^{1 2} Lomba penze munthu zina lake Nikodimas, msogoleli wa Ayuda. Uyu munthu ewela kuli Yesu usiku nakuti kuli eve,'' Rabi, Tuziba kuti nimwe aphunzisi efumila kwa Mulungu, Pakuti munthu angacite izi zodabwisa tyala mpaka Mulungu ankhale naye.'' ^{3 4} Yesu emuyankha,'' Zoona, zoona tyala ngati munthu ebadwa soti, anga uone lini ufumu wa Mulungu.''Nikodemas eciti,'' Anga badwe tyani soti munthu mkulu? Anga lobe tyani soti kacibili m'mala mwa anyina, anga lobe?'' ^{5 6} Yesu eyankha kuti,'' Zoona zoona, tyala ngati munthu wabadwa ku manzi na nakumzimu, anga lobe lini mu ufumu wa Mulungu. Cala cobabadwa ku thupi ni thupi, cala cobadwa ku mzimu ni mzimu. ^{7 8} Osadabwa panikuti kuli mweo,' mufunika kubadwa soti.' Mphepo yukuntha kwayufunila; mukunvwa tyala kuti yukuntha, koma muziba lini kuyufumila kapena kwayukuya. Cimozi mozi na wala obadwa ku mzimu.'' ^{9 10 11} Nikodimas eyankha kuti,'' lomba zingacitike tyani?'' Yesu emuyankha kuti, Niwe ophunzisa wa Israele , koma unvweshesha lini ivi vinthu? Zoona, zoona nikuti kuli weo, tulabila vatuziba, tucitila umboni pali vetiona na menso. Koma soti mukhulupilila lini umboni. ^{12 13} Ngati nukuuzyani za ziko lapansi mukhulupilila lini, nanga mukhulupilile tyani nikamuuzyani zaku lulu, Paliye elutapo ku kululu tyala ula efumila kwamene- mwana wa munthu. ^{14 15} Cimozi mozi mose enyamula njoka msanga, mwana wa munthu naye anyamuliwe, kuti aliyense omukhulupilila akankhale na moyo osasila. ^{16 17 18} Pakuti Mulungu ekonda ziko yapansi kuti aliyense wati akamkhulupilile asakafwe koma akankhale nao moyo wamuyaya, Pakuti Mulungu aliyotume mwana wake kuzozuzula ziko lapansi, koma kuzopulumusha kupyolela mwa eve. okhulupilila mwa eve aliye cizuzulo, koma osakhulupilila niozuzuliwa kale pakuti aliyo khulupilile muzina la mwana wa Mulungu. ^{19 20 21} Ici ndiye cifukwa ca ciweluzo; nyale yawela mu ziko, koma banthu ekonda mdima kupambana nyale kamba ka zocitika zao ziipa. Pakuti aliyense okonda viipa ozonda nyale, angawele lini kuli nyale, kuti zocitika zao zisazibike. Kwa bala, ocita cilungamo akuza ku nyale kuti aonekele na zocitika zao mwa Mulungu.'' ^{22 23 24} Kufuma apo, Yesu na ophunzila bake eluta ku malo ya Yudea. Uko etayako nthawi pamozi na beve ebatiza. Yohane nae enzo batiza mu Aenoni pafupi na Salim kamba kakuti penze manzi anyinji. Banthu enzokuza kuli eve enzobatizika, Yohane enze akaliyo mangiwa kuti amutwale ku jere. ^{25 26} Peuka mkangano pakati ophunzila ba Yohane na ayuda pa mwambo wosamba. Eluta kuli Yohane eciti,'' Rabi, wamwenze nae kumbali iyakene ya mkolo wa Yolodani, kuli mweo ecitilako umboni, ona, obatiza, onse akuya kuli eve.'' ²⁷ Yohane eciti, munthu angalandile lini kanthu kalikonse tyala ngati kapasiwa kufuma kululu. ²⁸ Mweo amene munga citile umboni kuti neciti,'' Kuti nine lini Kristu,'' koma tyala, Netumiwa pasogolo pake pa eve.' ^{29 30} Mkwati niwake wa okwatila. Lomba muyake wa okwatila, opanama na akunvwa, okondwela ngako kamba ka mau ba okwatila. Ici, ndiye culeta kukondwela kokwanila. Ufunika kukula kuti neo nicepe. ^{31 32 33} Eve efuma kululu ali pa lulu pavonse. Eve wapa ziko lapansi ni wapa ziko lapansi soti olabila vapa ziko lapansi, Eve efuma kululu alipa lulu pavonse. Ocitila umboni pali veciona na vecinvwa, koma paliye munthu ovomela umboni wake. Eve elandila umboni esimikizyila kuti Mulungu ni wa zoona. ^{34 35 36} Eve etumiwa na Mulungu olabila mau a Mulungu. Opeleka lini mzimu ocito eselela. Atata konda mwana empasa vonse m'manja mwake. Eve okhulupilila mwa mwana alina umoyo wayaya, koma aliyense asakhulupilila mwa mwana sakauona umoyo, tyala ukali wa Mulungu.''