¹ Ka Yecu doŋ otyeko lokke ducu kun dano giwinyo, ci odonyo i Kapernaum. ² Ladit mo ma Laroma ma loyo askari miya yam tye ki laticce ma en maro twatwal, ma kome lit, cok to. ³ Ka en owinyo pi Yecu, ci ooro ludoŋo pa Lujudaya bote kun lege ni obin ocaŋ laticce. ⁴ Ka gubino bot Yecu, gubako doggi bote ki cwinygi ducu kun giwaco ni, “En ber, myero itimme man, ⁵ pien maro rokwa, en aye ogero kacokkewa.” ⁶ Yecu ocito kacel kwedgi. Ka doŋ oo cok ki gaŋ, ladit ma loyo askari ooro lureme bote, kun wacce ni, “Ladit, pe icanne, pien an pe amyero me wek ibin idony i oda, ⁷ en aye gin mumiyo atamo ni, kadi an bene pe aromo bino boti. Ento wac lok awaca keken ci laticca bicaŋ. ⁸ Pien an bene a dano ma giloya aloya i dog tic, atye ki askari bene ma an aloyogi. Ka awaco bot askari mo acel ni, ‘Citi,’ ci cito, dok ka awaco bot ŋat mukene ni, ‘Bin’, ci bino dok ka awaco bene bot laticca ni, ‘Tim man,’ ci timo.” ⁹ Yecu ka owinyo man, ci ouro twatwal, olokke bot lwak ma lube, owaco botgi ni, “Atito botwu ni, peya anoŋo niye ma rom ki man, kadi i Icrael.” ¹⁰ Ka luor doŋ gudok paco, gunoŋo latic doŋ kome yot. ¹¹ Ka kare okato manok, ocito i gaŋ ma gilwoŋo Nain; lupwonnyene ki lwak madwoŋ guwoto kacel kwede. ¹² Ka doŋ onyiko cok ki dogcel me gaŋ, nen, gitye ka lebo dano muto, latin ma minne onoŋo onywale en kene, minne yam da-to. Lwak dano ma gua ki i gaŋ onoŋo gitye kacel kwede. ¹³ Ka Rwot onene, kica omake i kome, owacce ni, “Wek koko obedi.” ¹⁴ En obino ogudo kitara, ci jo ma gitye ka lebo lato gucuŋ mot. Yecu owaco ni, “Awobi, awacci, a malo.” ¹⁵ Dano ma oto-ni oa, obedo, ocako lok. Yecu omiye bot minne. ¹⁶ Lworo omakogi ducu, gupako Lubaŋa kun giwaco ni, “Lanebi madit doŋ onen i kinwa!” dok ni, “Lubaŋa doŋ olimo jone!” ¹⁷ Lok man ma en otiyo-ni oywek i lobo Judaya ducu ki i lobo ducu ma orumo. ¹⁸ Lupwonnye pa Jon gutito lok magi ducu bote. ¹⁹ Jon olwoŋo jo aryo ki i kin lupwonnyene oorogi bot Rwot ka penye ni, “In aye ŋat ma myero obin-ni, nyo dok wakur ŋat mukene?” ²⁰ Ka jo-nu gubino bot Yecu, guwacce, ni, “Jon oorowa boti, kun penyo ni, ‘In aye i ŋat ma myero obin-ni, nyo dok wakur ŋat mukene?’ ” ²¹ I kare meno onoŋo Yecu ocaŋo lutwo mapol ma gitye ki arem ki cen maraco, omiyo lutowaŋ mapol guneno piny. ²² Yecu odok iye botgi ni, “Wucitit bot Jon gin ma wuneno ki ma wuwinyo; lutowaŋ guneno piny, luŋolo guwoto, ludobo gilonyogi, ludiŋit guwinyo lok, ki jo muto gicerogi woko, ki lucan bene gitito botgi lok me kwena maber. ²³ Dano ma tamme pe oballe i koma tye ki gum.” ²⁴ Ka doŋ lukwena pa Jon gudok, Yecu ocako lok ki lwak i kom Jon ni, “Onoŋo wucito i tim ka neno gin aŋo? Onoŋo wucito ka neno lagada ma yamo obedo ka yeŋone? ²⁵ Onoŋo wucito kunnu kono ka neno gin aŋo? Wucito ka neno dano ma oruko boŋŋi mabeco? Nen, jo ma ruko boŋŋi me deyo, dok ma bedo ki jami me wel, gibedo i gaŋ kal pa luker. ²⁶ Doŋ onoŋo wucito kunnu ka neno gin aŋo? Wucito ka neno lanebi mo? Iyo, awaco botwu ni ŋat madit makato lanebi. ²⁷ Man aye ŋat ma yam gicoyo lok i kome ni, ‘Nen, acwalo lakwenana otelo nyimi, ma bigero yoni ma peya in ibino.’ ²⁸ Awaco botwu ni, pe tye dano mo ki i kin jo ma mon onywalogi ma kato Jon ki dit; ento ŋat matidi twatwal i ker pa Lubaŋa aye kate.” ²⁹ Ka guwinyo lok man, lwak ducu wa lujog-mucoro guye ni Lubaŋa oporre, pien yam gibatijagi ki batija pa Jon, ³⁰ ento Luparicayo ki lupwony-cik gukwero gin ma Lubaŋa oyubo pigi, pien nene pe gulimo batija ki bot Jon. ³¹ Yecu dok owacci, “Doŋ abiporo jo me kare man ki gin aŋo? Gin calo aŋo? ³² Girom ki litino ma gibedo i cuk ma gilwoŋo litino wadigi kun giwaco ni, ‘Yam wakuto nyamulere botwu wun pe wumyelo; wawero wer lyel, wun pe wukok.’ ³³ Pien Jon Labatija doŋ obino kun pe camo kwon, pe mato koŋ vino bene wun wuwaco ni, ‘En tye ki cen marac.’ ³⁴ Wod pa dano dok obino kun camo dok mato bene, wun wuwaco ni, ‘Nen, dano ma owor ki lameno, larem lujogmucoro ki lubalo.’ ³⁵ Ento ryeko pa Lubaŋa oloyo kop pi litinone ducu.” ³⁶ ŋat acel i kin Luparicayo olwoŋe ka cam bote; Yecu ocito i ot pa Laparicayo ci obedo piny i dog cam. ³⁷ Nen, tye dako mo ma labalo i gaŋ meno. Ka oŋeyo ni Yecu tye ka cam i ot pa Laparicayo, ci okelo adomo moo ma ŋwece kur. ³⁸ Ocuŋ i ŋe Yecu tuŋ tyene kun kok, pig waŋe oton i tyen Yecu, obedo ka jwayo ki yer wiye kun noto tyene, owiro ki moo. ³⁹ Ka Laparicayo ma onoŋo olwoŋe-ni oneno, oloko i iye kekene ni, “Kono dano man lanebi, kono oniaŋ i kom dako ma ogude-ni, ki kite, ni en labalo.” ⁴⁰ Yecu odokke iye ni, “Cimon, atye ki lok mo ma amito awacci.” Cimon ogamo ni, “Wacca, Lapwony.” ⁴¹ Yecu ogamo ni, “ŋat mo ma lami-banya yam tye ki dano aryo ma gucamo banya bote. ŋat acel onoŋo tye ki banya me ciliŋ miya abic, ŋat mukene pyerabic. ⁴² Ka culone oloyogi, otimo kica botgi gin aryo ducu. Mene i kingi ma bimare makato?” ⁴³ Cimon odokke iye ni, “Atamo ni en ma gitimo kica pi wel banya madwoŋ-ŋi.” Ogamo ni, “Iŋolo kakare.” ⁴⁴ Olokke bot dako, openyo Cimon ni, “Ineno dako man? Adonyo i odi, pe imiya pii me lwoko tyena, ento en otono pig waŋe i tyena, ojwayo ki yer wiye. ⁴⁵ In pe imota kun inoto lema, ento cakke i kare ma adonyo i ot, en pe oweko noto tyena. ⁴⁶ In pe iwiro wiya ki moo, ento en owiro tyena ki moo ma ŋwece kur. ⁴⁷ Pi meno atitti ni, doŋ giweko balle mapol-gu ducu, kit ma marre madwoŋ-ŋi nyuto-ni; ento ŋat ma giweko balle manok, marre nok. ⁴⁸ Owaco bot dako ni, ‘Balli doŋ giweko.’” ⁴⁹ Jo ma onoŋo tye i dog cam gucako lok i kingi kekengi ni, “Man aŋa, ma weko bal-li?” ⁵⁰ Owaco bot dako ni, “Niyeni olari; wot doŋ giri ki kuc.”