¹ Ba Yawe kabalabila kuli Mose, ''Koya kuli Felo, pakuti nakosho mutima wakwe ne mitima sha ba bomfi bakwe. Nakite fi ukubalangisha ifi ifishibilo fya makosa angi mukachi kabo. ² Kabili nakite ukwebati mwenga babula abana benu ne benshikulu ifintu nakita, ifyo naba kalukila makosa abena Ijipiti, kabili nefi napene ifya kwishibilako ifipusene ifya makosa angi mukachi kabo. Muli iyi inshila mukeshiba ati ene Yawe.'' ³ Popele Mose na Aloni kabaya kuli Felo ne kulabila kuli ye, ''Ba Yawe, Ba Lesa wa ba Ebelo, balabile fi: 'Ninsa mpindi ukali kukano kuli kefya pa menso angi? Leka abantu bangi balukuya ukwebati benga tota nemo. ⁴ Lomba kani ukane ukubalekelako abantu bangi ukuya, kuchika, mailo ndukuleta batete mukyalo kyobe. ⁵ Bakafimbo mushilo onse ukwebati takulipo neli umo umuntu ukubono mushili. Bakali kulya ifikasha fyonse kufi kabutuke mfula ya mabwe. Kabili bakalye kichi kyonse ikyo ikikali kuli kumimenena mu malimi enu. ⁶ Bakesusha mañanda enu, na ababomfi benu, na ayo aabena Ijipita bonse - Ifintu fimo neli ni bawishimwe neli niba kapayenu taba babwenepo, tapalipo ikiba babwenepo ukufuma akasuba kalya bali pakyalo ukufika ne pakasuba ka lelo.'''Penka Mose kafumako ne kufumako kuli Felo. ⁷ Ababomfi bakwa Felo kabalabila kuliye, ''Mba niliinga uyu muntu akalikuli kyakukatasha kuli fwebo? Balekeni abena Isuleli baukuya ukwebati bakatote ba Yawe Lesa wabo. Tamulukwamuka ati Ijipita baluku yonaula?'' ⁸ Mose na Aloni kababaleta libili kuli Felo, uwa labile kulibo, ''Kamuya kutota ba Lesa wenu Yawe. Lomba ninsa bantu balukuta?'' ⁹ Mose kalabila, ''Twakuya ne banini besu ne bakote, besu ne bana besu abalalume ne banakashi. Twakuya ne matanga ne mbelele shesu, pakuti tukaba ne kusekelela ba Yawe.'' ¹⁰ Felo kalabila kulibo, ''Ba Yawe nga bekalilile na mwebo, ikyakine kani mileke mwebo mulukuya ne nkeke shenu. Boneni, muli ne malangulushi aabipile. ¹¹ Yowo! Kamuya, nabenka abalalume bali mukachi kenu, nekutota ba Yawe, pakuchi efi mulukufwaya.'' Popele Mose na Aloni kababa fumya mukyeni kyakwa felo. ¹² Penka ba Yawe kabalabila kuli Mose, ''Taniko kuboko kobe pakyalo kya Ijipita kuli ba tete, achi benga lukuke kyalo kya Ijipita ne kulye filimwa fyonse filimo ifyo fyonse, ifya shalapo ku mfula yamabwe.'' ¹³ Mose kataniko mukombo wakwe pa kyalo kya Ijipita, na ba Yawe kabalabila kabesha waku mutule suba kalya kasuba konse ne bushiku. Ili kyali kumakya, kabesha waku mutule suba waliletele ba tete. ¹⁴ Ba tete kabaya kupita monse mukyalo kya Ijipita ne kuli tuula monse mumpusha ya kyo. Koti ifita kyalipo koti ni uyo umuwa waba tete mu mpusha, kabili ikya kubefi takikabonekapo libili namuma yakiko. ¹⁵ Kaba fimbo mushili wa kyalo kyonse ukwebati kyalifichile. Kabalye filimwa fyonse mukyalo ne fisepo fyonseifya kufichi efi bashilepo ku mfula ya mabwe. Monse mukyalo kya Ijipita, tamwalipo ikilimwa kya mweo ikya shelepo, neli kichi kyonse neli kilimwa kya mumalimi. ¹⁶ Penkapo Felo bwangu kaita Mose na Aloni ne kulabila, ''Nabifya pamenso aba Yawe Lesa wenu na mwebo. ¹⁷ Lomba pano, mfitulukileni ukubifya kwangi ino mpindi, kabili tembeleni kuli ba Yawe Lesa wenu ati bafumyepo iyi mfwa pali nemo.'' ¹⁸ Popele Mose kafumako kuli felo nekuya kutembela kuli ba Yawe. ¹⁹ Ba Yawe kabaleta kabesha wa nkosa uwakumutule suba uyo uwa imishe ba tete bonse nekubatwala mukishiba kya matete; takwalipo neli kamo ka tete kashele monse mu mpusha ya Ijipiti. ²⁰ Lomba ba Yawe balikoseshe umutima wakwa Felo, kabili Felo tabalekele aba Isuleli ati balukuya. ²¹ Kabili ba Yawe kabalabila kuli Mose, ''Taniko kuboko kobe mwiulu, ukwebati pabe mfishi ponse pakyalo kya Ijipiti, imfinshi iyengomfwika.'' ²² Mose kataniko kuboko kwakwe mwiulu, kabili mwali mfinshi iyi chikeme monse mukyalo kya Ijipiti pa nshika shitatu. ²³ Tapalipo uwakubono mubyakwe umbi; takwalipo uwakushe ñanda yakwe pa nshiku shitatu. Lomba, bonse abena Isuleli bali ne kutuba mu mpusha mu bali. ²⁴ Felo kamwita Mose ne kulabila, ''Kamuya kutota ba Yawe. Ne fisolo fyobe fyengali kuya nobe, lomba imbelele shobe ne ñgombe filukushala kunama.'' ²⁵ Lomba Mose kalabila, ''Tusuminisheni ukuba ne lambu nefya kupana fya kokya ukwebati tufipane kuli ba Yawe ba Lesa wesu. ²⁶ Iñgombe shesu; nasho tuli kuya nasho neli libondo lyasho talinga shalapo kunuma, pakuchi tulukuya kushitwala mukutota ba Yawe Lesa wesu. Pakuchi tatwishi ni findo twinga totelelapo ba Yawe ukufika ne mpindi ya kufikilamo kulya.'' ²⁷ Lomba ba Yawe kabakosho mutima wakwe, Felo ne kubulo kubaleko kuya. ²⁸ Felo kabalabila kuli Mose, ''Kamuya fumeni kuli nemo! Kengeleni ku kintu kimo, ati tauka mbonapo libili nemo, pakuchi akasuba ukabone kilungi kyangi, ukafwa.'' ²⁹ Mose kalabila, ''Webo wenka walabila. Nemo nshakabonepo ikilungi kyobe libili.''