¹ Munga labile kuti Mulungu apeleke cilango kwa bala ocita vakuzonda yeve. Koma mukalabila teti, ndiyekuti mulabila kuti Mulungu akupaseni cilango ndaba namwe mwankhala umoyo umozi na umozi. Mwecita vintu vabacita beve. ² Tuziba bwino ngako kuti Mulungu akuzoweluza naku pasa cilango moyenela ku banthu ocita viyipa. ³ Lomba mweo mulabila kuti Mulungu apase cilango bayakine ocita viyipa, ngankhale kuti namwe mucita viyipa, musaganize kuti mweo muzapulumuke Mulungu pati akayambe kupasa cilango. ⁴ Ndipo musalabile kuti, "Mulungu wanilola ndipo wanipasa, ndipo nuyenela lini kusintha nokuleka macimo yangu." Mufunika muzibe Kuti Mulungu okuyembekezani kuti mulape ku macimo yanu. ⁵ Koma mumalo mwake, ndaba nimwe anthota ndipo mukana kuleka kucimwa, Mulungu akamupeni cilango cosaneneka. Akacite teto pa nthawi yati akaoneshe kuti wakalipa ndipo oweluza banthu onse musasankha. ⁶ Mulungu akuzowejyela zake aliyense kulingana navecita, ⁷ Mwapadela, banthu bayakine opitilijya kucita vabwino, ndaba ofuna kuti Mulungu abanyamule, ndipo ofuna kunkhala moyo osasila na yeve. Mulungu akabape munjila yamene iyi. ⁸ Koma banthu bayakine ocita mwakaso ndipo okana kukhulupilila Mulungu cakulabila kuti nicacendi, ndipo ocita vinthu Mulungu vakulabila kuti niviyipa. Mulungu akuzokalipa ndipo akuzobapasa cilango cosaneneka. ⁹ Akuzolengesha aliyense alinacikhalidwe cocita viyipa kuti akazunzike naku nonkhala na mavuto yanyinji. Ici cikuzocitika kwa Ayuda okana kulandila uthenga wa Mulungu, ndaba Mulungu ebapasa mpata onkhala banthu bake bapadela, koma cikuzocitika soti na kwa asali- Ayuda. ¹⁰ Koma Mulungu akuzo thokoza, kuyamika, ndipo nopasa mtendele ku munthu wacikhalidwe cocita vabwino. Akuzocita teti kwa Ayuda ndaba ebasankha kunkhala banthu bake bapadela, koma akuzocitila soti na asali- Ayuda. ¹¹ Mulungu akuzocita teti mosasankha, ndaba oikakolini nzelu kuti uyu niwolemekezeka cotyani. ¹² Ngankhale kuti asali-Ayuda aliye malamulo Mulungu yepasa Mose ndipo ocimwa paliye lamulo, Mulungu akuzoleta cionongeko pa beve cosasila. Ndipo akuzopasa cilango Ayuda onse osamvilila lamulo yake, ndaba akuzoweluza kulingana na muyulabilila lamulo. ¹³ Ao bengokumvwatyala lamulo ya Mulungu ni osalungama pa meso ya Mulungu. Yayi, ni awo okonkha lamulo na kucita vuyulabila, niye bati bakankhale olungama patibakapaname pameso ya Mulungu. Ni awo tyala omvwila lamulo ya Mulungu niye bakupanga Mulungu kunkhala olungama. ¹⁴ Paliponse asali- Ayuda, amene baliye lamulo ya Mulungu, okonkha malamulo ayo ndaba eyamvwila kamba ka nyale ya cilengedwe, osimikijyila kuti bali na lamulo mukati mwao, ngankhale kuti baliye landile lamulo yepasa Mose Mulungu. ¹⁵ Oonesha kuti oziba mumaganizo yao Mulungu vakufuna mu lamulo yake, pakuti munthu aliyense mumalingalilo ozishusha yeka pa cikhalidwe ciyipa kapena ozilimbikisa muviyipa. ¹⁶ Mulungu akuzopeleka cilango pa nthawi yati akaweluze banthu kulingana na maganizo yao na zecita mwakabisila. Akuyoweluza banthu polamulila Kristu Yesu kuti aba weluze. Ici ndiye cunuujya banthu punulalikila uthenga wabwino kwa beve. ¹⁷ Lomba nili cinthu cokamba kwa aliyense unulembela ali mu Yuda: Mukhulupilile kuti Mulungu akupulumusheni ndaba mu ziba malamulo yepasa Mose. Muzitukumula kuti muli na Mulungu. ¹⁸ Muziba Mulungu vakufuna. Ndaba mwaphunzisiwa malamulo ya Mulungu, mukwanisha kuziba vinthu vabwino ni vini nosankha kuvicita. ¹⁹ Musimikijya kuti mukwanisha kuonehsa coonadi ca Mulungu ku asali- Ayuda, nakuti munga lamulile awo asaziba kantu pa Mulungu. ²⁰ Musimikijya kuti mungalamulile ao okhulupila vintu vopusa pa Mulungu na awo ali ngati tubana ndaba oziba lini kanthu kalikonse pa yeve. Musimikijya pa vonse ivi ndaba muli na lamulo yukuphunzisani zoona pa Mulungu. ²¹ Pakuti mulabila kuti muli na vintu vonse ivi kumbali yanu ndaba nimwe Ayuda, cumvwisha nyasi kuti mweo muphunzisa ayanu koma mweo mumvwila lini lamulo! Mweo mulalikila kuti bantu osati akoyiba vinthu , cumvwisha nyasi kuti mweo amene ndiye muyiba vinthu! ²² Mweo mu lamulila banthu kuti osalalana na munthu umulinaye lini mucikwati, cumvwisha nyasi kuti mucita cigololo mweo amene, Mweo mulamulila ayanu kusapembeza mafano, cumvwisha nyasi kuti muleka lini vinthu vucitisha nyasi. ²³ Mweo muzitukumula, nakuti, "Nili na malamulo ya Mulungu," cumvwisha nyasi kuti mweo mukonkha lini malamulo yamene ayo! Mwa ici munyoza Mulungu! ²⁴ Cili monga cabe malemba mwayotiujyila , "Kamba ka vinthu viyipa vumucita mweo Ayuda, asali- Ayuda olabila manyozo pa Mulungu." ²⁵ Aliyense wa mweo ecita mudulidwe kunesha kuti ali na Mulungu angapatepo kanthu ngati omvwila lamulo yepasa Mose. Koma ngati, munthu ecita mudulidwe , umvwila lini lamulo, Mulungu sazakutola pa meso yake kuti uli bwino kuposa ula aliye cite mudulidwe. ²⁶ Ici cutanthauza kuti Mulungu aone ngankhale asali- Ayuda akaliye cita mudulidwe kunkhala banthu bake ngati bangamvwile vinthu velamula mu malamulo yake. ²⁷ Aba banthu, aliye mudulidwe koma omvwila malamulo ya Mulungu baka labile kuti Mulungu niwa bwino pati akamupeni cilango, ndaba mweo mwecita mudulidwe koma mukaluphwanya lamulo. ²⁸ Nibalalini opeleka sembe kwa Mulungu kuti niye Ayuda bacendi, ndipo ni mudulidwe lini wapa thupi ulengesha kuti Mulungu abalandile. ²⁹ Mosiyana, seo tasinthika na Mulungu kufuma mkati ndiye Ayuda bacendi. Mulungu watilandila na Mzimu wake watisintha cilengedwe, osati ndaba tupeleka sembe zelamuliliwa mu lamulo. Ngankhale kuti banthu sibazatilemeka, Mulungu akatilemeke.