¹ I nino mukwoŋo me cabit, mon gupuk kwarpiny, gubino i wi lyel, kun gikelo aŋwecegi ma guyubo. ² Gunoŋo ni giloro got woko ki i dog lyel, ³ ento ka gudonyo iye, pe gunoŋo kom Rwot Yecu. ⁴ Ka onoŋo pud guro lok man, nen, co aryo gucuŋ i ŋetgi ma guruko jor ma ryeny lidaŋdaŋ. ⁵ Ka komgi oryaŋŋe, ci guryebbe piny, co-nu gupenyogi ni, “Piŋo wuyenyo dano makwo i kin jo muto? ⁶ En pe tye kany, ento ocer woko. Wupo lok ma yam en owaco botwu i kare ma pud en tye i Galilaya, ⁷ ni, Wod pa dano myero gimiye i ciŋ lubalo, gigure i kom yatariya, ki cer woko i nino me adekke.” ⁸ Gupo lokke, ⁹ ka gua ki i wi lyel gudok, gutito lok man ducu bot jo apar wiye acel ca, ki bot jo mukene ducu. ¹⁰ Jo ma yam gutito lok man bot lukwena gin aye Maliam Lamagdala, Joana, ki Maliam min Yakobo, ki mon mukene ma onoŋo tye kwedgi. ¹¹ Lokdgi obedo calo lok miŋo ki bot lukwena, pe guye lokgi. ¹² Ento Petero oa, oriŋo wa i wi lyel; ka ocuŋ oneno lyel, oneno boŋŋi camanini ma tye kengi pat; odok paco kun uro gin ma otimme. ¹³ I nino-nu kikome jo aryo ki i kingi onoŋo nene gicito i paco ma gilwoŋo ni Emau, ma mito romo mairo abiro ki i Jerucalem, ¹⁴ kun giboko lok kekengi i kom gin ma otimme. ¹⁵ Ka kun giboko lok ma bene gilaro kacel, Yecu kikome onyiko cok, owoto kwedgi. ¹⁶ Ento waŋgi oumme woko, pe guŋeye. ¹⁷ Owaco botgi ni, “Wularo lok aŋo kekenwu kun wutye ka wot-ti?” Gucuŋ ma waŋgi nen ki can. ¹⁸ ŋat acel i kingi ma nyiŋe Kelopa, odok iye bote ni, “In i welo keni i Jerucalem ce, ma pe iŋeyo lok ma otimme kunnu i kare man?” ¹⁹ Yecu openyogi ni “Gin aŋo?” Gudokke iye ni, “Lok i kom Yecu Lanajaret, ma yam obedo lanebi matek i lokke ki i ticce i nyim Lubaŋa, ki i nyim dano ducu, ²⁰ ki kit ma ajwagi madito pa Lubaŋa ki lulocwa gudobe wek giŋol kop i kome me neke, gugure i kom yataria. ²¹ Ento yam wageno ni en aye ŋat ma bikoko Icrael. Iyo, medo i kom meno ducu, tin doŋ nino me adek nia ma lok man otimme. ²² Mon mogo i kinwa bene gumiyowa ur. Gupuk i wi lyel odiko con, ²³ pe gunoŋo kome; gudwogo cen kun giwaco ni guneno lumalaika ma onyutte botgi, kun giwaco ni en kwo gire. ²⁴ Jo mukene ma onoŋo tye kacel kwedwa gucito i wi lyel, gunoŋo tye kit macalo mon guwaco; ento pe guneno kome.” ²⁵ Yecu owaco botgi ni, “Wun lumiŋ, ki luwackom i cwinywu pi ye lok ducu ma lunebi yam guloko! ²⁶ Pe myero ni Kricito ma Lubaŋa oyero onen can magi, wek odony i deyone?” ²⁷ Cakke wa i kom Moses, ki lunebi ducu, en ogonyo botgi lok ducu ma i ginacoya ma mako kome. ²⁸ Ka gunyiko cok ki paco ma onoŋo gicito iye-ni, Yecu otimo macalo mito kato akata ki wotte, ²⁹ ento gudiye matek kun giwaco ni, “Bed botwa, pien piny doŋ cok yuto, ceŋ bene doŋ cok poto woko.” Odonyo i ot obedo kwedgi. ³⁰ Ka tye i dog cam kacel kwedgi, omako mugati, opwoyo, obaro iye, omiyo botgi. ³¹ Waŋgi oyabbe, guŋeye; ci cutcut orwenyo woko ki i waŋgi. ³² Gupennye kekengi ni, “Cwinywa nakanen pe obedo ka pukke i kare ma en tye ka lok kwedwa i waŋayo, kun yabbiwa ginacoya?” ³³ Gua i cawa-nu, gudok i Jerucalem; gunoŋo jo apar wiye acel ca gucokke kacel, ki jo ma onoŋo tye botgi. ³⁴ Jo-nu guwaco ni, “Rwot ocer ada, onyutte bot Cimon!” ³⁵ Gutito lok ma otimme i waŋayo, ki kit ma giŋeye kwede i kare ma obaro mugati. ³⁶ Ka pud gitye ka loko lok man, Yecu kikome ocuŋ i kingi, owaco botgi ni, “Kuc obed i komwu!” ³⁷ Ento komgi oto woko lirut, gulworo kun gitamo ni gineno tipo. ³⁸ Yecu openyogi ni, “Piŋo cwinywu opoto? Piŋo wupennye kekenwu i cwinywu? ³⁹ Wunen ciŋa, ki tyena, man an kikoma; wuboŋa, wunena; pien tipo pe tye ki kom ki cogo kit macalo wuneno an atye kwede.” ⁴⁰ Ka doŋ owaco lok man, ci onyuto ciŋe ki tyene botgi. ⁴¹ Ento ka pud peya giye pi yomcwiny, kun giuro, owaco botgi ni, “Wutye ki gin mo kany me acama?” ⁴² Gumiye but rec ma gubulo, ⁴³ ogamo, ci ocamo i nyimgi. ⁴⁴ Lacen owaco botgi ni, “Man aye lokka ma yam aloko botwu i kare ma onoŋo pud atye kwedwu, ni, lok ducu ma gicoyo i koma i cik pa Moses, ki i lunebi, ki i jabuli myero ocobbe kakare.” ⁴⁵ Oyabo tamgi wek giniaŋ ginacoya, ⁴⁶ owaco botgi ni, “Yam gicoyo kit man ni, Kricito ma Lubaŋa oyero myero onen can, ci i nino me adekke myero ocer ki i kin jo muto, ⁴⁷ dok myero gitit lok i kom ŋut ma kelo weko bal i nyiŋe bot rok ducu kun gicako ki i Jerucalem. ⁴⁸ Wun wucaden me lok man. ⁴⁹ Nen, abicwalo botwu gin ma Wora ociko; ento myero wubed i Jerucalem, nio ka gibirukowu ki tek ma a ki i polo.” ⁵⁰ Lacen oterogi woko nio wa Betania, otiŋo ciŋe malo olamo gum i komgi. ⁵¹ Ma kun pud lamo gum i komgi, ci opokke woko ki botgi, [gitiŋe, gitere i polo. ⁵² Guwore, lacen gudwogo i Jerucalem ki yomcwiny madwoŋ, ⁵³ guri i ot pa Lubaŋa jwijwi, kun gipwoyo Lubaŋa.