¹ Pe ijuk ladit mo, ento cuk cwinye macalo woru; awobe myero inengi macalo omegini, ² nen mon madoŋo macalo mego, ki mon matino myero inengi macalo lumegini, laboŋo tam mo marac. ³ Wor mon ma coggi oto, ma doŋ gudoŋ kengi. ⁴ Ka ce dako ma cware oto tye ki litinone ki likwaye, myero gin koŋ gukwoŋ pwonyo ticgi me dini i odigi gin kikomgi, kun gimiyo kony bot lunyodogi pi kony mogo ma yam gumiyo botgi, pien meno aye Lubaŋa pwoyo. ⁵ Dako ma cware oto ma odoŋ kene laboŋo ŋat mo ma konye, keto genne ducu i kom Lubaŋa, dok bene bako doge kun lego Lubaŋa dyeceŋ ki dyewor. ⁶ Ento dako ma cware oto ma yenyo yomcwiny me jami mabeco keken, doŋ oto kadi bed pud kwo. ⁷ Ket cik man, wek gubed laboŋo lok mo ma gijukogi iye. ⁸ Ka ce dano mo pe miyo gin mo me konyo wadine, makato pi jo me ode kikome, noŋo doŋ okwero niyene woko, dok bene odoko rac makato ŋat ma pe oye Lubaŋa. ⁹ Pe myero gico nyiŋ dako ma cware oto ma mwaka me ditte peya oromo pyerabicel nono, dok bene myero en obed dako ma yam obedo ki cware acel keken. ¹⁰ Myero ginen ka ticce ber, ka ce yam opito litino, ka yam ojolo welo, nyo olwoko tyen jo pa Lubaŋa, ka okonyo jo ma yam giunogi, dok bene ka obedo ŋat ma yam omine kene i tiyo gin maber i yo ducu. ¹¹ Ento myero ikwer coyo mon ma pud gitino ma coggi oto; pien miti me komgi twero miyo gikwero Kricito woko, gicako mito nyomme doki aye, ¹² miyo giŋolo kop loyogi pi turo cikkegi mukwoŋo. ¹³ Medo i kom meno, gilokke gidoko luwackom ma gibibedo ka wot awota i ot ki ot; pe gibedo luwackom keken, ento gidoko bene jo ma loko lok atata, ma giridde i gin ma pe megi, gibedo ka loko lok ma pe myero gilok wacel. ¹⁴ Pi meno, omiyo amito ni mon matino ma coggi oto ginyomgi wek gunywal litino, gulo odigi, wek pe gumi kare ki lukworwa me loko gin mo marac i komwa. ¹⁵ Pien jo mogo i kingi doŋ guŋak woko, gitye ka lubo Catan. ¹⁶ Ka ce dako mo muye Rwot tye ki wadine ma gin mon to, myero en omi botgi kony, wek pe giket peko i kom lwak muye Yecu, ento lwak muye Yecu gubed ka konyo mon ma coggi oto ma lakonygi mo pe. ¹⁷ Ludoŋo ma loyo loc maber myero giworgi twatwal, makato myero giwor jo ma tye ka yelle ka tito lok ki pwonyo dano. ¹⁸ Pien lok ma yam gicoyo waco ni, “Pe itwe dog twon ka tye ka nyono bel,” dok bene ni, “Latic myero giculle mucarane.” ¹⁹ Pe iye lok adot mo ma gikelo i kom ladit mo, gwok nyo ka tye lucaden aryo nyo adek macalo ginacoya owaco. ²⁰ Doŋ jo ma pud ocuŋ i kom balgi, myero ijukgi i nyim dano ducu, wek omi jo mukene gubed ki lworo. ²¹ Aciki i nyim Lubaŋa ki Kricito Yecu ki lumalaika ma giyero, gwok cik magi ma pe i jeŋŋe i kom wat nyo larem. ²² Dok bene pe irune me keto ciŋi i kom ŋat mo, nyo me ribbe ki jo mukene i balgi; ento gwokke ibed maleŋ. ²³ Cakke kombeddi, doŋ pe imat pii keken, mat bene koŋo vino manok pi konyo ii pi two ma maki kare ki kare. ²⁴ Bal pa jo mogo nen woko ka maleŋ ma cimo atir ni kop biloyogi, ento bal pa jo mukene nen lacen. ²⁵ Tic maber bene nen woko ka maleŋ; kadi pe kit meno, pe kanne matwal ma pe onen.