¹ Panthawi yamene iyo, banthu bayakine kwamene kwala emuujya za baku Galileya bepaya Pilato nosakanijya magazi bake na nsembe zao. ² Yesu enyankha eciti, ''muganiza kuti aba Agalileya enze ocimwa ngako kupambana Agalileya onse cifukwa enzunzika munjila iyi? ³ Yai, nukuujyani. Koma ngati mulapa lini, mukaonongekemonse munjila imozi. ⁴ olo bala banthu eitini amu Siloamu mwayepona sanja nobapaya, muganiza benze ocimwa ngako kupambana madoda ayakine amu Yerusalemu? ⁵ Yai, nunena. Koma ngati mulapa lini, mukaonongeke namwe monse. ⁶ Yesu ebaujya fanizo iyi, muyakine enze na cimuti ca mkuyu coliwa mumunda wa mpesa ndipo ewela kuzofuna cipaso koma epeza muliye. ⁷ Lidoda leciti kuolima munda, 'langa nizaka zitatu nuwera nakuyesa kufunopeza cipaso mwaici cimutu ca mkutyu koma nupeza muliye. Citende. Cifukwa kucilekela kuti cikoceneka conde? ⁸ Olima dima eyankha eciti, 'ulekeni caka cino ceka niukumbile mbali na kuthilamo manyuwa. ⁹ Ngati akabeleke cipaso caka cikuza, cabwino; koma ngati sukabeleka utendeni!'' ¹⁰ Lomba Yesu enzo phunzisha mu imozi mwa ma sunagoge siku la sabata. ¹¹ Onani, menze mwanakazi enze na mzimu wosobesha mphamvu kwa zaka eitini enze okhota nakusakwanisha kupanama monyolaka. ¹² Yesu pemuona, emuita eciti, ''mwanakazi, wamasuliwa kukusowa mphanvu kwako.'' ¹³ Enyolola manja bake pa eve, pamene apo enyoloka nolemeza Mulungu. ¹⁴ Koma olamulila mu sunagoge ebabiwa mtima cifukwa Yesu epolesha pa sabata. Teto olamula eyankha eciti kwa gulu ya banthu, '' Pali masiku sikisi yofanika kusebenza. Welani mukacilishiwe, osati pa siku ya sabata. ¹⁵ Ambuye emuyankha eciti, ''awenye teti pali mweo paliye ofumya ng'ombe olo bulu molyela kuitwala kuyo kumwa manzi pa sabata? ¹⁶ Teti nauyu mwana wa Abrahamu, emengiwa na satana zaka eitini zinyinji, sangamasuliwe pa siku la sabata? ¹⁷ Pekamba vinthu ivi, onse enzomususha ecita nsoni, koma gulu lonse lesekelela pa vinthu vonse vokomdwelesha vecitika. ¹⁸ Ndipo Yesu eciti, ''nanga ufumu wa Mulungu uli tyani, ningaulinganijye nacinji? ¹⁹ Uli monga ka sele ka mpiri kamene lidoda letola noponya mudima, nomela kunkhala cimuti, cikulene na nyoni za kululu zepanga visa mumisambo yake.'' ²⁰ Eciti soti, ''nicinji cininga linganijye na ufumu wa Mulungu? ²¹ ulingana na copasha buledi cetola mwanakazi noyavijya mu mipimo itatu ya fulaulo mpakana yekwanila fulaulo yonse.'' ²² Ndipo Yesu eciya nopita mumaboma na muminzi, kuphunzisha nopanga njira yake yakuya ku Yerusalemu. ²³ Muyakene eciti, ''Ambuye, nibanthu tyala atontho ati akapulumushiwe?'' ²⁴ Teto eciti, papatijyani kuloba paka mlyango katontho cifukwa, nulabila namweo, anyinji akaesesekuloa, koma sakakwanisha kuloba. ²⁵ Tyala mwine wananda akanyamuka nokhoma ciseko, mukapaname panja nogunda ciseko, nolabila, 'Ambuye, Ambuye, lekani tilobe.' ''Akayankhe nakukuujyani kuti, nukuzibani lini nakwamufumila kumo.'' ²⁶ Ndipo mukalabile, ''tecilya na kumwa pasogolo panu namwe mwenzo phunzisha mu miseu yasu.'' ²⁷ ''Koma akyankhe, 'nanena kwa mweo, nuziba lini kumucokela. fumani pali neo, mweoocita viipa. ²⁸ Kukabe kulila nokukuta meno pati mukaone Abramu, Isaki, Yakobe , na aneneri onse mu ufumu wa Mulungu, kooma mwataiwa kunja. ²⁹ Kukankhale ofumila kum'mawa, kum'mazulo, kum'mwela na kum'mpoto, nakunkhala pa thebulo mu ufumu Mulungu. ³⁰ Muzibe kuti ici, bala ofonikila posilijya akankhale koyambilila, nabala ofunikira ngako akabe kosijyila. ³¹ Papeta thanwi patontho, afalisi ayake ewera na kumuujya kuti, ''nkhoya ucokeko kuno ndaba Herode ofuna kukupaya. ³² Yesu eciti, ''nkhoya ukaujye nkhandwe ila, 'langa, nucosa vibanda nopolesha lero namailo, Pasiku la citatu nikakwashe cilingo cangu.' ³³ Muciliconse, nicofunikila kwangu kuti lero nipitilijye, mailo, namazo, cifukwa nicosaloleka kumneneri kuonongekera kunja kwa Yerusalemu. ³⁴ Yerusalemu, Yerusalemu, wopaya aneneri notema myala otumiwa kwako. Nikangati nefuma kusonkhanisha bana bako muyucitira nkhukuyuundatira bana bake mu phaphiko, koma uliye cifune. ³⁵ Ona, nanda yako yakaniwa. Nukamba namweo munione lini mpaka mukakambe kuti, 'Odalisika niwala akuza muzina la Ambuye.''