¹ Zecitika pa Sabata imozi, peluta mu ng'anda ya m'mozi wa asogoleli ba afalisi kuyokulya buledi, ndipo benzomulangilila eve pafupi. ² Onani, pasogolo pake penze lidoda lenzovutika na matenda ovimba. ³ Yesu ekonsha oziba malamulo aciyuda na afalisi, "nicololewa kucilisha pa Sabata, olo yai? ⁴ Koma benkhala cete. Teto Yesu emkata, nompolesha, nakumtumizhya. ⁵ Eciti kwa eve, "nibani mwa mweo ali na mwana mwanalume olo bulu waponella mcisime pa siku ya sabata pamene apo angamcose lini panja?" ⁶ Baliye kwanishe kupeleka yankho ya vinthu ivi. ⁷ Yesu peona bala oitiwa ozisankhila mipando ya ulemu, elabila fanizo, nakuti kwa beve, ⁸ "Ngati mwaitiwa na muyakine ku madyelelo ya ukwati, musankhale pa mindo ya ulemu, cifukwa muyakine angaitiwe opasiwa ulemu ngako kupambana mweo. ⁹ Ngati munthu ekuitani monse mwabili wawela, angakuuzhyeni, 'mupaseni uyu munthu muyakine malo banu,' ndipo mwa nsoni mungapilizhye nakuyonkhala pa malo yosafunikila ngako. ¹⁰ Koma ngati waitiwa, nkhoya kankhale pansi pa malo yosaunikila ngako, koteto kuti wala wakuita akawela, angalabile kwa weo kuti, 'muyangu, nkhoya palulu.' Ndipo upasiwe ulemu pa menso pa onse onkhala pa thebulo na weo. ¹¹ Pakuti aliyense ozikweza akacepeshewe, na ozicepesha akaulishiwe." ¹² Yesu eciti soti ku lidoda lemuita, "ngati wakonza cakulya ca mzuba olo ca m'mazulo, usaite ayako olo anekwanu olo abululu bako olo wolemela wa pafupi na mweo, kuti na mweo bakakuiteni mkuwezhyela, ndipo ukankhale nayo mphaso ¹³ Koma ngati mucita madyelelo, itani osauka, olemala, opunduka, na aliye menso, ¹⁴ ndipo mukadalisike, cifukwa beve alye cokuwezhyelani mphaso. Pakuti mukawezhyelewe mu mkuuishiwa kwa olungama." ¹⁵ Umozi enzenkhala pa thebulo pamozi na Yesu pecimvwa ivi vinthu, eciti kwa eve, "Odalisika ni wala wati akalye buledi mu ufumu wa Mulungu!" ¹⁶ Koma Yesu eciti kwa eve, "munthu muyakine enkonza madyelelo yakulene nakuita anyinji. ¹⁷ Madyelelo piyenkonzewa, etuma wanchito wake kuyolabila ku bala beitiwa, 'welani, cifukwa lomba vonse vakonzewa.' ¹⁸ "Onse na mtima umozi beyamba kukana. Woyamba eciti kwa eve, 'nagua munda, nufunika nifume nikauone. Nupempa univomelezhye nisafwikeko.' ¹⁹ "Muyake eciti, nagula ng'ombe za pa joko zili faivi, ndipo nukuya koziyesa. Nupempha kuti univomelezye nisafwike.' ²⁰ "Ndipo lidoda liyakine leciti, 'nakwatila mwanakazi wangu, ndipo mwa ici ningawele lini.' ²¹ "Wanchito ewela nakuzouzhya abwana bake za ivi vinthu. Ndipo abwana ekalipa nakuti ku wanchito wao, fuma nkhoya mwamsanga m'miseu na mtunjila twa mumzinda nakuleta muno osauka, osalanga, opunduka, na olemala.' ²² "Wanchito eciti, 'Abwana, cumulamulila cacitika, koma malo asalako.' ²³ Abwana eciti ku wa wanchito, 'fuma nkhoya ku miseu na ku njila za ku minda ndipo ubakakamizhye kuti awele, kuti ng'anda yangu izule. ²⁴ Pakuiti nikuti kwa weo, paliye wa bala enzeitiwa wati alabeko madyelelo bangu." ²⁵ Lomba gulu inyinji yenzekuya na eve, ndipo ecungulka nakuti kwa beve, ²⁶ "ngati myakine akuza kwa neo na kusazonda awisi bake, anyina, mwanakazi wake, bana mkwao na mnekwao, nidpo na moyo wake eve, angankhale lini ophunzila wangu. ²⁷ Aliyense osanyamula mtanda wake nakuwela kuzonikonkha neo ankhale lini ohunzila wangu. ²⁸ Pakuti nibani mwa mweo akafuna kumanga nsanja onkhala lini pansi na kubelenga mtengo wake kuti aone ngati ali navo vakufuna kuti aisilizhye? ²⁹ Nadaba, akayamba kuika maziko bake na kusakwanisha kusilizhya, onse oiona angayambe kumuseka, nakuti, ³⁰ 'Ili lidoda leyamba kumanga ndipo ilye kwanishe kusilizhya.' ³¹ Olo mfumu yotyani, pakuya kuyo kumana na mfumu iyake ku nkhodo, sazankhala pansi coyamba na kutola mangizo kuti okowanisha na asilikali bali teni sauzande madoda kuyonyatana na mfumu iyakine ikuza kuzokumana naye na asilikali twenti sauzande madoda? ³² ngati nteto lini, gulu iyakine ya asilikali akali kutali, otumizhya wamthenga na kuyokonsha mwangacitile kuti pabe mtendele. ³³ Teto mwai ici, aliyense mwa mweo osasiya vonse vali navo ankhale lini ophunzila wangu. ³⁵ Munyu ni wabwino, koma ngati munyu wasukuluka, ungapangiwe tyani munyu soti? ³⁴ unkhala uliye nchito pa nthaka olo pa cungu. Utaiwa kunja. Eve ali na matu akumvwa, amvwe."