¹ Waraga man oa ki bot Paulo ma en lakwena. Pe dano mogo aye ma ceŋ guore, or ma mere me bedo lakwena pe yam owok ki bot dano mo, ento oa ki bot Yecu Kricito ki bot Lubaŋa Won ma ceŋ ocere woko ki i kin jo muto. ² Utmegiwa ducu ma gitye kacel kweda kany bene gumotowu. Bot jo ducu ma guye Kricito ma gibedo i Galatia: ³ Lubaŋa Wonwa ki Rwotwa Yecu Kricito omiwu kica kacel ki kuc, ⁴ en Kricito ma yam omine kene pi balwa wek elarwa woko ki i gin marac me kare man, kun lubo gin ma Lubaŋa Wonwa mito. ⁵ Deyo obed bote nakanaka. Amen. ⁶ An auro kit ma wulokke kwede oyot, kun wubwoto ŋat ma ceŋ olwoŋowu i kica pa Kricito, dok wulokke woko wutye ka lubo lok me kwena maber mo mukene. ⁷ Lok me kwena maber mo mukene gire pe, ento tye jo mogo ma balo cwinywu woko, kun gimito gilok lok me kwena maber pa Kricito odok gin mapat. ⁸ Ento kadi bed wan, nyo lamalaika mo mua ki i polo, otittiwu lok me kwena maber mapat ki lok ma nene watito botwu-ni myero gicen woko. ⁹ Kit macalo nene watito botwu, pud dok atittiwu aye ni, ka ce tye ŋatti mo ma dok tye ka tittiwu lok me kwena maber ma pokke woko ki ma yam doŋ wuye-ni, myero gicen woko. ¹⁰ Kombeddi atye ka yenyo cwak pa dano, nyo pa Lubaŋa? Gwok nyo atye ka temme me yomo cwiny dano ba? Ka ce nene abedo ka yomo cwiny dano, onoŋo myero pe abed latic pa Kricito. ¹¹ Utmega, amito wuŋe lok man, ni, lok me kwena maber ma ceŋ atito botwu-ni pe obedo gin pa dano. ¹² Pe yam agamo lok man me kwena maber ki bot dano mo, dok bene pe gipwonya kwede apwonya, ento anoŋo ki bot Yecu Kricito ma ceŋ onyutte bota-ni. ¹³ Wutyeko doŋ winyo lok i kom kwona macon i kare ma onoŋo pud alubo dini pa Lujudaya, kit ma abedo ka libo kwede jo muye Lubaŋa, kun atimo bwami i komgi, dok atemme mada me nekogi woko liweŋ. ¹⁴ I dini pa Lujudaya an aye ma onoŋo aloyo jo mapol ma gin yalwakka ma gin jo me rokka, kun aketo cwinya adada me lubo kit me tekwaro pa kwarowa. ¹⁵ Ento Lubaŋa yam oyera wa con, oketa woko pat ma onoŋo pud peya ginywala, ka dok olwoŋa gire pi kicane. ¹⁶ Cwinye obedo yom me nyutta Wode, wek acit atit pire bot Lurok. I kare ma lok man otimme, pe aa acito bot dano mo ni omiya tam, ¹⁷ dok bene pe aa acito i Jerucalem bot jo mukwoŋo bedo lukwena kweda, ento acito gira cen wa i Arabia, ka aa ki kunnu dok adwogo cen i Damaciko. ¹⁸ I ŋe mwaka adek acito i Jerucalem ka limo Kepa1.18 Kepa aye Petero, ci abedo kunnu pi nino apar wiye abic. ¹⁹ Ento i kin lukwena aneno Yakobo omin Rwot keken. ²⁰ Me ada kadi wa i nyim Lubaŋa, lok ducu ma acoyo botwu i waraga man goba pe iye. ²¹ Ka dok acito i lobo Ciria ki Cilicia, ²² kun onoŋo lwaka dano mapol ma guye Kricito ma gitye i kabedo ducu i Judaya peya giŋeya dok peya guneno koma. ²³ Onoŋo guwinyo lok i koma keken ma gitittigi ni, “Ŋat ma yam obedo ka yelowa-ni, kombeddi tye ka tito lok i kom niye man ma yam koŋ otemo tyekone wokoni.” ²⁴ Omiyo gupako Lubaŋa pira.