¹ "Yange muviniu ua vusunga, na Tata yange ikeye mukamuhaka. ² Ue kufumisa mutntango uose muliange uze kauekuima muhako, ngecize ue kusonduela muntango hamuntango uze uekusemuniuna mihaka linga ukeme mihako yayingi. ³ Muli laza vaku lela mukonda lia muzimbu uze unjambuluile kulienu. ⁴ Salenu muliange, nange mulienu. Ngecizemu muntango ka ukuhasa kuima muhako haluauo kuvanga usalesale ku muviniu, ngecize nenu hasenumo, kuvanga musale muliange. ⁵ Yange muviniu, enu yenu mintango. Ou akusala muliange nange naua muli ikeye, a kuima cikuma mihako, mukaliange nevi vimukulinga viahi. ⁶ Nga naumo uahi akusala muliange, vakumumbila ngue ha muntango linga ome, ngecize naua vekukunga eyi mintango nakuyimbila mutuhia, ngecize linga yiueme. ⁷ Ngue mukusala muliange, ngecizeni mezi ange asale muliange, hulisenu nkala vimuasinganieka mumitima yenu, ngecize vakumi lingilico. ⁸ Tata yange va muzumbangeye mulieci, muomu mukuima cikuma mihako ngecizeni na kutavasiana nguenu muvandongesi ziange. ⁹ Omu vene muanjilema ange Tata, nange naua njamileme enu. Kalenu mucilemo cange. ¹⁰ Ngamuku nuinga zisimbi ziange, muka sala mucilemo cange, Omu vene munjalamena zisimbi zia tata yange nakusala mucilemo ceni. ¹¹ Ange njahandeka viuma evi kulienu linga ni kuvuikilila cange cikakale mulienu lingani kuviukilila cenu cika sutisiue. ¹² Olu lukeko lusimbi luange, linga mulileme umo namu kuavo ngece ange munjamilema. ¹³ Na umo uahi ali nacilemo cakama kupulakana eci ou umo nasilavelela hentsi ya kuyoya ceni hali vavusamba veni. ¹⁴ Muvavu samba vange nga mukulinga vuima vinjikumikamba enu. ¹⁵ Kati omo ni ange njimisane enu vangamba, muomu ngamba keku ziva vika vialikulinga mukuluntu ueni. Njami sana vavusamba vange, muomu ya viuma viose vize vi njavuile kufuma kuli Tata yange njami tantekeyesavio. ¹⁶ Enu kamuanjisakuile ange, olonzo ange njamisakuile enu na kumihia vuntuami enu lingani enu muhase kuya nakuima mihako, ngecize ni mihako yenu linga ikasale. Eci cili ngecize linga viose ovio vimukahula via Tata mulizina liange, ikeye akavi hana kuli enu. ¹⁷ Evi viuma ange njamikambe enu, linga ni enu mulileme omo namukuavo. ¹⁸ Nga kaye kakumizinda enu, zivenu nguenu kana njizindile ange ntsimbu kanda kamizinde enu. ¹⁹ Nga enu mua kele vakaye, kaye nga kamilema enu nakukala muvako. Olonzo enu katienu vaka kaye olonzo enu ni ange njamisakuile kufuma ku kaye, ngecizeni kaye kakumizinda enu. ²⁰ Vulukenu lize lizi ange njahandekele kuli enu, 'Ngamba kalemene kupulakana mukuluntu ueni.' Nga vanjiyandesele ange, nenu vene vakamiyandesa; ngue valamene lizi linga, vakevo naua vakalama lizi lienu. ²¹ Vaka linga viose evi viuma kuli enu muomuo yali zina liange, muomu kavamu tantekeyele ou uanjitumine ange. ²² Ngue ange kanjezile na kuhandeka kulu vakevo, nga ntsakavesi na indzi, vunoni aha kavesi naha hakuli hengela ha indzi yavo. ²³ Ou uose akunjizinda ange ua zinda va Tata. ²⁴ Ngue Ange kanjapangele vipangi vize nga na umo uahi ualingilemo mukati kavo, nga kavesi na indzi, olondzo vanamono na kuzinda hamolika nange na Tata yange. ²⁵ Olondzo eci cili ngecize ling cikasulise lizi eli lia sonekeua mu zisimbi ziavo, 'Vanjizindile ange cakuhona cipue mulonga.' ²⁶ Omu mukakuvandiekiesa mualikeza ou Ange injikatuma kulienu kufuma kuli tata, ou ikeye, muzimu ua vusunga, ue kuya kufuma kuli tata akalumbununa kukundika kuliange. ²⁷ Nenu naua mua panda kulumbununa, mukonda enu muakala nange kufuma kuku valeka.