¹ Yesu na ophunzila bake pefwika ku Yerusalemu, nakuza ku Betefega, ku lupili ya Azitona, pamene apo Yesu etumijya ophunzila abili. ² Nakubaujya kuti, '' nkhoyani kumunzi uli pasogolo, pamene apo mukapeze bulu omangiwa, namwana wake pamozi. Mubamasule nowela nao kwa neo. ³ Munthu ati akalabile namwe kanthu mukamuujye kuti, 'Ambuye obafuna,' pamene apo munthu uyo akabatumjye.'' ⁴ Izi zecitika ktui zikakwanilishike zenenewa na mneneri kuti, ⁵ ''ujyani mwana wa mwannakazi wa Ziyoni, ona, mfumu yako ikuza kwa weo, yofasa nokwela pa bulu, napa mwana wa bulu panyamuliwa katundu.'' ⁶ Ophunzila bala eluta kocita mwelabilila Yesu. ⁷ Ewela naye bulu na mwana wake, beikapo vovwala vao, Yesu nonkhalapo. ⁸ Banyinji beyanzika nyula zao mnjila, nabake betenda mashasha ya vimiti nakuyanzika mnjila. ⁹ Ndipo benze pasogolo nanzo konkha pavuli benzokuwa, ''osana kwa mwana wa Davite!'' wolemekezeka ni wakuza mzina ya Ambuye! osana kululu! ¹⁰ Peloba mu Yerusalemu Yesu, mizinda tonse yegwendezeka, nolabila kuti, ''nibani uyu?'' ¹¹ Banthu anyinji beyankha, ''uyu ni Yesu mneneri wofumila ku Nazaleti ku Galileya. ¹² Yesu eloba mu chalichi. Nofumya kunja bonse enzogulisa nogula mchalichi, nogodobola ma thebulo ya osintha ndalama, na mipando ya ogulisa nkhunda. ¹³ Eciti kwa beve, ''celembewa, n'ganda yangu ikanenewe yopemphelelamo,' koma mweo mwaipanga mphako ya bankhanza.'' ¹⁴ Apo osalanga na olemala bewela kwa eve mkachisi ndipo ebapolesha. ¹⁵ Koma akulu ansembe na alembi pabeona vinthu viweme vecita eve, nakumvwa bana okuwa kuti, ''osana ku mwana wa Davite.'' Beciphya mtima ngako. ¹⁶ Beciti kwa eve, ''mukumvwa vakulabila?'' Yesu eciti kwa beve, inde! muliye belenge kuti mkamwa mwa bana onyonkha mwefotokozela zolemekeza? ¹⁷ Ndipo Yesu ebasiya efumako kumzinda kuya ku Betaniya nakolala kwamene uko. ¹⁸ Lomba m'mawa mwake pibewelelako ku mzinda, enze na njala. ¹⁹ Peona cimuti ca mkuyu mbali mwa mseu, eluta nopeza mwenzeve nkhuyu koma matepo beka. Eciti kwa cimuti, ''mukapezeke lini vipaso mwaa weo nthawi zonse,'' pamene apo cimuti ca mkuyu cefota. ²⁰ Peona ici ophunzila, bedabwa nonena kuti, ''cimuti ca mkuyu cafota tyani pameneapa?'' ²¹ Yesu eyankha kuti, ''zoona nulabila na mweo, ngati muli na cikhulupililo nakusa kaikila, mukacite lini tyala vacitika ku cimuti ici ca mkuyu, koma mukalibila na kulupili, nyamuliwa utaikile mnyanja,' ndipo zikaciteke. ²² Ciliconse cati mukasenge mu pemphelo, mokhulupilila mukalandile.'' ²³ Yesu pewela mchalichi, wansembe mkulene na akulu ba banthu ewela kwa eve penzophunzisa nakuti, mucita ivi na ulamulilo otyani, nibani ekupani ulamulilo uyu.'' ²⁴ Yesu eyankha nakuti, ''nikukosheni konsho imozi nane. Mukaniujya neo, nane nikuujyeni ulamulilo wanucitila ivi vinthu. ²⁵ Ubatizo wa Yohane - nikuni kwa ufumila? kululu kapena kubanthu?'' belabijyana beka-beka, kuti, ''tikanane kuti, ufuma kululu, eve anene kwa seo, 'nicinji camuliye mukhulupilile?' ²⁶ koma ngati tinene kuti, 'ufuma ku banthu,' tuyopa gulu, cifukwa onse otola Yohane kuba mneneri. ²⁷ ''Bemuyankha Yesu kuti, ''tuziba lini.'' Naye ebaujya kuti, nane nikuujyeni lini ulamulamulilo wanu citila vinthu ivi. ²⁸ Muganiza tyani? lidoda lenze nabana abili analume. Yeluta kwa oyamba nakulabila kuti, ''mwana wangu, nkhoya uka lime kumunda.'' ²⁹ ''Ndipo mnyamata eyankha nakuti, 'nilute lini,' koma pepita nthawi esintha maganizo nakuya. ³⁰ Lidoda leluta kwa mozi wake wacibili nakolabila cimozi - mozi. Eyankha kuti, 'nilute, baba' koma alye lute. ³¹ Nibani pa bana aba ecita venzofuna awisi wao?'' Beciti, ''woyamba.'' Yesu eciti, zoona nunena namweo, amisonkho nama hule baka lobe ufumu wa Mulungu mukaliye lobe mweo. ³² Pakuti Yohane ewela kwa mweo mnjila ya cilungamo, koma muliye mkhulupilile. Koma amisonkho na mahule bekhulupila eve. Koma mweo, olo kuti mweona ivi, muliye lape pavuli pake nakukhulupila eve. ³³ Mvwani mwambi uyakine. Kwenze lidoda linekazi la munda. Yecala munda wa mpesa noika mpanda kuzungulila, nokumba mokhamila mpesa, emanga nsanja, naku celekesha munda ku olima mpesa. Eve eluta ku calo ciyake. ³⁴ Payefwika nthawi yowejya vipaso, etuma ba nchito kuyotolako vipaso ku olima munda. ³⁵ Koma olima mpesa betola banchito bake, betola umozi kumnyata, muyake bemupaya, nakutema muyakene. ³⁶ Soti mwine kazi etuma banchito bayake, kupambana oyamba, koma olima munda becita cimozi - mozi. ³⁷ Kufuma apo, mwine wa munda etuma mwana wake, nakuti, bakamupe ulemu mwana wangu. ³⁸ Koma olima munda pebeona mwana, belabijyana beka - beka, 'uyu ndiye oloba m'malo. Welani tiyeni timpaye nakuti titole coloba.' ³⁹ Teto bemtola nakumtaya kunja kwa munda nakumupaya eve. ⁴⁰ Lomba akowela mwine wa munda, akacite tyani kwa bala olima munda?'' ⁴¹ Beciti kwa eve, ''akaononge bala madoda boononga mnjila yosausha ngako, nakupasa munda wake kuolima bayakene, madoda bati bakamupe gao yake yambeu pa nthawi yowejya.'' ⁴² Yesu elabila nao kuti, ''mubelenga lini m'malemba, ''mwala wekaniwa na omanga waba mwala wapa kona. Ici cefumila kwa Ambuye, ndipo nicokondwelesha m'menso mwasu? ⁴³ Moteto, nulabila na mweo, ufumu wa Mulungu ukofumyiwakwa mweo nopasiwa kwa mtundu uvyala vipaso. ⁴⁴ Aliyense oponela pa mwala uyu akafwaike. Koma aliyense oponelewa nao akafwaike. ⁴⁵ Pebecimvwa mwambi wake akulu ba nsembe na afalisi becimvwa kuti olabila za beve. ⁴⁶ Pofuna- funa kumukata benzoyopa gulu, cifukwa banthu bemtola kuba ngati mneneri.