¹ Jeeso nna zwiira haanze lye itempere cho kulyi yeendera. Varutwana vaakwe choku iiza kwaalyi nni va mutoondeza muzaako we itempere. ² Mmi choku ve itava kuti, ''Aasi mu vweene zoonse iizi zintu? Aaho nni mulwiirite, ka kwiina ivwe lyeeti nnilyi shaalye he iwulu lye lyimwe, lyi seeti nnilyi wiisikizwa haansi. ³ Mwaa vaati cho wu ikeere he iruundu lye ziteente, varutwana cho kuiiza kwaalyi mu chipirii, nni vati, tu lwiire, kuti zoonse iizi zintu kazi pangahalye lyiiri? Nne kuti chishupo cho kuiiza kwaako kachi ku veere inzi? Mane nne mamanimani e inkannda? ⁴ Mmi Jeeso choku ve itava cho kucho kuti, ''Mu tokomere kuti muntu zumwe saanzi naa mu cheengi. ⁵ Ka kuti vantu vaangi ka ve ize mu izina lyaangu. Nni vati, 'njoovo Kirisiti,' mmi mane kava sohe vaangi. ⁶ Mmi kamu zuwirire inkoondo mane nne mahulyuhulyu e inkoondo. Nni muvone kuti kamu katazehi, ka kuti zoonse iizi zintu zi lukeere kuiiza ku chitahala; mmi mamanimani keeti nni a ku sikite. ⁷ Ka kuti mishovo kayi lyi saandukire, nne muvuso nne muvuso ka wulyi saandukire. Ku zwaaho kaku kwiina inzala, nne matuku, ku nyanganya kwe inkaanda kuungi, mu zivaka zi saa swani. ⁸ Mmi zoonse iizi zintu lyiinu che mataangiro e zitavi zo kuhwizumuka. ⁹ Lyiinu njeeti nni va mu zwiisa kuti mu nyaandiswa, mane kava mu ihaye. Kamu toyeewa nne vaangi che ivaka lye iziina lyaangu. ¹⁰ Vaangi vantu lyiinu nji va keeza kuku kupeha, ku zwaaho choku taanga kuva kulyi wuza, mane hape ka kulyi toyeewa. ¹¹ Mmi vaporofita va mapa vaangi kava ve kwa teni mane kava sohe vantu vaangi. ¹² Ka kuti vuvilaala kavu ku veere vuungi, chisemo cha vantu vaangi kachi toontolye a hulu. ¹³ Mmi iiye yeeti nnaalyi koza mbwiita ku mamanimani yoo swana nnaaye njeeti nna hazwa. ¹⁴ Mmi uuwu mulaeza wo muvuso wo kuiiwulu kawu chumayirwa mu inkaanda yoonse kuva vupaki ku vantu voonse lyiinu mamanimani njeeti nni eeze. ¹⁵ Chini mwaa vona, kuti lyiinu chiintu chiina ikwe lyika lyeetete ku ku sinyeha, chi waambitwa nne muporofita Danyeere nni chi ziimeene hantu ha jolola (kwaalyi yoo vala, aa lyike ku lyemuha), ¹⁶ lyiinu mpaaho kwaavo veena mwa Judiya va ngombweere ku maruundu, ¹⁷ yo wiina ku iwulu lye inzuvo saanzi a suuki kuti a hiinde chimwe kuzwa mu inzuvo, ¹⁸ kamba kwaalyi iiye yo wiina ku luwa kuti aka voolyelye kuiiza ku hiinda chizwaato. ¹⁹ Kaku ku mayivite kwaavo veena tukeke, nne kwaavo va nyoonsa mwaawo mazuva! ²⁰ Mmi mu rapere kuti ku tiya kweenu saanzi nni kuvi ha malyiha kamba luzuva lwe Insavata: ²¹ Ka kuti kayi ku veere inako ya manyaando makaando a hulu muku kwiina kuti inkaanda chiinga yi vaati yiku pangwa kuiiza ku sika nne suunu vuti, ka kwiina, ka kwiini kuva vulyo mane keeti nni ku voolye kuve vulyo hape. ²² Ka kuti mbwiita aawo mazuva chini aa fwiiswa, Ka kwiina yeeti nnaa vaa hazwa. Mmi vulyo che ivaka lya vasalyitwa, aawo mazuva kaa fwiiswa. ²³ Chiingi lyiinu nnaangati muntu zumwi kaa kucho kuti, Vone we, Kirisiti zunu!' kamba, Kirisiti zuunaa!' saanzi u zumini. ²⁴ Ka kuti ka kuve nne va Kirisiti va mapa nne vaporofita va mapa mmi mane kava toondeze zishupo zikaando nne zikomokesa, cho vuungi vu chita kuti, mane chiku vaalyi ku woolyeka va woolye ku ziyeza, nne vasalyitwa. ²⁵ Muvone, china mulwiira piri inako nni yi seeni kusika. ²⁶ Chiingi lyiinu nnaangati kava mucho kuti, muvone wiina ku chikwa saanzi nni muyeendi kwa teni. Kamba, 'Muvone, wiina mu inzuvo yilyi wuungwiire kamba mu iriindi,' saanzi nni muzumini. ²⁷ Ka kuti siina mumini mu wu minika ku vuzwa izuva choku voneeka mane nne ku vuimino, voovo vuti nne kuiiza ko Mwaana wo Muntu mweeti nni kuve. ²⁸ Ka kuti koonse kwaa waanika chituunta, makuuvi nku a kungaana uuko. ²⁹ Ka kuti mu kuzwa vulyo mu manyaando aawo mazuva izuva kalyi siiswa, nne mweezi keeti nni wu ku minika che iseri lya teni, inkaani iizo ka ziwe ku iwulu, mane nne ziho ze iwulu kazi nyungooswa. ³⁰ Lyiinu njeeti nni ku voneeke chishupo cho Mwaana wo Muntu mu iwulu, mane njeeti lyiinu mishovo yoonse ya vantu ve inkaanda nni yi lyire. Ku zwaaho njeeti nni va vone mwaana wo muntu nna keeza cha makope e iwulu che ziho nne kuvereenga a hulu. ³¹ Mmi kaa tume mangiloyi aakwe cho mulyumo mukaando we intorombita, mmi kava kunganye hammwiina vaakwe vaalyi salyiire mu imbalyi zoonse ze inkaanda nne inhuho zoonse zoonne ze inkaanda. ³² Lyitute ituto mu isamu lye ikuzu. Ha kuti tutavi twa teni chitu huvaheere, mane choku taanga ku zwiisa makova, mu manina chimwe iziva kuti imbumbi chiyi injira. ³³ Lyiinu nnaanwe choku swana, chini mwaa vona zoonse iizi zintu nni mu izive kuti chi kwiina ha fwihi, mane ha mulyaango vulyo. ³⁴ Cho vusakusima nni mulwiirite, vantu ve yinu inako keeti nni va mane voonse kuiiza ze kusike zintu zoonse nde zi pangahalye. ³⁵ Iwulu nne inkaanda kazi hite, mmi manzwi aangu aawo keeti nni a hite. ³⁶ Mmi kuya che ilyo izuva nne inako ya teni ka kwiina muntu yo wiizi, ka kwiina, nnaangati magiloyi e iwulu, nnaangati Mwaana, mbwiita Taayo vulyo yee yeena. ³⁷ Mmi siina mu inako za Nuwa muku veena, mane nne kuiiza ko mwaana wo mukwaaame mweeti nni kuve. ³⁸ Ka kuti siina muku veena mu inako zo muunda chiwu seeni kuva va vaalyi kulyia nni vanywa, nni vasesa nni va lyi lyiwavira mu maseso, kuiiza kusika luzuva lwa Nuwa lwa a ve njiri mu iyareka, ³⁹ nni ve ikeere nni va se izi kuiiza kusika muunda chiinga weeza, choku va hiinda voonse vulyo-- lyiinu nne kuiiza ko Mwaana wo Muntu mweeti nni kuve mboona vo vulyo. ⁴⁰ Lyiinu vakwaame voovere ka va kwiina mu luwa--zumwe kaa hiindwa mmi zumwe kaa siyiiwa. ⁴¹ Vakulwaakazi voovere kava ku kweete ku twa ha twiirwa-- wu mwiina kaa hiindwa mmi wu mwiina kaa siyiiwa. ⁴² Chiingi mpaaho muikalye nni mulyiisiiza, ka kuti ka muiizi inako ya Simwiine yo kuiiza. ⁴³ Mmi mu iizive iichi, kuti kalyi infumwe we inzuvo o woola ku iziva kuti musa wa masiku u keeza lyiiri, ka a tokomera kuti mane inzuvo yaakwe saanzi nni yi pwachulwa. ⁴⁴ Choku swana, nnaanwe mu ikalye nni mulyi tukiseeze, ka kuti Mwaana wo Muntu ke ize che inako yimu saa lyivereere. ⁴⁵ Lyiinu paaho njeeni iiye muhikaana yoo sepahala mane nne yoo talyifite iiye infumwe waa vaa woolyi kumu siira itokomero mu muzi waakwe, kuti a woolye kuva ku haanga vamwe zilyio che inako yi swaneezi? ⁴⁶ Kwiina mikoonde uuzo muhikaana, yoo chita kuti infumwe chinaa sika nnaa mu wane koto u panga nenza cho mukwa nne mulawo. ⁴⁷ Aaho nni mulwiirite, kaa muhiinde choku mu chita muhitizi we inzuvo yaakwe nne ziviea zoonse zaakwe. ⁴⁸ Mmi lyiinu haiva uuzo muhikaana muviilaala ka alyi lwiire mu inkulo yaakwe kuti, simwiine waangu u ka lyiehete maaswe kuiiza,' ⁴⁹ mmi choku taanga nnaa dama vahikaana kunnine, mane nne kunywa nne vashaakolwa; ⁵⁰ Simwiine wo uzo muntu keeze che inako yaa saa mulyivereere chaayo, mane nne che inako yaalyi ziveere chaayo. ⁵¹ Infumwe kaa sike choku mupusula ha kati, choku mu valyira muva itimukanyi, kweeti nni ku kwiina ku boonda nne chilyiro che inkuunkuma.