¹ Ka nino me Pentekote doŋ oromo, onoŋo gin ducu gucokke kacel i kabedo acel. ² Oyotoyot woo owinnye kun oa ki i polo macalo yamo ma kodo mager, opoŋo ot ducu ka ma gubedo iye. ³ Ci gin mo onen botgi macalo leb mac ma opokke ci opye i wi ŋat acel acel i kingi. ⁴ Ka doŋ gin ducu gupoŋ ki Cwiny Maleŋ, ci gucako dumo leb mukene mapatpat macalo Cwiny Maleŋ omiyogi me lokone. ⁵ Onoŋo tye Lujudaya ma gibedo i Jerucalem, jo ma giworo Lubaŋa ma gua i rok ducu ma tye i wi lobo. ⁶ Ka woo meno owinnye, lwak ducu gucokke kun wigi ocuŋ woko, pien onoŋo ŋat acel acel winyogi ka giloko leb tugi kikome. ⁷ Ci guuro matek twatwal ma kun giwacci, “Jo ma giloko-ni mono pe gin ducu Lugalilaya? ⁸ Piŋo wan ducu dok wawinyogi kun ŋat acel acel tye ka lok i leb tugi kikome ma ginywale iye? ⁹ Wan Luparti, jo Media, jo Elam, ki jo ma gibedo i Mecopotamia, Judaya ki Kapadokia, Ponto ki Acia, ¹⁰ Purugia ki Pampulia, Ejipt ki lobo Libya ma dok tuŋ Cirene, ki welo ma gua ki i Roma ma gin Lujudaya ki jo ma gulokke gudonyo i diniwa, ¹¹ Lukurete ki Luarab, wan ducu wawinyogi ka gitito pi tic madito me twero pa Lubaŋa i leb tuwa kikome.” ¹² Gin ducu guuro ma pe gitwero niaŋ, ma giloko kekengi ni, “Man te lokke aŋo?” ¹³ Ento jo mukene gunyerogi anyera kun giwaco ni, “Jo-ni gumer ki koŋo vino manyen.” ¹⁴ Ento Petero ocuŋ kacel ki lukwena apar wiye acel, odaŋŋe ki dwan madit kun waco botgi ni, “Wun co me Judaya, ki wun jo ducu ma wubedo i Jerucalem, ber wuŋe lok man, dok wucik itwu ka winyo lokka. ¹⁵ Jo man pe gumer, macalo wun wutamo, pien cawa pud adek keken me odiko. ¹⁶ Ento man aye lok ma yam lanebi Joel oloko pire kun wacci, Lubaŋa owaco ni, ¹⁷ ‘Lacen abionyo Cwiny mera Maleŋ i kom jo ducu; litino awobewu ki anyirawu gibitito lok pa Lubaŋa, awobewu gibineno ginanyuta, jowu muti gibileko lek. ¹⁸ Iyo, i kare meno abionyo Cwiny mera wa i kom luticca ma co ki ma mon, ci gibitito lokka. ¹⁹ Abinyuto taŋo malo i polo ki lanyut mapatpat piny i wi lobo, remo ki mac ki yito ma duny. ²⁰ Ceŋ bicido woko macol, dwe bidoko makwar calo remo, ma noŋo nino pa Rwot peya obino, nino madit ki me deyo madwoŋ. ²¹ I kare meno jo ducu ma gilwoŋo nyiŋ Rwot gibilarogi.’ ²² “Wun jo Icrael, wuwiny lok man: Yecu Lanajaret obedo dano ma Lubaŋa aye onyuto botwu kun moko ki tic madito me twero, ki taŋo ki lanyut mapol ma Lubaŋa otiyo kacel kwede i kinwu, macalo wun wuŋeyo. ²³ Yecu man gimiye botwu macalo Lubaŋa yam onoŋo oyubo kun oŋeyo gin ma bitimme i anyim, ci wun wugure i kom yatariya, wuneke ki ciŋ jo ma pe guye Lubaŋa. ²⁴ Ento Lubaŋa ocero en woko, kun gonye woko ki i arem me to, pien to pe twero moko i kome. ²⁵ Pien Daudi yam oloko i kome ni, ‘Kare ducu aŋeyo ni Rwot tye kweda; pe gibidira woko cen, pien en tye yo tuŋ ciŋa malacuc. ²⁶ Pi meno omiyo abedo ki yomcwiny madwoŋ, leba bene loko ki yomcwiny, nino ducu abedo maber kun atye ki gen. ²⁷ Pien in pe ibitenya ata i lobo pa jo muto, pe ibiweko kom danoni ma geni top woko. ²⁸ In doŋ inyutta yo ma tera i kwo; bedoni kweda bimiyo abedo ki yomcwiny madwoŋ mada.’ ²⁹ “Utmego, myero alok botwu i kom kwarowa Daudi atir ni yam en oto dok giyiko kome, watye ki lyelle botwa kany nio wa tin. ³⁰ Onoŋo yam en lanebi, dok oŋeyo ni Lubaŋa yam okwoŋo kwoŋ bote ni ebiketo dano mo ma i kin likwaye ma bedo i wi komkerre. ³¹ En yam oneno gin ma bitimme i anyim ka oloko bene i kom cer pa Kricito ma Lubaŋa oyero ni, pe gitenye ata i lobo pa jo muto, kome bene pe otop. ³² Man en Yecu ma Lubaŋa ocero woko, wan ducu wacaden i kom lok meno. ³³ Ka gitiŋe malo wek obed i ŋet Lubaŋa yo tuŋ acuc i kabedo me deyo, ci ogamo Cwiny Maleŋ ki bot Wonne kit ma yam Lubaŋa ociko, ci oonyo i komwa gin man ma doŋ wuneno dok bene wuwinyo-ni. ³⁴ Pien Daudi yam pe ocito i polo; ento en aye owaco ni, ‘Rwot owaco bot Rwoda ni,mBed i ŋeta tuŋ acuc i kabedo me deyo, ³⁵ nio ka abimiyo lukworri doko kom laten tyeni.’ ³⁶ Myero jo me ot pa Icrael ducu guŋe atika ni, Lubaŋa otyeko keto en me bedo Rwot dok Kricito ma Lubaŋa oyere, en Yecu man ma wun wuguro i kom yatariya-ni.” ³⁷ Ka guwinyo man, cwinygi oton, ci guwaco bot Petero ki lukwena mukene ni, “Utmego, wabitimo aŋo?” ³⁸ Petero owaco botgi ni, “Wuŋut, gibatijawu ŋat acel acel ki i kinwu i nyiŋ Yecu Kricito, wek Lubaŋa owek balwu; ci wubilimo mot me Cwiny Maleŋ. ³⁹ Pien lok man giciko piwu ki pi litinowu ki pi jo ducu ma gitye ka mabor, ma Rwot Lubaŋawa bilwoŋogi bote.” ⁴⁰ Ka dok otito botgi lok mukene mapol, ma tuco matek dok cuko cwinygi kun waco ni, “Wularre kenwu wua woko ki bot yalwak man muŋak-ki.” ⁴¹ Ci jo muye lok ma en owaco botgi gibatijagi, ci gumedde i nino meno jo ma romo alip adek. ⁴² Gin gumine kengi ka winyo pwony pa lukwena, ka ribbe kacel ki jo ma guye Yecu, ka camo mugati ma gibaro, ki ka lega. ⁴³ Ci lworo omako dano ducu; ci lukwena gubedo ka tiyo lwak taŋo ki lanyut mapol. ⁴⁴ Jo ma guye Yecu gucokke kacel, kun ginywako jami ducu kacel. ⁴⁵ Gucato lonyogi ki jamigi, ka gupoko ki jo ducu kit macalo mitte bot ŋat acel acel. ⁴⁶ Nino ducu gibedo ka cokke i ot pa Lubaŋa ki baro mugati i pacogi, kun gicamo kacel ki yomcwiny ki cwiny acel, ⁴⁷ kun gipako Lubaŋa, ma dano ducu pwoyogi, ci Lubaŋa obedo ka medo i komgi jo ma gularre nino ducu.