¹ Wumedde ki mar i kinwu kekenwu macalo omego. ² Wiwu pe owil ka jolo welo, pien jo mogo ma yam gugwoko welo onoŋo gugwoko lumalaika i pacogi kun pe giŋeyo. ³ Wupo pi jo ma tye i mabuc calo wutye kacel kwedgi i mabuc kunnu. Wupo bene pi jo ma gitimogi ki tim marac, kit macalo wun bene wutye i kom. ⁴ Jo ducu myero guket deyo i kom nyom, dok kitanda pa jo ma gunyomme myero giwor obed maleŋ; pien Lubaŋa biŋolo kop i kom lutim tim me abor ki jo ma balo nyomgi. ⁵ Pe wubed jo ma maro lim; jami ma wutye kwede myero oromwu, pien Lubaŋa yam oloko ni, “Pe abiboli, pe abibwoti ata.” ⁶ En meno gin mumiyo cwinywa tek, kun wawaco ni, “Rwot en lakony mera, pe abibedo ki lworo; ŋo kono ma dano twero timo i koma?” ⁷ Wupo i kom lutel wiwu macon, ma yam gitittiwu lok pa Lubaŋa. Wutam pi kwogi ki gin maber ma oa iye, ka doŋ wulub niyegi. ⁸ Yecu Kricito gire kite tye acel keken laworo ki tin ki nino ma pe tum. ⁹ pe wuwek pwony mogo mapatpat dok ma welo gurwenywu woko; ber kica pa Lubaŋa aye mumi teko i cwinywa, pe pi cik me cam mogo ma dano ma gulubo pe gunoŋo iye kony mo. ¹⁰ Watye ki keno tyer ma lutic i kema macon ca pe gitye ki twero mo me cam iye. ¹¹ Pien lee ma yam ajwaka madit tero remogi i kabedo maleŋ me bedo gitum pi bal, komgi yam giwaŋo woko cen i ŋe gony. ¹² Kit meno bene Yecu yam oto cen woko i ŋe dogcel, wek omi elony dano ki remone kikome gubed maleŋ. ¹³ Pi meno myero wacitu bene woko i ŋe gony, kun waciro anywar pire; ¹⁴ pien kany pe watye ki gaŋ mo ma ri nakanaka, ento watye ka yenyo gaŋ ma tye anyim ma cok bino. ¹⁵ Doŋ wamiyu pakwa bot Lubaŋa i kare ducu macalo gitum ma gityero bot Lubaŋa, kun wawok ki bot Yecu; meno aye pwoc ma wamiyo ki dogwa ka watuco nyiŋe. ¹⁶ Pe myero wiwu owil ka timo gin maber, ki poko jami ma wutye kwede bene bot jo mukene; pien gitum macalo meno yomo cwiny Lubaŋa. ¹⁷ Wuwiny lok pa jo ma telowu, dok wumine i te locgi, pien gin gitye ka gwoko tipowu laboŋo yweyo macalo jo ma Lubaŋa bipenyogi pi ticgi. Wumi guti ticgi ki yomcwiny, ma pe wumiyogi peko mo, pien meno pe konyowu kadi ki acel. ¹⁸ Wuleg Lubaŋa piwa, pien wan waŋeyo ada ni cwinywa gire leŋ, dok wamito ni wati gin maber i kare ducu. ¹⁹ Amedo cuko cwinywu ni wuleg Lubaŋa, wek odwoka botwu oyotoyot. ²⁰ Lubaŋa won kuc ma ocero Rwotwa Yecu Kricito ki i kin jo muto, ma en aye lakwat romi madit, pi remo me gicikke ma ri nakanaka, ²¹ en myero omiwu gin ducu mabeco ma mitte, wek wuti wucob gin ma en mito; dok bene pi Yecu Kricito myero en oti kwedwa gin ma yomo cwinye. Deyo obed bot Yecu Kricito nakanaka. Amen. ²² Utmegina, alegowu ni wudi cwinywu i lokka ma acoyo manoknok mo-ni ma acuko kwede cwinywu. ²³ Myero wuŋe ni ominwa Temceo doŋ gigonyo woko; wabibino kwede ka nenowu, ka ce orune obino oyot. ²⁴ Wumot lutelwu ducu, ki jo pa Lubaŋa bene ducu. Jo mua ki i Itali gumotowu. ²⁵ Kica pa Lubaŋa doŋ obed kwedwu ducu.