¹ Wulub kita, macalo an bene alubo kit pa Kricito. ² Apwoyowu pien i lok ducu wupo pira, kun wumako pwonnya ma yam akelo botwu. ³ Ento amito wuŋe ni wi laco acel acel en aye Kricito, wi dako aye cware, ki wi Kricito aye Lubaŋa. ⁴ Laco mo-ni ma lego Lubaŋa, nyo ma tito lok pa Lubaŋa kun oboyo wiye, meno noŋo oketo lewic i wiye. ⁵ ento dako ma lego Lubaŋa nyo ma tito lok pa Lubaŋa, ma kun pe oboyo wiye noŋo oketo lewic i wiye, pien pe tye apokapoka mo i kin en ki dako ma olyelo wiye woko. ⁶ Ka dako mo pe boyo wiye, myero onyar yer wiye woko. Ka bedo me lewic ka dako olyelo wiye, nyo onyaro yer wiye anyara, en doŋ myero obo wiye woko. ⁷ Laco pe myero obo wiye, pien en cal pa Lubaŋa dok deyo pa Lubaŋa bene; ento dako aye deyo pa laco. ⁸ Laco yam pe giketo nia ki i kom dako, ento dako aye oa i kom laco. ⁹ Laco yam pe giketo pi dako, ento dako aye giketo pi laco. ¹⁰ En mumiyo dako myero obed ki lanyut me twero i wiye, pi lumalaika. ¹¹ Ento i kwowa me bedo i Rwot, dako pe twero cuŋ kene laboŋo laco, ki laco bene pe twero cuŋ kene laboŋo dako; ¹² pien macalo dako yam gitiyo oa i kom laco, i kit acel-lu laco bene dako aye ma nywalo, dok jami ducu a ki bot Lubaŋa. ¹³ Koŋ wuŋol lok man kenwu; tika nen ber ka dako olego Lubaŋa ma pe oboyo wiye? ¹⁴ Kit ma ma ginywalowa kwede bene pe pwonyowu ni, ka laco oloto yer wiye odoŋo maboco, ci miyo ginyware? ¹⁵ Ento dako gire ka yer wiye olot maboco meno bedo me deyo bote, pien gimiye yer maboco-nu me umme kwede. ¹⁶ Doŋ ka ŋat mo mito kelo pyem iye, wan giwa wape ki kit macalo meno, pe bene tye i kin jo ducu muye Lubaŋa. ¹⁷ Acikowu kun bene atye ki lok mogo ma cwinya pe yom iye i komwu, pien cokkewu-ni gin mo ma konyo pe iye, kelo bal keken. ¹⁸ Lok mukwoŋo ma atyeko winyone en aye ni, ka lwak gucokke kacel, apokapoka bedo tye i kinwu. An bene tuŋcel aye lok meno, ¹⁹ pien dul mogo myero gubed i kinwu, wek jo ma tye maber gunen woko ka maleŋ. ²⁰ Pien ka wucokke kacel pe wucamo. Cam pa Rwotwa, ²¹ pien wun ducu ŋat acel acel kwoŋo camo camme woko, kun jo mogo bedo ki kec, ki jo mogo gimer megi woko. ²² Wun mono pacowu pe, ka ma wutwero camo iye camo iye cam ki mato mat-gu? Nyo wucayo jo ducu muye Lubaŋa, kun wuketo lewic i kom jo ma pe tye ki gin mo? Myero awac botwu gin aŋo? Wumito apwowu? Pe atwero pwoyowu pi lok man. ²³ Pien pwony ma yam apwonyowu kwede, Rwot aye mumiya, ni, i wor meno ma giketo roro i kome-ni, Rwot Yecu omako mugati; ²⁴ ka doŋ opwoyo, ci obaro iye, omiyogi kun wacci, “Man aye koma ma tye piwu. Wutim kuman me po pira.” ²⁵ Kumeno ka gucamo otum, otiŋo kikopo kun wacci, “Kikopo man aye gicikke manyen i remona. Wutim kuman i kare ducu ma wumato, me po pira.” ²⁶ Pien i kare ducu ma wucamo mugati man, dok bene ka wumato ki kikopo-ni, noŋo wutye ka yweko lok me to pa Rwot, nio ka en bidwogo. ²⁷ En mumiyo ka dano mo ocamo mugati man, nyo omato kikopo man ma kun kite pe myero, noŋo en odoko labal pi pyedo kom ki remo pa Rwot. ²⁸ Dano acel acel myero koŋ okwoŋ ŋine kene, ka doŋ ocak camo mugati meno ki mato gin ma tye i kikopo meno. ²⁹ Pien ŋat ma camo nyo mato kun pe oniaŋ maber i kom gin ma gilwoŋo ni kom Rwot, noŋo en tye ka kelo kop i kome kene ka ce ocamo nyo omato. ³⁰ Meno gin mumiyo jo mapol i kinwu gitwo, dok gigoro bene, ki jo mogo doŋ guto woko. ³¹ Ka kono nene wan kikomwa waŋolo kop i komwa kekenwa ki ada, kono pe giŋolo kop i komwa. ³² Doŋ ka Rwot aye ma ŋolo kop i komwa, en pwodowa me pwonyowa, wek pe giŋol kop olowa kacel ki jo me lobo. ³³ Pi meno doŋ, utmegina, ka wucokke ka camo cam pa Rwotwa, ŋat acel acel myero koŋ okur lawote. ³⁴ Ka dano mo kec neko, myero koŋ ocam cam i pacone, wek pe kop olowu ka wucokke kacel. Lok mukene mudoŋ, abiyubo ka ao botwu.