¹ "Mitima yenu kati imiume. Tsilielenumuli Njambi, tsilielenu naua muli ange. ² Mundzivo yatata muli zihonda ziazingi . Nga katimuo, nga njinamileka, muomu njikuya na kumiviukisila muhela. ³ Munjikuya nakumi viukisila muhela, njikuiza naua na kumizila, mangana kuze kunjili ange nenu naua mukakaleko. ⁴ Muna tantekeya njila yakuze kunjikuya." ⁵ Tomasi ua handekele kuli Yesu ngueni, "Muangana, katua tantekeyele kuze ku ukuya, ambandzo njila tukuitantekeya vati?" ⁶ Yesu ua handekele kuli ikeye ngueni, "Ange yange njila, yange vudunga, na muono; na umo uahi akuiza kuli Tata sina kuhitila muli ange. ⁷ Nga muna tantekeyele ange, nga muna tantekeya tata naua. Kufumahano halili na kulutue muna mutantekeya na kumumona." ⁸ Filipu ua handekesele Yesu ngueni, "Muangana, tulekese Tata, kaha tukupuisamo kunahu." ⁹ Yesu ua muambele ngueni, "Kuntsimbu yakama njina kala nove hanga kaua njitantekeyeleni, Filipu? Uose ou nanjimono ange na mono na tata. Amba uandzo u kuamba nguove ,'Tulekese Tata'? ¹⁰ Kamua tsilielele ngecize ange njili muli Tata na Tata ali muliange? Mezi aa anjili na kuhandeka kulienu kanjesi na kuhandeka kuzingolo ziange ange ivene, vunoni Tata ali muli ange ikeye ali na kupanga. ¹¹ Nji tsilielenu ngecize ange njili muli Tata, n Tata muli ange, amba omo havilinga vivene. ¹² Cili, cili njikumileka, ou uose atsiliela muli ange aka panga vipanging ngue evi vinji na ku panga, Kaha akapanga via kama kuhiana evi muomu njikuya kuli Tata. ¹³ Nkala ciuma cimu kavundila muli zina liange, njiku cilinga mangana Tata vamu sangazialele muli muana. ¹⁴ Nga munji vundila nkala viuma mulizina liange, njiku cilinga. ¹⁵ Ngue muanjizanga, muku niunga masiko ange ¹⁶ Kaha njiku vundikila kuli TAta, kaha a kumihia ua kumi lembezieka ueka linga akalenenu matangua ose. ¹⁷ Ikeye muzimu ua vusunga. Lifuti kali kuhasa kumu tambula muomu kaliekuhasa kumumona amba kumu tantekeya. Vunoni enu muna mutantekeya, muomo ua tumama mui enu na kukala muli enu. ¹⁸ Kanji kumiseza lika lienu; Njikuiza naua kuli enu. ¹⁹ Muka ntsimbu kakandende lika lifuti kava kunjimona naua, vunoni enu mukunjimona. Muomu nja yoya, enu naua mukuyoya. ²⁰ Halitangua lize muku tantekeya ngecize ange njili muli Tata, kaha enu muli ange, kaha ange naua muli enu. ²¹ Ou ali na masiko ange naku aniunga ikeye vene ua njizanga, nou ua njizanga va kumuzanga kuli Tata, nange njikumuzanga na kulisolola kuli ikeye." ²² Yundasi (kati sakaliote) ua handekele kuli Yesu ngueni, "Muangana, muomu vika ukulisolola kuli etu vunoni kati ku lifuti?" ²³ Yesu ua kuanieneko na kuamba kuli ikeye ngueni, "Ngue umo uanjizanga, akuniunga mezi ange. Tata akumuzanga, entu tukuiza kuli ikeye na kutunga limbo lietu hamo neni. ²⁴ Ou kanji zangele keku niunga mezi ange. Mezi aa amueku ivua ka ekufuma kuli ange vunoni ekufuma kuli Tata uze uanji tumine. ²⁵ Njina handeka viuma evi kuli enu, omu nji cili kutumama nenu. ²⁶ Mukemuo vene, uze ua kumilembezieka- ikeye muzimu ua kulela ou yali katuma tata muliziana liange vinha handekele viose na kumi vuluisa viose vize vinja handekele nenu. ²⁷ Njinamisila ciyulo; Njina mihie ciyulo ciange. Kanji kumihiacio ngue omu lifuti lieku hana. Mitima yenu kati iliundze, kaha ua kati muivue vuoma. ²⁸ Mua vuile muze munjahandekele nenu, 'nguange njikuya, kaha naua njikuiza kuli enu.' Ngue mua njizangele, nga mu kuviukilila muomu njikuya kuli Tata, muomu tata na njihiana ange. ²⁹ Vunoni njinamileka ntsimbu kanda visoloka linga. omuo muvika soloka, mutsiliele. ³⁰ Kanji kuhandeka naua cikuma nenu, muomu mukua kuyula lifuti lino ali na kuiza. Kesi na zingolohali ange, ³¹ Vunoni mangana lifuti litantekeye ngecize njamuzanga tata, njeku linga ngue muze mua nji sikile Tata. Tukatukenu tuye tufume kuno."