¹ Ngecize vene, omo vanatu zingilika ku mbunga ei yakama ya va kaleho, tueciele viose viuma vize vineha kuvulumuna. Tutuntilenu kulutue lusi luze luva natu mbuila. ² Tuhala kanenu kuli Yesu, ikeye muka ku sangumuka na ku tantuluisa ku tsiliela cetu. Omu ha nzolela ize ivamuhele, ua mbatele cilindakano, kanguile ntsoni ya cio, kaha natumamene kulivoko lia cilio lia citumamo cia vungana vua Nzambi. ³ Ngecize singaniekenu ikeye, omu haku tambula kusaula ciose kufuma kuli va kua vipi na kuli tuika cio ivene, linga enu kati mukatale naku hola mumitima. ⁴ Kanda mu cimana amba kulua na inzi na kuheta ku maninga; ⁵ hamunasuvu kuhetula cize cineha kumi mamuna enu nguaha vana: "Enu kulizuzukila omo ami sungamesa. ⁶ Muomu Muangana ue kusungamesa uze yana leme, nakuhana kasitiku kuli uose muana yali kutambula." ⁷ Tambulenu kayando ngue kumizangamesa. Nzambi alinga nenu ngue vana. Muomu iya muana uze kavekuzangamesa kuli ise? ⁸ Vunoni ngue enu kavamilongesa, eci vene vana zuku ku vantu vose, kaha enu mupu vana vavupangala kati muvana veni. ⁹ Tuna kele naua nava tatetu kuvusitu vaze va kutulongesa kaha etu tua ku vahia kasingimiko. Kuhianesaho cietu cikufua vati cia kutamunukila vatatetu kucimbembesi na muono! ¹⁰ Va tatetu va kutu zangamesa katsimbu kaka ndende ngue kuvisinieka viavo muva muenene ngua cinapande. Vunoni Njambi atuzangamesa mukutu viukisa etu, linga tu hase ku zuka kukulela cieni. ¹¹ Kakuesi kuzangamesa kutsimbu ei ciku solola ngua ha nzolela, vunoni vivavala. Vuno ni kulutue cikaneha vusuka vuaci yulo cia ku sungama cia ava vavano longesele mucikecio. ¹² Ngecize kaniamesenu mavoko enu aana zenzala na vavuli enu akuniomua. ¹³ Sunga mesenu zinjila zia vi liato vienu, linga eci cili na vutondi kati citungunuke vunoni cikanguke. ¹⁴ Kavangeyenu ciyulo na vantu vose, na kulela, muomu nga cihi na umo uahi a kamona Muangana. ¹⁵ Zangamenu linga kati kukale umo a siminie likozi lia Njambi, kaha naua kati kumisoke umosi muzi ua kusasa na kuneha kupihia, linga vavengi kati va lizualese omo ukeuo, ¹⁶ amba mpano mukua kuli zualesa na vupangala amba vantu va vungo cio, vana lifu na Esau, oou hakulia cia lumo ua landesele vundala vueni. ¹⁷ Enu muna tantekeya ngecize kulutue, omo ua hiangele kutambula vivezikiso, vamuvianene mumu kakuakele naua tsimbu ya liohiela, vutuhu ua cilengeyele na masozi. ¹⁸ Muomu kamuezile kumuncinda uze uazila kukuata, muncinda uze uepuka tuhia, miziviliko, namihiato. ¹⁹ Kamuezi liza lihandieka vihande na vakakuvihalakana va tambelela nguavo kati kukale na ualizi likuavo liakuhandeka navo. ²⁰ Muomu kavahasele kutambula vize viose vivava siki: "Omu amba nga kasitu akundamako kumuncinda uze uanapande kumuasa mavue."Visoneka via ci Ngiliki vitumbula nguavio, a kasitu nga akuatako kumunchinda, va muase mavue amba kumuasa muvi. ²¹ Ca kuvuisa vuoma cimona eci ngecize Mosesa uahandekele ngueni, "Njinevu vuoma kaha njina lizazela." ²² Vunoni, enu muneza kumuncinda ua Siono nakunganda ya Njambi ua muono, Yelusalema ya muilu, na makulukazi a zi mbalaka zia vangelo munzolela. ²³ Muneza kulukungulukilo lua ntuatua, uze ivana soneka muilu. Muneza kuli Njambi, mukuaku sompela vose, na mizimu via va kuakusungama vaze vava vukisa. ²⁴ Muneza kuli Yesu, ou ali hakati kati nalisiko lia lihia, na kumaninga aze a avele. ²⁵ Monenu ngecize kati muviane ou a handeka. Muomu ngue kavahasele katinaomu va vianene uze ua va mamuna ua ku fuma muilu. ²⁶ Hatsimbu imo, lizi lieni lia ndendesele na kuhandeka ngueni, "Tsimbu imo lika ina salako kati mavu lika njikandendesa vunoni na melu naua?" ²⁷ Mezi aa, "Tsimbu imo ina salako,"cilumbununa kufumisako cia viuma vize vitava kundendesa, vikevio, viuma vize vivana tange, linga viuma vize kavitava kundendesa visaleho. ²⁸ Ngecize, ku tambula vuangana vuze kavu hasa kundendesa, tusatselenu na mu eci kuzumbangeya Njambi na ku kumoka. ²⁹ Muomu Njambi yetu ikeye tuhia va ku liana.