¹ Ento wun utmegina, yam pe onoŋo atwero lok kwedwu calo jo ma tye ki Cwiny pa Lubaŋa, ento aloko kwedwu macalo jo ma pud tye ki kit ma ginywalogi kwede, macalo litino lukere i Kricito. ² Yam apitowu ki cak, pien onoŋo peya wutwero camo cam matek; kadi wa kombeddi bene pud pe wuromo camo cam matek. ³ pien pud wutye ki kit ma ginywalowu kwede. Ka pud wutye ki nyeko i kinwu, ma wuda kekenwu, meno pe nyuto ni pud wutye i kit ma ginywalowu kwede, kun pud wulubo kit pa dano? ⁴ Ka dano mo i kinwu waco ni, “An dano pa Paulo,” ki ŋat mukene bene waco ni, “An dano pa Apolo,” meno noŋo pe nyuto ni wun pud wubedo dano adana? ⁵ Apolo mono en aŋa? Paulo kono en aŋa? Wan aye lutic ma miyo wuye Yecu. Ŋat acel acel tye ki tic ma Rwot opoko bote. ⁶ Yam acoyo kodi, Apolo oonyo iye pii, ento Lubaŋa omiyo odoŋo. ⁷ Kadi bed kumeno, ŋat mucoyo kodi nyo ŋat ma oonyo iye pii, gin ducu pe gin mo, kono Lubaŋa keken aye ma miyo jami doŋo. ⁸ Dano ma ocoyo kodi ki ŋat muonyo pii iye, gin ducu girom, ŋat acel acel binoŋo mucarane muporo tic ma en otiyo. ⁹ Pien wan lutic kacel ki Lubaŋa; wun poto pa Lubaŋa, dok bene wun gedo pa Lubaŋa. ¹⁰ Pi kica pa Lubaŋa ma gimiya, omiyo aketo te guti me gedo macalo ladit me gedo ma ladiro; ki dano mo mukene tye ka gero ot i wiye. Ento dano acel acel myero ogwokke kit macalo etye kwede ka gedo. ¹¹ Pien pe tye te guti mo mukene ma gitwero ketone, kono maca ma doŋ tye-ni keken, en aye Yecu Kricito. ¹² Doŋ ka ŋat mo ogedo i wi te guti mukwoŋo-nu ki jabu nyo ryal, nyo godi me wel-gu, nyo yat nyo lum, nyo reŋ kal, ¹³ tic ma dano acel acel otiyo binen woko ka maleŋ. Pien mac me Nino maca binyuto tic pa dano acel acel, ci nyuto ka maleŋ kit macalo ticce tye kwede. ¹⁴ Ka ce inen gedo pa dano-nu odoŋ, en gedo ma ogero i kom te guti mukwoŋo-ni, dano meno bilimo bakacic me pwoc. ¹⁵ Ento ka ce gedo pa dano mo owaŋ woko, ci en pe binoŋo kabacic mo me pwoc, ento en kikome bibwot, macalo ŋat ma koŋ owok ki i mac ka doŋ okatti ka maleŋ. ¹⁶ Pe wuŋeyo ni wun aye wubedo ot pa Lubaŋa me woro en, dok Cwiny pa Lubaŋa bedo i iwu? ¹⁷ Doŋ ka ŋat mo obalo ot pa Lubaŋa, Lubaŋa bene biteke woko; pien ot pa Lubaŋa leŋ, wun kikomwu aye wu ot meno. ¹⁸ ŋat mo pe obwolle kekene. Ka ce dano mo i kinwu tamo ni eryek i lobo man, en koŋ myero olokke odok lamiŋ, ka wek doŋ odok maryek. ¹⁹ Pien gin ma dano me lobo man gitamo ni obedo me ryeko, i nyim Lubaŋa obedo gin me miŋo. Pien yam gicoyo ni, “En mako jo maryek i ryekogi kengi, macalo i owic,” ²⁰ dok ni, “Rwot ŋeyo ni tam pa luryeko mere gin ma konnye pe.” ²¹ Pi meno ŋat mo pe myero owakke i kom dano, pien jami ducu obedo mewu; ²² kadi ki Paulo, nyo Apolo, nyo Kepa, nyo lobo man, nyo kwo, nyo to, nyo gin ma tye kombeddi, nyo gin ma bibedo tye i anyim. Magi-gu ducu mewu; ²³ wun jo pa Kricito, ki Kricito pa Lubaŋa.