¹ Mmi iichi nni chaa vula ku saangisa Joona mane nna manina chaa veenga. ² Lyiinu Joona nna rapera Ireeza nnaati, "Aah, Simwiine, iichi ka heena iicho chini vaati nnina chi waamba nni nni sii keena ku inkaanda yaangu? Chiingi iime nni vaa chitahaza lwe intaanzi mane choku lyika ku ngombweera kwa Tarashishi--ka kuti nni veezi kuti wu Ireeza yo wii zwiire chisemo nne inse, yoo lyieeha ku veenga, yo wii zwiire kusepahala, mane u ziimika ku saka ku panga vuvilaala. ³ Lyiinu hanu, Ireeza, nni ku kuumbiira, manisa vuhalo vwaangu, ka kuti kuni shiyameere kuti nni fwe kwaanda o kuhala." ⁴ Lyiinu Ireeza nnaati, "A u chita nenza kuti u ku veengete vuti?" ⁵ Ku zwaaho Joona choku zwiira haanze lyo muzi mane choku ke ikala ku imbalyi yo vuzwa izuva yo muzi. Kwa teni kooko uuko nna a lyi chitira chiteevulye choku ikala muchilyi nneena mumu nzuunde, nne ikalyiire ku vona kuti muzi muwu pangahalyirwa nzi. ⁶ Mmi lyiinu simwiine Ireeza choku vaakanya chivuna chaava kuza kuti chi zaambe Joona choku woola ku muchitira munzuunde he iwulu lyo mutwi waakwe muku muhulula muku katezeha kwaakwe. Mmi Joona nna a lyi tumera che ivaka lye iichi chivuna. ⁷ Vulyo Ireeza nna vaakanya isene kakusasaani mu izuva lyi ichirira. Mmi nni lyaa tasera chivuna mane chivuna nni chaa nyonyovala/ nyaana. ⁸ Mane nni kwa pangahala kuti izuva chinga lyaa tantumuka mu izuva lyi ichirira, Ireeza nna vaakanya luuho lu hiisha lo vuzwa izuva. Ku zwaaho, izuva nni lyaa hiisha a hulu Joona mu mutwi mane choku shaala chaa zuminina. Mmi iiye Joona nna manina cho ulyi fwiiza kufwa. Nna alyi cho kuti, "Kuni shiyameere nni nni fwiira kwaanda o kuti nni ku hala." ⁹ Ku zwaaho lyiinu Ireeza nna waamba nne Joona, "A mmi ku shiyeeme kuti uku vengeere chivuna kuka sika aaha?" Mmi Joona nnaacho kuti, Ee kuni shiyameere kuti nni veenge, mane nnaangati kuti nni fwe." ¹⁰ Ireeza nnaati, U zuwiriire chivuna inkulo vutuku, cho u sana u vaa teenderi, kamba mane nnandi kuchi kuza. Cha a kula mu masiku mane cho kufwa hape masiku. ¹¹ Mmi lyiinu cho kuya chaangu, vulyo nnaame aa keeti chini zuwira Ninive inkulo vutuku, wuna muzi mukaando vuti, wiina vantu va zaamba mwaanda nne makumi oovere ye miyaanda ya vantu mukati kaawo va seezi ku lyangana ha kati ke iyaanza lya malyo nni lya mamoonso, he iwulu lyaaho nne ingoombe ziingi a hulu?"