¹ Pi meno wan myero waketu cwinywa twatwal i gin ma yam wawinyo, wek pe waŋak woko ki iye. ² Lok me kwena ma yam lumalaika gukelo onoŋo omoko matek. Ka ŋat mo okalo wi cik mo, nyo okwero winyo, gimiye can iye ma oporo bal ma en obalo. ³ Wan kono dok wabibwot niŋniŋ ka pe waketo cwinywa i larre man ma pire dit twatwal-li? Larre man Rwot aye mukwoŋo tuco pire, ka doŋ jo ma yam guwinyo ki bote, gumoko botwa lokke. ⁴ Lubaŋa bene omedo cadenne kun tiyo lanyut mogo ki taŋo ki tic madito mapatpat, dok kun poko mot mogo me Cwiny Maleŋ pi mitte kene. ⁵ Pien Lubaŋa pe oketo lobo ma mito bino ma wan waloko pire-ni i te loc pa lumalaika. ⁶ Tye ka mo ma gituco ka maleŋ ni, “Dano gin aŋo, mumiyo ipo pire? Nyo latin pa dano, mumiyo iparo pire? ⁷ Ikete ki piny i te lumalaika pi kare manoknok, iketo en obedo laloc ma loyo gin ducu ma iketogi; ⁸ iketo en obedo lalo jami ducu.” Doŋ ka oketo jami ducu i te loc pa dano, pe oweko gin mo ma en pe loyo. Kit macalo tye-ni pud pe waneno ka giketo jami ducu i te twerone. ⁹ Ento wan waneno Yecu ma yam gikete ki piny i te lumalaika pi kare manoknok, ento kombeddi doŋ gimiye deyo ki woro macalo kabaka pi arem me to ma en ociro, wek pi kica pa Lubaŋa ebil to pi jo ducu. ¹⁰ Jami ducu tye pi Lubaŋa, dok en aye muketogi. doŋ ka yam en omito kelo litino mapol i deyone, gin ma en otimo obedo ma myero twatwal, en mumiyo latel wigi i larre doko dano muteggi pi ciro can. ¹¹ ŋat ma olonyogi bedo maleŋ, ki jo ma gilonyogi-ni, gin ducu gua i kom ŋat acel; man en aye gin mumiyo lewic pe mako Yecu me lwoŋogi ni omegine, ¹² kun owaco ni, “Abitito nyiŋi bot utmegina, abipaki ki wer i dye lwak mucokke.” ¹³ Dok ni, “Abiketo genna i kome,” ki dok ni, “An a ene, ki litino ma Lubaŋa doŋ omiya.” ¹⁴ Kit macalo litino i kare ducu giribbe i kom ki remo, en bene kit meno onywako kwedgi komgi ki remogi, wek pi tone eŋiny ŋat ma tye ki twer i kom to woko, meno en aye Catan, ¹⁵ ka doŋ egony jo ma yam gubedo i twec me opii pi kare me kwogi ducu pi lworo to. ¹⁶ Doŋ onen maber ni, gin ma en otimo pe okemo lumalaika, ento okemo likwayo pa Abraim. ¹⁷ Meno gin mumiyo en myero odok ma rom aroma ki utmegine i yo ducu, wek omi ebed ajwaka madit ma lakica dok lagen i tic pa Lubaŋa, wek omi ekwany bal pa jone woko. ¹⁸ Pien en kikome yam oneno can dok Catan obite, en mumiyo en twero konyo jo ma gibitogi.