¹ Atye ka winyo lok ni tim mo me kwele kwele tye i kinwu. Tim me kwele ma kit meno gire pe nen wa i kin jo ma pe ŋeyo Lubaŋa, ni tye dano mo i kinwu ma omayo ci-wonne ci tye ka bedo kwede macalo dakone. ² Pud bene wuwakke pire! Cwinywu pe myero ocwer, wek giryem ŋat ma otimo kit tim macalo meno woko ki i kinwu? ³ An ki tuŋ bota, kadi ape kunnu, cwinya tye botwu kunnu; kit macalo atye kunnu-ni doŋ atyeko ŋolo kop woko i kom dano meno ma doŋ otimo tim marac-ci. ⁴ Myero wucokke kacel i nyiŋ Rwotwa, ma noŋo an bene atye kwedwu i cwiny ki tek pa Rwotwa Yecu, ⁵ ka doŋ wumi dano macalo man bot Catan wek onek kome woko, wek cwinye aye obilarre i nino pa Rwot. ⁶ Wakkewu-ni pe ber. Pe wuŋeyo ni tobi matidi mo yenyo moko ducu ma girubo me tedo mugati? ⁷ Wukwany tobi macon woko, wek wubed mugati manyen. I adane, tobi pe i komwu, pien latin romowa me Kato (Paska) doŋ gityero woko, en aye Kricito. ⁸ Pe doŋ myero wakweru Katowa ki tobi macon, en tobi me raccwiny ki tim mogo maraco, ento myero wakweru ki mugati ma tobi pe iye, ma en aye leŋ ic ki ada. ⁹ Yam acoyo botwu i waragana ni meno, pe wuribbe ki jo ma gitimo tim kwele. ¹⁰ Pe onoŋo aloko i kom dano me lobo-ni ma gitimo tim kwele, nyo luworo me jami, ki luyak, nyo jo ma woro cal jogi. Pe kumeno; ka kuman onoŋo myero wua woko ki i lobo. ¹¹ Adane acoyo botwu ni pe wuribbe ki ŋat mo ma gilwoŋo ni dano pa Kricito, ka otimo tim kwele, nyo ka en obedo laworo me jami, nyo obedo dano ma woro cal jok, gwok nyo layet dano, lamero nyo layak; pe wunywak cam kacel ki kodi dano-nu. ¹² Meno pe ticca me ŋolo kop i kom jo ma pe guye Yecu. Lubaŋa aye ma biŋolo kop i komgi. Pe myero wun aye wuŋol kop i kom jo muye Lubaŋa ma gitye i kinwu? ¹³ Wuryem dano marac woko ki i kinwu.