¹ Fa letsatsi la Sabata le sena go feta, Marea Magatalena, Marea mmaagwe Jakoba, le Salome, ba reka dinkgisa monate, go re ba ye go tshasa mmele wa ga Jeso.' ² Ya re mo mosong wa letsatsi la ntlha la beke, ba ya kwa lebitleng fa letsatsi le tlhaba. ³ Ba raana ba re, "Ke mang yo o tla re pitikololelang letlapa a le ntsha mo kgorong ya lebitla?" ⁴ Fa ba tsosa matlho, ba bona gore letlapa le tlositswe ka gore e ne e le letlapa le le golo. ⁵ Ba tsena mo lebitleng, mme ba bona mokawana yo o apereng diaparo tse ditshweu, a ntse fa thoko, mme ba gakgamala thata. ⁶ Mme a ba raya a re, "Se boifeng, le batla Jeso wa Nnasaretha, yo o neng a bapotswe? O tsogile!Ga a yo fa.Bonang fa ba neng ba mmeile teng. ⁷ Tsamayang le bolelele barutwa ba gagwe le Petere go re, o le eteletse pele go ya Galalea. Mme le tla a mmona koo jaaka a le boleletse. ⁸ Ba ne ba tswa fa lebitleng ba sia, ba roroma ebile ba gakgametse. Ba se ka ba bolelela ope ka ntlha ya letshogo. ⁹ E rile mo mosong wa letsatsi la ntlha la beke, fa a se na go tsoga, a iponatsa pele kwa go Marea Magatalena yo o neng go kobilwe matimona a le supa mo go ene. ¹⁰ Mme a tsamaya a ya go bolelela botlhe ba ba neng ba na nae,ba santse ba utlwile botlhoko ba lela. ¹¹ Ba ne ba utlwile go re o tsogile, e bile o mmonye, mme ba sa dumele. ¹² Morago ga mo, o ne a iponafatsa ka ponalo e nngwe mo go bangwe ba bone ba babedi, ba ba neng ba tsamaya mo nageng. ¹³ Mme ba ya go bolelela barutwa ba bangwe, ba seka ba ba dumela. ¹⁴ Morago Jeso a iponatsha mo go ba ba lesome le motso ba le mo tafoleng, mme a ba kgalemelela go tlhoka tumelo le bopeloethata jwa bone, ka gore ga ba a ka ba dumela ba ba mmoneng morago ga go tsoga mo baswing. ¹⁵ A ba raya a re, "Yang le lefatshe lotlhe le rerele lebopo lotlhe mafoko a a molemo, ¹⁶ Yo o dumelang, a bo a kolobediwa o tla bolokwa, yo o sa dumeleng o tla atlholwa. ¹⁷ Ditshupo tse di tla tsamaya le ba ba dumelang: ba tla lelekela ntle matimona ka leina la me. Ba tla a bua ka diteme tse disha. ¹⁸ Ba tla tsaya dinoga ka diatla tsa bone, mme fa ba a nwa sepe se se bolayang ga se kitla se ba utlwisa botlhoko ka gope. Ba tla a baya balwetse diatla mme ba tla a fola." ¹⁹ Fa Morena a sena go bua dilo tse le bone, a tlhatlosediwa kwa legodimong mme a nna ka fa letsogong le legolo la Modimo. ²⁰ Barutwa ba tsamaya ba rera gongwe-le-gongwe, Morena a dira le bone, a rurifatsa lefoko ka ditshupo tse di neng di tsamaya le bone.