¹ Ku va chitahalyi kuti lyimwi izuva, Jeeso cho kweete o ruta vantu mu isinagoge ne ku ruta manzwi a jolola, muperesita mokaando ne va ngolyi chi ku iza kwa lyi ne va kulwaana. ² Va va waambi, ni va mu cho kuti, ''Tulwiire kuti u chiita zinu ziintu che ziiho zi ka zwa kwaane? Naandi njeni ya va ku hi izi ziiho?'' ³ A va ve itave na va cho kuti, ''Naame mu ni mu vuuze. Mu ni lwiire che ⁴ ikoloveezo ya Johane. A e valyi ku zwa kwii wuulu nandi mu muntu?'' ⁵ Va valyi ku waambinsaana ha kati kaavo, ni vaati, ''Chi twa cho kuti, 'Kwii wulu,' mwa cho kuti, 'Lyinu chiinzi ha sana mwa zumina mwalyi?' ⁶ Mmi ha tu cho kuti, 'Mu muntu,' vantu voonse mu va tu govolye, cho kuti veezi kuti Johane muporofita.'' ⁷ Va vee itaave kuti ka vee izii kuti e ka zwa kuhii. ⁸ Jeeso na va cho kuti, ''Keeti ni mu lwiire kuti ni chiita izi ziintu che ziiho zaane.'' ⁹ Ava lwiire vaantu inu ingulyi, ''Mukwaame a va vyalyi iwa lyo muwoomba, cho ku walyima valyimi vo muwoomba, cho ku ya kwi imwi inkaanda chivaaka chilyee. ¹⁰ Che inaako iva veekitwa cho ku tuuma muhikaana ku vatokomeri ve iwa lyo muwoomba, kuti eeze ku kuhiinda zihantu zo muwoomba mu luwa. Mmi vatokomeeri vo muwoomba ni va mukaava, cho ku mu vooza na saa kweete chiintu. ¹¹ Haape naa tumina muhikaana zumwi naaye ni va ka mukaava, cho ku fwiisa insooni, cho ku mu vooza na saa kweete chiintu. ¹² Cho ku voola cho ku tuuma wo vuutatu naaye choku muhorofaaza, cho ku mu soohera haaze lyee iiwa. ¹³ Lyinu simwiine we iwa lyo muwoomba naati, 'Muni chiite voolye? Muni tuumine mwaanaswisu wangu u ni suuni. Mweendi mu va ka mukuteeke.' ¹⁴ Mmi va tokomeeri ve iwa chiinga va muvoona, cho ku taanga ku wambisaana mu kaati kaavo, ni vaati, 'Uuzu nje swaana. Tu mu ihaaye, kuti vuuswa ni vuve vweetu.' ¹⁵ Cho ku mu soohera haanze lye iwa lyo muwoomba, cho ku muihaaya. Lyiinu simwiine wee iwa lyo muwoomba kaava chiite vulye? ¹⁶ Keeze za siinya a va valyiime ve iwa lyo muwoomba, mmi cho ku ha vantu vaangi iwa lyo muwoomba.'' Chiinga va zuuwa vulyo, ni vaati, ''Ireeza kaanzi chiichitahalyi!'' ¹⁷ Mmi Jeeso naava loola, naati, ''Lyiinu lyiinzwi lyi taalusa nzii? 'Ivwee lyi va kaanwa ne va zaaki, lyi va chiitwa ivwee lya mawonderero'? ¹⁸ Zumwi no zumwi u wiira mwe lyiina ivwee ka kawuhane ha kati. Mmi u lyi wiira, ka pwachuuke.'' ¹⁹ Lyinu masikiriba ne va perisita va kulwaana cho ku zeeza ku mu viika maanza cheyeyo inaako, cho kuti va veezi kuti va va waambi inu ingulyi cho ku va kananisa. Mmi va veena lyoowa lya vantu. ²⁰ Ni va mu lolyeete neenza, cho ku tuuma vaatumwa valyi wuungwire va valyi ku lyihiinda kuti vashiyeeme, kuti va woolye ku waana mulaandu mu ku waamba kwaakwe, cho ku mu hitiiza ku mu vuuso neva hiitizi ve inkaanda. ²¹ Ni vaa mu vuuza, ni vaati, ''Muruti, twiizi kuuti u wamba cho ku ruuta neenza, maane ko chiiti che ivaaka lyee maziimo a vantu, mmi u ruta vuniiti che inziira yee Ireeza. ²² Aa mulaawo wuuti u swee tu ruwere miteero kwa Kaisara, naandi vuulye?'' ²³ Mmi Jeeso naa lyemuha maano aavonya, mmi naavacho kuti, ²⁴ ''Mu ni toondeza idenari. Ina mu chi swaano chaani ne kuti ina mu iziina lyaani?'' Ni vaati, ''Kaisara.'' ²⁵ Naa vacho kuti, ''Lyiinu mu hee Kaisara ziintu za Kaisara, mi muhee Ireeza, ziintu ze Ireeza.'' ²⁶ Ka heena va va lyi ku woola ku itaava chaa wamba ha vuusu vwa vantu. Ni va ziima a hoo niva komokeerwa ku itaava kwa a kwe ne ku seena chi va wamba. ²⁷ Vamwi va ma sedukai chiinga veeza kwaalyi, a voo vacho kuti ka kwiina ku vuuka kwa vafuu, ²⁸ ni va mu vuuza, ni vaati, ''Muruti, Mushe a va tu ngolyeeri kuti mukwaame yo sesete, ha fwa na seena mwaana, mwanchaakwe u swaneezi ku hiinda iraapa lya mukulwaakwe, kuti a woolye ku mu zaalyiza mwaana. ²⁹ Ku veena va kwaame va maana iyaanza ne minwe yo veere mmi wa kataanzi naa seesa mukulwakazi, cho ku fwaa naa seena mwaana, ³⁰ wo vu veeri nayee. ³¹ Wo vuutaatu cho ku mu seesa, cho ku chitahala chi swaana ku wa manimani naaye, cho ku fwaa na seena mwaana. ³² Ku zwaaho mukulwaakazi naaye cho ku fwaa. ³³ Mu ku vuuka kwa vafu, lyiinu uuzu mukulwaakazi ka a ve waani? Mu kuti voose vamanina eyanza ne to vere va musesete.'' ³⁴ Jeeso naava cho kuti, ''Vaana ve inu inkaanda va seesa, cho ku seeswa. ³⁵ Mmi aavo veeti ni va ku vweenwa kuti va swaaneere mweeyo inaako ka va woolye ku vuuswa mu ku vuuka kwa vafu keeti ni va seese maane keeti ni va seeswa. ³⁶ Mane keeti niva voolye ni va fwe, mu kuti va lyikaana ne mangiloyi mane ka ive vaana vee Ireeza, neelyi vaana va va vuuswa. ³⁷ Mu kuti va fwiire va va vuuswa, Mushe naaye a va vooni, mu chivaaka che chisaamu chi valyi ku hiiya, kwa vaalyi ku suumpa Simwiine Ireeza wa Aborahama ne Ireeza wa Isaka ne Ireeza wa Jakobo. ³⁸ Haanu ka heena Ireeza u va fwiire, mmi waavo va hala, mu kuti voonse va mu halyiira.'' ³⁹ Vamwi va ma sikiriba ni vee itaava, ''Muruti, we itaave neenza.'' ⁴⁰ Ka heena va va voolyi cho ku muvuuza imwi ipuuzo. ⁴¹ Jeeso naa va cho kuti, ''Va cho vulye kuti Kirisiti mwaana wa Dafita? ⁴² Mu kuti Dafita u wamba kuti mu Inglolo lya Dipaselema, Simwiine naa cho kuti kwa Simwiine wangu, 'Wiikalye ku iyaanza lyaangu lya malyo, ⁴³ mbwiita chi ni naa chiita va sa ku suni kuti va ve malyatiro ako.' ⁴⁴ Dafita ha va suumpiri Kirisiti 'Simwiine', lyiinu mwaana Dafita che ihi inziira?'' ⁴⁵ Mu ku teeka kwa vaantu voonse naa cho varutwaana naati, ⁴⁶ ''Mu tokoomere ma sikiriba, va saaka ku yeenda ni va zweete zizavalo zilyee, maane va saaka ku rumereswa kwiina he wuulu mwi inzira za ma wuzikizo, ne meekalo a va simwiine chi veena mu isinagoge, ne meekalo a va siimwiine chi veena mu mikiiti. ⁴⁷ Haape va sinyekeeza vakulwaakazi va va fwiirwa va mukaavo, ne ku rapeera itaapero zo kulyi nyeemuna zi sa hweeri ku mana. Izi keete ni zi taambulwa.''