^{1 2} "Cili, cili, nji ku mileka nguange, ou ka kovela ku mbelo ya limba lia va mpanga, kaha a londele kueka, uze yala ikeye muizi ikeye katsekue. Vunoni uze aku kuvelela ku mbelo ikeye kamungi ka vampanga. ³ Ka mukua ku munga lipito a mu aku va sokuelela kaha vampanga vevua lizi liani, kaha atumbula mazi a vampanga veni kaha a va tuala ha mbandza. ⁴ Omo na tuhula vose veni, ava tuamena, kaha vampanga va mu kavangeya, muomu va tantekeya lizi lieni. ⁵ Vunoni ka va ka kava ngendzi vunoni va mutina, muomu ka va tantekeya lizi ngeda." ⁶ Yesu ua va ambuluilile cisimo kuli vakevo, vunoni kava tanteyele viuma ovio via va zimbuilile. ⁷ Ngoco vene Yesu ua va lekele naua ngueni, "Cili, cili, nji ku mi leka, nguange yange cikolo cava vampanga. ⁸ Vose va livangele ku lutue luenge vakevo vezi na tutsekue, vunoni vampanga ka vava halakanene. ⁹ Yange cikolo, umosi a kovela muliange, kaha akovoka; kaha aka kovela naku tuhuka aka uana ku-ha ceni. ¹⁰ Muizi ke kuiza ngoco ku vanga kuiva na kutsiha na ku nongesa. Ange nji neza ngecize va kale na muono kaha va kale nauo ua uingi. ¹¹ Yange kaniungi ua cili. Kaniungi ua cili atula muono ueni omo vampanga. ¹² Ou a niungila fueto ikeye kati koniungi vampanga ni kati veni amona kangunga eza kaha aseza vampanga a tina, kaha kangunga ava kuata kaha ava sandula. ¹³ Atina muomu ikeye mukua fueto kaha ka leme vampanga. ¹⁴ Yange kaniungi ua cili, kaha nji tantekeya vange, na vange va nji tantekeya ange. ¹⁵ Ngecize tata anji tantekeya, nange nji mu tantekeya tata, kaha nji tula muono wange omo vampanga. ¹⁶ Kaha vampanga veka nji li navo vakevo kati va limba lino. Nja pande ku va neha naua. Kaha va kevua lizi liange kaha va kapua vutanga vumo lika na kaniungi umo lika. ¹⁷ Ngoco vene tata anji lema: Muomu nji tula muono ua linga nji utambule naua. ¹⁸ Na umo uahi a nji fumisauo, vunoni nji utula ange ivene. Nji li na ngolo ya ku utula kaha nji li na ngolo ya ku utambula naua. Lizi lia lisiko lino linja tambuile kuli tata." ¹⁹ Eci ku lipanga naua cisolokele naua mukati ka vayundeya muomu ya mezi. ²⁰ Kaha va vengi va ha kati kav va handekele nguavo, "Ali na ndemone na zaluka. Vikazo mu mu halakana?" ²¹ Veka nguavo, "Evi kati vihandeka via mukua ndemone kali kuasa kupangesa muntu. Ndemone a hasa ku imuna meso atupuputa ni?" ²² Kaha yakele tsimbu ya ciuano ca ku-lia ca kulelesa tembelemu Yelusalema. Cikele cicika. ²³ Kaha Yesu ua kele na kuendangana mu tembele ku cimbimbi ca Solomone. ²⁴ Ngoco vene va Yundeya va mu zingilikie va handekele neni nguavo, "Ntsimbu ingahi u ka tuseza na zimpata? Nga ove u Kilisitu, u ta leke mpundu." ²⁵ Yesu ua va kuaniene ngueni, "Nja milekele, nenu kamu tsiliela. Vilinga evi vinji linga mu lizina lia tata, vikevio vi nji ambulula vukalelio. ²⁶ Vunoni enu kamu tsiilela muomu enu kati mu vampanga vange. ²⁷ Vampanga vange vevua lizi liange; nange nji vezi, kahava nji kava ange. ²⁸ Kaha nji ka vahia muomu ka uekuhua ua ya-ye; kavaka nonga, kaha na umo uahi ahasa ku va tsakununa mu livoko liange. ²⁹ Kaha tata, ua nji lelevo, ikeye na liana vose, kaha na umo uahi a hasa ku va tsakununa mu livoko lia tata. ³⁰ Ange na tata tu napu umo lika." ³¹ Kaha va Yundeya va nonene mavuenaua mu ku muasa. ³² Yesu uava kuanene ngueni, "Vilinga via vingi via cili via kufuma kuli tata. Veya vapangele munjase mavie?" ³³ Va Yundeya va mu kuanene nguavo, "Katuku kuasela mavue cilinga ca cili, vunoni muomu ove, omo u muntu, u lipuisa mumo na Njambi." ³⁴ Yesu ua va kuaniene ngueni, "Kati va na soneka ku mezi valisiko enu ngecize, 'Nja handekele nguange, "Enu mu vanjambi"? ³⁵ Nga ikeye ua tumbuile vanjambi, vaze va tambuile lize lia Njambi ( Kaha visoneka kavi hasa kuga mu ngico), ³⁶ enu mumu amba ou Ise ya lelesele kaha ya tamine hano ha mavu 'Nguenu una sahula,'muomu nja handeka nguange, 'yange nji muana Njambi'? ³⁷ Nga ka nje ku linga vilinga via tata, kati mu nji tsiliale. ³⁸ Vunoni nga nji vi linga, vutuhu kamu nji tsiliela ange, tsilielenu vilinga vene linga mu tantekeye na ku ivua ngecize tata ali muli ange nange muli tata." ³⁹ Vesekele naua ku mu kuata, kaha ua sevunukile ku livoko liavo. ⁴⁰ Kaha ua ile naua mu sinia lia Yondau kuze vene kua kele Yoano na ku mumbuitika ha katete, kaha ua tumamene kuze. ⁴¹ Kaha vantu va vengi vezile kuli ikeye va handekele nguavo, "Yoano ka lingile citantekeyeso na cimo cahi, vunoni viose via handekele Yoano viou yala via kele via vusunga." ⁴² Kaha vantu va vengi va mu tsililielele kuze