¹ Abantu ba lyendele ulwendo ukufuma ku Elimi, kabili ne kimasamasa kyonse ikya bena Isuleli balishile mu mpanta ya bubi, iyo ili pakachi na Elimi na Sinai, pakasuba akakulenga ikumi ne lya busanu mu mwenshi wa bubili panuma ya kufuma ku kyalo kya ku Ijipiti. ² Ikimasamasa kyonse ikya Isuleli ka baliliishanya kuli Mose na Aloni mu mpanta. ³ Aba Isuleli balilabile kuli bo, ''Kani nga twali abafwile ne kuboko kwiba Yawe mu kyalo kya Ijipiti ili twali kwikala apepi ne manongo ama nama kabili twalukulya ba shinkwa ne kwikuta. Pakuti mutulete fwebo muno mumpanta kuku twipaya ikimasamasa kyonse ne nsala.'' ⁴ Penka ba Yawe balabile kuli Mose, ''Nkaponya ba shinkwa ukufuma kwiulu mwebo. Abantu bakalukulya pesonde ne kubungisha ifyelelwe pali kenkako akasuba ukwebati nemo nkabeshe kani bakalu kwenda mwifunde nangu yowo. ⁵ Ifi fikalikuli pabushiku ubwa busanu na bumo, ukwebati bakalu kubungisha libili ukukula pafyo balukubungika akasuba aka kunuma, kabili bakalu kuteka ifyo bakalu kuleta.'' ⁶ Popele Mose naAloni balabile ku bantu bonse aba mu Isuleli, ''Mukyungulo mwakwishiba ati ni ba Yawe ba mifumya mwebo mukyalo kya Ijipiti. ⁷ Ulukelo mukabona ubuleme bwaba Yawe, pakuti ba umfwa ukulilishanya kwenu kubo. Mba fwebo nifwe bani pakuti mulilisanya kuli fwebo?'' ⁸ Mose naye alilabile ati, ''Mwakukishiba iki kani ba Lesa ba mipeleni inama mu kyungulo na shinkwa ulukelo mu bwingi - pakuti ba umfwa ukulilishanya uko mwalila kuli bo. Mba nifwe bani Aloni na nemo? Ukulilishanya kwenu tekwa kuti fwebo; kwakuli ba Yawe.'' ⁹ Mose alilabile kuli Aloni, ''Ati Labila ku kimasamasa kyonse ikya bantu ba mu Isuleli, 'Bweleni apepi na ba Yawe, pakuti ba umfwa ukulilishanya kwenu.''' ¹⁰ Ili kya fikile, ilyo Aloni alabile kukimasamasa kyonse ikya bantu ba mu Isuleli ati, baliloleshe ku mpanta,kabili, ne kumona, ubuleme bwa ba Yawe kabukumoneka mu makumbi. ¹¹ Penka ba Yawe balilabile ku Mose, ne kulabila ati, ¹² ''Nakumfwa ukulilishanya kya bantu ba mu Isuleli. Labila nabo ne ukulabila ati, 'ikyungulo mwa kulye inama, kabili ulukelo mukekushiwa ne shinkwa. Elyo mukeshiba ati ni ba Yawe ba Lesa wenu.''' ¹³ Ili kyafikile ikyungulo ifitentu fya likile ne kufimba pa nkambi. Ulukelo ikime kyalikete pankambi. ¹⁴ Ilyo ikime kyapwile, palya palubansa pa mpanta pali tufintu tunini utubulengene koti mabebe pa mushili. ¹⁵ Elyo abana ba Isuleli ba fimwene, bali lilabilishe umo ne mubyakwe ati, ''Nikindo iki?'' Tabakishibile ifi kyali. Mose alilabile kuli bo ati, ''Ni shinkwa uyo ba Yawe ba mipela ni mwebo ati mulye. ¹⁶ Ili efunde ba Yawe bapela: 'Mubungike mwe bonse, ubwingi ukulingane, fyo mukafwaya ukulya, Omele umo pa muntu onse pa mpendwa ya ba bantu benu. Ifi efyo mukalu kufibungika: Mukalu kubungika ifyelelwe ukulya umuntu onse uli mwitente lyenu.''' ¹⁷ Abantu ba mu Isuleli ba kitile ki. Bambi baliukubungike ifingi, na bambi balukubungika ifinini. ¹⁸ Pakufipima ne kipimo kya Omele, abo aba bungikile ifingi tabali ne fyashelepo, kabili na babo abalukubungika ifinini nabo tabalukubulisha. Umuntu onse alukubungika ifilingile ukubelelwa kuku fwaya kwabo. ¹⁹ Popele Mose alilabile kulibo ati, ''Tapali neli umo ukashapo ne kimo ukufika ulukelo.'' ²⁰ Nangaba, nifyo taba mumfwilile Mose. Bambi balishilepo fimbi ukufika ulukelo, lomba fyalukubola ne matila kabili ne kununka. Penka Mose alibafitilwe. ²¹ Balukubungika palukelo pa lukelo. Kila muntu alukubungika ifilingile ukulya pa kalya kasuba. Kani akasuba kakalipa, fyali kusunguluka. ²² Kyali fikile pa kasuba akabusanu na kamo balukubungisha libili ubwingi bwa shinkwa, ama Omeli abili pa muntu. Intangishi shonse isha mu kimasamasa balishile ne kumweba ifi Mose. ²³ Ali labile kulibo ati, ''Ifi efyalabila ba Yawe: 'Mailo kasuba ka bakindika, ashilile ake sabata muku bakindika ba Yawe mokye. Ifi mulukufwaya ukokya, kabili muteke ifi mulukufwaya ukuteka. Nafifyo ifyakushalapo mulibikile, fyo mwebene pakabeya ukufika ulukelo.''' ²⁴ Penka balifibikile pa kabeya ukufika ulukelo, koti nifi Mose aba kambish. Tafyabolele ne ukubamo amatila, muli fyo. ²⁵ Mose ali labile ati, ''Lyeni ifyo ifyakulya lelo, pakuti lelo kasuba akapelwa ake sabata mu ku lemya ba Yawe. Pakuti lelo tamwafisange mumpanga. ²⁶ Mukalukubungika munshiku shisanu na bumo, lomba ubushiku ubwa busanu na shibili li sabata. Pa sabata tapakalikuba mana.'' ²⁷ Ilyo kyafikile pa kasuba ka busanu na bubili ati bambi abantu balimine ne kuya mu bungisha mana, tabasangilepo neli imo. ²⁸ Popele ba Yawe balilabile kuli Mose ati, ''Mba mukalekalisa ukukana ukulama amafunde angi ne mishilo? ²⁹ Moneni, ba Yawe bamipeleni isabata. Pakasuba aka busanu na bumo balu kumipeleni shinkwa uwa nshiku shibili. Mwe bonse mulingile mulukwikele pantu penu; umuntu onse tekufuma pantu pakwe pakasuba ka busanu ne bubili.'' ³⁰ Popele fyo abantu balukutusha pakasuba aka busanu ne ka bubili. ³¹ Abantu ba Isuleli bali fitile ifya kulya filya ati'' mana.'' Fyali ifitubile koti ni mbuto, sha bwengo kabili ne shali kumfwikako ni shinkwa uwakubula imbisho uwa pangwa no buku. ³² Mose alilabile ati, ''Ifi efyo ba Yawe ba kambi: ''Sha mukasunge omeli uwamana kunkulo sha bantu benu ukwebati abana benu ba kamone shinkwa na milishishe mwebo mumpanta, panuma yaku mifumya mu kyalo kya Ijipiti.''' ³⁴ Mose alilabile kuli Aloni ati, ''Bula inongo ne kubikamo omeli uwamana' muli yo. Mukasunge pamensoaba Yawe ukusungilwa kunkulo sha bantu.'' ³³ Koti ba Yawe ifi ba mukambishe Mose, Aloni ali ibikile pakabeya ifunde lya kulayana mu mbokoshi yama funde. ³⁵ Abantu ba mu Isuleli balilile mana pa myaka amakumi ane ukufika ne lyo baishile mukwila mukya. Balilile ukufika nelyo ba ishile kumupaka wakyalo kya kanani. ³⁶ Lomba omeli kye kumi ikya efa.