Ento ka pud gitye ka uro gin ducu ma en otiyo, Yecu owaco bot lupwonnyene ni, ⁴⁴ “Wuwek lok man odony i itwu; pien Wod pa dano gibimiye i ciŋ dano.” ⁴⁵ Ento lupwonnyene pe guniaŋ lok man; lok man okanne woko ki botgi wek pe guniaŋ iye; ci gulworo penye pi lok meno. ⁴⁶ Pyem yam ocakke i kingi, ni aŋa ma i kingi ma loyo ki dit. ⁴⁷ Yecu ka oŋeyo pyem ma i cwinygi, okwanyo latin matidi, omiye ocuŋ i ŋete, ⁴⁸ owaco botgi ni, “Dano ducu ma jolo latin man i nyiŋa, noŋo ojolo an, dano ducu ma jolo an, noŋo ojolo ŋat ma oora; pien ŋat matidi twatwal i kinwu ducu en aye ŋat madit.” ⁴⁹ Jon ogamo ni, “Ladit, waneno ŋat mo ma ryemo cen i nyiŋi, wageŋe, pien en onoŋo pe lubi kacel kwedwa.” ⁵⁰ Ento Yecu odok iye ni, “Pe wugeŋe, pien ŋat ma pe lakworwu, noŋo tye tuŋ botwu.” ⁵¹ Ka kare doŋ mito romo me tiŋe malo, ociko waŋe matek me cito i Jerucalem. ⁵² Ooro lukwena gukwoŋo nyime; gucito, gudonyo i gaŋ mo pa Lucamaria pi yubbe kabedo. ⁵³ Ento Lucamaria pe gujole, pien waŋe okemo Jerucalem. ⁵⁴ Ka lupwonnyene Yakobo ki Jon guneno, guwaco ni, “Rwot, imito wacik mac oa ki i polo, otyekgi woko?” ⁵⁵ Ento Yecu olokke, ojukogi, kun waco ni, “Pe wuŋeyo kit cwiny ma wutye kwede; ⁵⁶ pien Wod pa dano pe obino ka tyeko kwo pa dano, ento pi larogi.” Gucito i gaŋ mukene. ⁵⁷ Ka gitye ka wot i yo, dano mo owacce ni, Abilubi ka ma ibicito iye ducu. ⁵⁸ Yecu odokke iye ni, “Too tye ki boro, winyo me polo tye ki odigi, ento Wod pa dano pe tye ki ka ma myero epyel iye wiye.” ⁵⁹ Owaco bot dano mukene ni, “Luba.” Ento danonu ogamo ni, “Ladit, koŋ iwek aciyik wora.” ⁶⁰ Yecu odokke iye ni, “Wek jo muto guyik jo muto wadigi; ento in iciti, inya lok i kom ker pa Lubaŋa.” ⁶¹ ŋat mukene owaco ni, “Abilubi, ladit; ento koŋ iwek acit, acik jotuwa.” ⁶² Yecu owacce ni, “Pe tye dano mo ma mako kweri dyaŋ, ka dok neno ŋeye, ma biromo bedo i ker pa Lubaŋa.”