¹ Ka man otum, Yecu dok onyutte bot lupwonnyene i dog nam Tiberia, onyutte kit man. ² Cimon Petero, Tomaci ma gilwoŋo ni Baŋi, Natanael me Kana me Galilaya, litino pa Jebedayo ki jo aryo mukene i kin lupwonnyene onoŋo gitye kacel. ³ Cimon Petero owaco ki gin ni, “Acito ka mako rec.” Gugamo doge ni, “Wan wacito kwedi.” Gucito, gudonyo i yeya; ento i dyewor meno pe gumako gin mo. ⁴ Ka piny pud oru aruya, Yecu ocuŋ i wi tera, ento lupwonnyene pe giŋeyo ni en Yecu. ⁵ Yecu openyogi ni, “Litino, wunoŋo dek mo twal?” Gudokke iye ni, “Pe”. ⁶ En owaccigi ni, “Wubol obwo tuŋ malacuc me yeya. ci wubinoŋo.” Gubolo, tiŋo obwo oŋayogi pi pol rec. ⁷ Lapwonnye meno ma Yecu maro owaco ki petero ni, “Meno Rwot!” Ka Cimon Petero owinyo ni meno Rwot, oruko boŋŋine, pien onoŋo ogonyogi woko pi tic, okworre i nam. ⁸ Ento lupwonnye mukene gubino i yeya, kun giywayo obwo ma opoŋ ki rec, pien onoŋo pe gibor ki wi tera, mito romo tyen miya acel. ⁹ Ka doŋ gukatti woko i wi tera, guneno mac miri kunnu, ma giketo rec i wiye, ki mugati. ¹⁰ Yecu owaccigi ni, “Wukel rec mogo ma pud wumako amaka-ni.” ¹¹ Cimon Petero oito i yeya, oywayo obwo, okelo i wi tera, kun opoŋ ki rec madito, miya acel ki pyerabic wiye adek. Kadi bed gipol ento obwo pe oyec. ¹² Yecu owaccigi ni, “Wubin ka cam.” Pe tye ŋat mo i kin lupwonnye ma odiyo cwinye me penye ni, “In aŋa?” Pien giŋeyo ni en Rwot. ¹³ Yecu obino, okwanyo mugati, opokkigi, ki rec bene kit meno. ¹⁴ Man doŋ tyen me adekke ma Yecu onyutte kwede bot lupwonnyene, ma doŋ en ocer ki i kin jo muto. ¹⁵ Ka doŋ gicamo otum, Yecu openyo Cimon Petero ni, “Cimon wod pa Jon, in imara makato jo-ni?” En ogamo ni, “Iyo, Rwot, in iŋeyo an amari.” Ocike ni, “Kwa litino romina.” ¹⁶ Openye tyen me aryo ni, “Cimon wod pa Jon, in imara?” En ogamo ni, “Iyo Rwot, in iŋeyo an amari.” Ocike ni, “Gwok romina.” ¹⁷ Dok openye tyen me adekke ni, “Cimon wod pa Jon, in imara?” Petero okumo pien openye tyen me adekke ni, “Imara?” Owacce ni, “Rwot, in iŋeyo jami ducu; in iŋeyo an amari.” Yecu ocike ni, “Kwa romina. ¹⁸ Adada awacci ni, ka ceŋ in pud awobi, itweyo boŋoni keni, iwoto ka ma imito; ento ka doŋ iti, ibiryeyo badi, ci ŋat mukene bitweni boŋoni, biteri ka ma pe imito.” ¹⁹ Owaco man pi nyuto kit to ma en biketo kwede deyo i kom Lubaŋa. Ka oloko lok man, owacce ni, “Luba.” ²⁰ Petero olokke, oneno lapwonnye meno ma Yecu maro kun lubogi, en aye ŋat ma ceŋ ojeŋŋe i kor Yecu i dog cam me otyeno, ma owaco ni, “Rwot, aŋa ma bidobi?” ²¹ Ka Petero onene, openyo Yecu ni, “Rwot, danoni kono?” ²² Yecu owacce ni, “Ka amito ni en ori nio ka abidwogo, ilaro aŋo iye? In luba.” ²³ Lok man oywek i kin utmego, ni lapwonnye man pe bito; ento Yecu ceŋ pe owaco ni en pe bito, ento ni, “Ka amito ni en ori nio ka abidwogo, ilaro aŋo iye?” ²⁴ Man aye lapwonnye ma obedo caden i kom lok magi, dok ocoyogi; wan bene waŋeyo ni lok ma en obolo obedo ada. ²⁵ Tye bene gin mukene mapol ma Yecu otiyo; ka kono gicoyogi ki acel acel, atamo ni kadi lobo kulu pe twero romo buk ma gicoyo.