¹ Wuket mar aye obed tamwu mukwoŋo ma pire dit; wuket cwinywu bene me noŋo mot ma Cwiny Maleŋ miyo, makato ducu mot me tito lok pa Lubaŋa. ² Pien dano ma dumo leb mapatpat pe loko ki dano, ento noŋo loko ki Lubaŋa. Ŋat mo ma niaŋ i lokke pe, pien noŋo en tye ka loko muŋ me Cwiny Maleŋ. ³ Ento dano ma tito lok pa Lubaŋa loko ki dano kun doŋo niyegi, cuko cwinygi dok kweyo cwinygi bene. ⁴ Dano ma dumo leb mapatpat doŋo niyene kene; ento ŋat ma tito lok pa Lubaŋa noŋo tye ka doŋo jo muye Kricito i niyegi. ⁵ Amito ni wudum leb mapatpat, ento makato ducu amito wutit lok pa Lubaŋa. Dano ma tito lok pa Lubaŋa pire dit kato ŋat ma dumo leb mapatpat, kono nyo ka ce tye dano mo ma twero gonyo bot dano gin ma en loko, wek okony jo muye Kricito i doŋo. ⁶ Utmegina, ka abio botwu kunnu ma kun noŋo adumo leb mapatpat, abibedo ki kony aŋo botwu, ka pe akelo botwu lok pa Lubaŋa ma ginyutta, nyo ŋec mo, nyo lok mo ma Lubaŋa omiya me atita, nyo pwony mo? ⁷ Kadi wa gin ma pe ki kwo, ma kok calo nyamulere nyo naŋa, ka ce dwane pe owinnye maber, ci dano gibiniaŋ niŋniŋ i wer ma gikuto nyo gigoyo? ⁸ Buriji bene ka pe gikuto i dwan me lwoŋo kikome, ci aŋa ma biyubbe pi cito i lweny? ⁹ En i yo acel-lu, aŋa ma biniaŋ i gin ma wuloko ka wudumo aduma ki leb mapatpat, kun wuloko lok ma pe niaŋŋe? Lokwu biket woko i yamo ata. ¹⁰ Tye leb mapol ma kitgi patpat i wi lobo, ento pe tye mo ma te lokke pe. ¹¹ Ento ka pe aŋeyo leb ma dano mo-ni tye ka loko, abedo macalo larok bote, ki en bene bedo macalo larok bota. ¹² Doŋ kit meno, macalo wuketo cwinywu me noŋo mot me Cwiny, wutem loyo jo mukene ducu i gin ma doŋo jo muye Kricito, miyo gicuŋ matek. ¹³ Pi meno, dano ma dumo leb mapatpat myero oleg Lubaŋa wek okonye me gonyo tyen lok ma eloko. ¹⁴ Pien ka alego Lubaŋa ma kun noŋo adumo aduma, cwinya bene lego, ento noŋo tamma pe timo iye gin mo. ¹⁵ Atim aŋo doki? Abilego Lubaŋa ki cwinya kun alego ki tamma bene; abiwero wer ki cwinya kun awero ki tamma bene. ¹⁶ Ka pe kumeno, ka ipwoyo Lubaŋa ki cwinyi keken, dano mukene ata ma obino i cokkewu twero gamo “Amen” i pwocci-nu i kite mene, ma kun pe oniaŋ i gin ma iloko? ¹⁷ Kadi bed onoŋo imiyo pwoc maber, pe konyo dano mukene ca me doŋo kadi ki acel mo. ¹⁸ Apwoyo Lubaŋa pien an adumo leb mapatpat ma akatowu ducu, ¹⁹ ento i cokke pa jo muye Kricito amito loko lok abic mo keken ki tamma wek apwony ki jo mukene, makato loko lok alip ki alip kun adumo aduma ki leb mapatpat. ²⁰ Utmegina, pe wubed calo litino i tamwu. Wubed litino i timo gin marac, ento i tamwu myero wubed jo muteggi. ²¹ Yam gicoyo i cik ni, “Abiloko ki jo me rok man i leb ma jo dumo kwede aduma ki i dog jo ma gin lurok ento kadi bed kumeno, gin pe gibiwinyo lokka, man lok pa Rwot.” ²² Meno nyuto ni, dumo leb mapatpat gimiyo wek obed lanyut bot jo ma pe guye Kricito, pe bot jo muye, ento tito lok pa Lubaŋa tye pi jo muye, pe pi jo ma pe guye. ²³ Doŋ ka dano ma guye Kricito gucokke kacel kun jo ducu ma iye gidumo leb mapatpat, dok ka jo mukene ata, nyo ma pe guye, gubino iye, pe gibiwaco ni wun jo mubaŋŋe? ²⁴ Ento ka dano ducu tye ka tito lok pa Lubaŋa, ce ka dano mo ma pe ye obino iye, nyo dano mo ata obino i ot, en tika biniaŋ i balle pi gin ma en owinyo ki bot jo ducu; lok ma dano ducu guloko biŋolo kop i kome, ²⁵ muŋ ma tye i cwinye bene en bituco woko ka maleŋ, ka doŋ biryebbe piny ci cako woro Lubaŋa kun tuco ni, “Adada, Lubaŋa gire tye i kinwu.” ²⁶ Lokke doŋ tye niŋniŋ, utmegina? Ka wucokke kacel, dano acel acel noŋo tye ki gin mo; ŋat mo noŋo tye ki wer, mo tye ki pwony, mo tye ki lok ma ginyutte, mo dumo leb mapatpat, ki mo mukene noŋo ŋeyo gonyo te lokke. Gin-nu ducu myero otimme i yo ma konyo doŋo jo muye Kricito. ²⁷ Ka dano dumo leb mapatpat, myero gubed gin aryo nyo adek, pe okat wel ennu-ni, kun gileyo aleya, ma ŋat mo gonyo te lokke. ²⁸ Doŋ ka onoŋo pe tye ŋat mo ma gonyo, ci myero dano ma mito lok i leb mapatpat oliŋ aliŋa i cokke pa jo muye Kricito, en olok kekene ki Lubaŋa. ²⁹ Ento jo aryo nyo adek ma gitito lok Lubaŋa gitwero lok, kun jo mukene-gu giŋiyo lok ma giloko. ³⁰ Ka ce inen Lubaŋa onyuto lok mo bot ŋat mukene ma obedo piny, doŋ dano ma nen tye ka lok ca myero oliŋ woko. ³¹ Pien wun ducu wutwero tito lok pa Lubaŋa kun wuleyo aleya, wek jo ducu gupwonnye, dok bene ocuk cwinygi. ³² Jo ma gitito lok pa Lubaŋa gitwero loyo cwiny ma gimiyogi me tito lok; ³³ pien Lubaŋa pe ticce me kelo anyobanyoba, en gire won kuc. Macalo timme i cokke ducu pa lwak muye Yecu, ma gin jo pa Lubaŋa. ³⁴ mon myero guliŋ woko litik ka gitye i kacokke. Pien pe giyegi me lok; gin myero gubed i te loc, macalo cik pa Lujudaya bene oloko. ³⁵ Ka ce gimito ŋeyo lok mo, myero gupeny coggi ki paco. Bedo me lewic mada, dako me lok i cokke pa lwak dano ma guye Kricito. ³⁶ Gwok nyo wutamo ni lok pa Lubaŋa yam oa ki botwu ba, dok obino botwu keken? ³⁷ Ka ŋat mo tamo ni en latit lok pa Lubaŋa, nyo etye ki mot mogo me Cwiny, myero oŋe ni, lok ma acoyo botwu-ni en aye cik mua ki bot Rwot. ³⁸ Ento ka ŋat mo pe oketo lok man i tam, pe bene gibeketo tam i kome. ³⁹ Kit meno, utmegina, wuket cwinywu i tito lok pa Lubaŋa, lok me dumo leb mapatpat bene pe wugeŋ. ⁴⁰ Ento gin mo ducu wutim i kit maber, dok kore ki kore.