8 ¹ Balalu hi Saulus satuju hi Stefanus na wunu. Saulus Nyanrupuh Ungkup hang Yerusalem Hang handrian andrau, naan kahanangen isa hante hang ungkup Yerusalem, balalu here tubak maaru ati ma Yudea andri Samaria, kasuali kawan Rasul. ² Papire kaulun parisaya masar hi Stefanus hal yeru ngampi hanang atei sa bangat hante ma here. ³ Kude, hi Saulus bausaha nyanrupuh ungkup andri masuk ma lewu-lewu. Hanye ngaluar kawan upu andri wawei, balalu nampasuk here ma wuang panjara. Filipus ngabar Injil hang Samaria ⁴ Balalu, here sa haut tubak yeru bakaliling nelang ngabar Injil. ⁵ Hi Filipus minau ma Samaria nelang nampe khabar neu Kristus. ⁶ Balalu, ulun rama andri bulat atei narime inun sa na tahampe daya Filipus tawuk here nyandrengei andri kadinung tanna ajaib sa na ulahni. ⁷ Daya, roh-roh jahat kaluar teka ulun-ulun sa naasukni, nelang nantiak andri lengan isa mehet, andri hene ulun lumpuh nelang kepa na samare. ⁸ Daya yeru, naan kaarayen hang tumpuk yeru. ⁹ Kude, naan erang kaulun upu bangaran hi Simon sa kapihuani haut ngulah sihir hang tumpuk balalu ngulah katuluh ulun samaria manga, andri ngantuh tengani ulun bapangaruh. ¹⁰ Katuluh ulun, mulai teka ulun paling rumis hampe ulun paling hante, kaeyau,"ulun yiti hanyeru kuasa Alatalla sa naantuh bapangaruh." ¹¹ Balalu, here ngami pahatian ma hanye daya haut kairu lawah hanye haut ngulah here manga andri sihirni. ¹² Kude, udi ulun-ulun yeru parisaya ma hi Filipus sa ngabar Injil neu karajaan Alatalla andri ngaran Kristus Yesus, here na baptis, inun yeru upu atawa wawei. ¹³ Likan, hi Simon pada parisaya udi hanye na baptis, hanye eter riet hi Filipus, daya tawuk kadinung papire mujizat andri siri-siri sa ajaib sa haut na ulah, ngulah hanye manga. ¹⁴ Tawuk yeru, tawuk kawan rasul-rasul hang Yerusalem karengei ulun-ulun Samaria haut narime lengan Alatalla, here ngutus hi Petrus andri hi Yohanes ma ulun-ulun hang yaru, ¹⁵ isa hawi andri ilakudua ma here himpan here narime Roh Barasis. ¹⁶ Daya, Roh Barasis huan minau ma erang kaulunpun teka here, here ekat haut na apanrus hang wuang ngaran Tuhan Yesus. ¹⁷ Balalu, Petrus andri Yohanes nganak tanganni ma amau here balalu here narime Roh Brasis. ¹⁸ Tawuk hi Simon kadinung Roh Barasis na ami itah panumpangen tangan raul-rasul, hi Simon nawari duit ma rasul-rasul yeru, ¹⁹ andri kaeyau,"Anyu pada ma aku kuasa yena himpan katuluh ulun isa ma hanye aku manumpang tanganku sagar narime Roh Barasis." ²⁰ Kude, hi Petrus kaeyau ma hi Simon,"Mudahan duitnu yeru wawai/matei baya hanyu daya hanyu bapikir hanyu kaiyuh karunia Alatalla andri duit! ²¹ Hanyu puang uweng bahagian atawa hak hang wuang hal yena daya ateinu puang mawitu bujur hang hadapan Alatalla. ²² Jari, batobatleh teka kajahatennu yiti andri ilakudua ma Tuhan himpan, amun tau, aheng ateinu tau na ampuni ma hanyu. ²³ Daya, aku kadinung hanye yeru hanyu naan hang wuang atei isa puang maeh nelang lawu hang pikurun." ²⁴ kude, hi Simon nyangai dan kaeyau,"lakudualeh ma aku ma Tuhan himpan inun sa haut na eyaunu puang wuah aku." ²⁵ Balalu, udi hi Petrus andri hi Yohanes basaksi andri kapinu,u ni andri nampe lengan Tuhan, here mulek ma Yerusalem nelang ngabar Injil ma hene tumpuk ulun Samaria. Filipus Mambaptis Ulun Etiopia ²⁶ Udi yeru, malekat Tuhan bapaner ma hi Filipus, eyauni,"Amuan tulekleh ma Salatan, ma lalan isa minau ma Yerusalem nuju Gaza. Lalan yeru hanyeru lalan isa suni suwung." ²⁷ Hi Filipus balalu amuan palus tulak. Balalu, dinungni erang kaulun Etiopia, hanye yeru walah teka erang kaulun pajabat pangadilan Sri Kandake, Ratu karajaan Etiopia. Hanye panangung jawab ma katuluh harata Ratu ni. Hanye haut hawi ma Yerusalem lepuh sambayang, ²⁸ balalu rahat mulek mudi, nelang maharung hang wuang karetani andri mambasa kitab Nabi Yesaya. ²⁹ Balalu, Roh Barasis kaeyau ma hi Filipus,"Tulak leh bagabungleh andri kareta iru." ³⁰ Maka, hi Filipus nempat ma kareta iru balalu karengei ulun yeru rahat mambasa kitab Nabi Yesaya. Hi Filipus nunti ma hanye,"Inunkah tuan paham inun isa rahat tuan basa?" ³¹ Balalu, ulun iru nuing, "Kalaawe aku tau, kasuali naan erang kaulun sa ngarawah aku?" Balalu, hanye nerau hi Filipus himpan mamai balalu maharung baya hanye. ³² Tawuk yeru, kalaan teka Buku Barasis isa rahat na basani hanye yeru kalayiti, " Hanye na enei kala erang kaukui babiri ma unengan panyamalisan, andri kala erang kaukui anak babiri kapihuan nagunting wuluni muna sahampe hanye puang nguka wawa-Ni. ³³ Hang wuang kapikurun-Ni, kaadilan na rampas teka Hanye. Hiye isa kaiyuh nyarita katurunan-Ni? Daya, welum-Ni haut narampas teka tane." Yes. 53:7-8 ³⁴ Udi yeru, pagawai istana yeru nuing balalu kaeyau ma hi Filipus,"Aku ilaku ma hanyu, hiye nabi sa kaeyau neu yiti, neu tengani raerai atawa neu ulun langin?" ³⁵ Balalu, hi Filipus nguka wawani, andri mulai teka buku Barasis yiti, hanye bahutbah neu Yesus ma hanye. ³⁶ Andri, tawuk here tulak nelang masih hang lalan, here hampe unengan isa naan ranu, balalu pagawai iru kaeyau,"Tantau, naan ranu! Inun sa nahalang aku himpan naapanrus/baptis?" ³⁷ Balalu, hi Filipus kaeyau,"amun tuan parisaya andri sapenu atei tuan, tauleh."Balalu, hanye nuing andri kaeyau, "Aku parisaya hanye yeru Kristus Yesus hanyeru anak Alatalla." ³⁸ Kamulek, pagawai yeru nuyu kareta himpan tariye. Balalu, here barueh minau ma ranu, hi Filipus andri pagawai yeru, balalu hi Filipus mambaptis hanye. ³⁹ Udi here rueh kaluar teka ranu, Roh Tuhan ngenei hi Filipus tulak, pagawai yeru puang katantau hanye lagi, balalu nampalus pakiyaanni nelang arai mihewu. ⁴⁰ Kude, hi Filipus wauh daya hanye salenga haut naan hang Asdod, dan tawuk hanye mitah daerah yeru, hanye ngabar Injil ma katuluh tumpuk hampe hanye hampe hang Kaisarea.