¹ Nagnantso reo aroa ambin'ny fôlo lahy Izy ary nagnamia zareo angôvo ndraiky fahefagna amin'ny reo masantôko jiaby aveo hampahivagna reo aretigny. ² Nalaifany zareo hitory ny fanjakan-Jagnahary ndraiky hampahivagna ny marary. ³ Nivaolagna Izy tamin-jareo: "Aza minday na ino na ino amin'ny dianareo—tsisy tongôzo, tsisy kitapom-batsy, tsisy môfo, tsisy vaola, avakeo tsisy ankanjo fagnampiny. ⁴ Zay tragno idiranareo, dia mijanona akao mandra-pialanareo. ⁵ Na aiza na aiza tsy handraisan-jareo areo, koafa miala zany tanàgna zany areo, dia hintsagno hiala amin'ny hongotro areo ny jôfo mbô ho fitsanganagna antomoa anohairagna zareo." ⁶ Avakeo dia lôsogno zareo ary namakivaky tanàgna, nitory ny vava maharavo ndraiky nagnasitragna tagny jiaby tagny. ¹² Aveo koafa hoaligny andro, dia nagnatogno Azy reo aroa ambin'ny fôlo kay nivaolagna nagnanjao: "Alifaso andaiha reo vahoaka mbô afahan-jareo mandaiha akagny amin'ny reo tanàgna magnodidigny ndraiky ambanivôhotro mbô hahita fatoriagna ndraiky hanigny, satria aty amin'ny tany foagna atsika." ¹³ Fao hoizy tamin-jareo: "Amianareo raha hoanigny zareo." Ary nivaolagna reo: "Tsy managna mihoatra noho ny môfo dimy ndraiky hazandrano aroa zahay—raha tsy hoe mandaiha zahay aveo mividy hanigny hoan'ny reo ôlogno jiaby reo." ¹⁴ (Teo dia nisy teo amin'ny lalahy dimy arivo teo ho eo.) Ary nivaolagna tamin'ny reo mpianany Izy: Ampatairo ho vôndrogno dimam-pôlo isan-jareo." ¹⁵ Kay nagnano zany zareo, aveo nampantotry reo vahoaka. ¹⁶ Nalaka reo môfo dimy ndraiky hazandrano aroa, dia niandra langitry Izy, nisaotra reo aveo nizarazaraigny, kay namiagna reo mpianatra zany mbô ho tolaoragna reo vahoaka. ¹⁷ Nihinagna izy jiaby kay afa-pô, aveo nafômpogno reo tavaila tsy lany kay nisy potipotiny arao ambin'ny fôlo harogno. ¹⁸ Ary koafa nivavaka manaokagna Jesosy, dia niaraka taminazy reo mpianatra, Dia nagnontany zareo Izy, nagnano agnanjao: ''Volagnin'ny vahoaka ho zôvy moa Zaho?" ¹⁹ Namaly zareo: "Jaona mpagnano batisa. Fao reo sasany nivaolagna hoe Elia, aveo reo sasany mivaolagna fao nitsangagna tamin'ny maty ny araiky tamin'ny reo mpagnazary fahigny." ²³ Ary hoy Izy tamin-jareo jiaby: "Raha misy te hagnaraka Zaho, dia tsy maintsy mandà ny haigniny izy aveo mitondra kakazo fijaliany isan'andro ary magnaraka Zaho. ²⁴ Na zôvy na zôvy tehagnavotro haigniny dia hagnary azy, fao na zôvy na zôvy magnary haigniny nohony fitiavagna Zaho dia hagnavotro azy. ²⁵ Ino no tsara azon'ny ôlogno amin'ny fanagnagna izo tontolo zao, kanaifa magnary na mamotiky haigniny? ²⁸ Ary valo andro teo ho eo tafaran'ny nivolagnan'i Jesôsy reo koragna reo, dia niaraka taminy Petera ndraiky Jaona aveo Jakoba kay nakatra tanety hivavaka. ²⁹ Raha nivavaka igny Izy, dia niaova ny bikany tarehiny, aveo nivadiky fôtsy mangilangilatra ny lambany. ³² Avakeo Petera ndraiky reo zay niaraka taminazy dia nivisarin'ny tôromaso, fao koafa taigna taitry tantairaka zareo, dia nahita vogninahiny ndraiky reo lalahy aroa zay nitsangagna niaraka taminazy. ³³ Ary koafa niala nagnalavitry Jesôsy zareo, dia hoizy Petera taminazy: "Tompo, tsara amintsika ny mijanogno aketo. Ambilao zahay hagnamboatra fialaofagna telo, araiky nihinao, araiky nihin'i Mosesy, avakeo ny araiky nihin'i Elia." (Tsy hainy zay nivolagniny.) ³⁴ Teo ampivolagnagna zany izy, dia nisy zavogno tonga nanarogno zareo, kay ambory zareo koafa niditry tao amin'ny lehy zavogno. ³⁵ Nisy feo niboaka avy tagny amin'ny lehy zavogno nagnanjao: "Tô no Zanaka lahiko, lehy Araiky zay voafidy; tandrignaiso Izy." ³⁶ Koafa nivaolagna lehy feo, dia Jesôsy zeraiky no hita teo. Nitagna ny fahanginany zareo tsy nivaolagna tamin-jôvy na zôvy tamin'ny zany andro zany ny mahakasiky zay jiaby hitan-jareo. ⁴³ Ary aviteo dia sondriagna jiaby izy jiaby nahita ny hagidasan-Jagnahary. Raha gaga tamin'ny raha jiaby nitsabony igny zareo, dia hoizy Izy tamin'ny mpianany nagnanjao: ⁴⁴ "Ambilao reto koragna reto ho tonga laligny ao an-tsôfigny areo: ny Zanak'Ôlogno dia ho vadihagna ho eo an-tagnan'ôlogno." ⁴⁵ Fao tsy azon-jareo zany fagnambaragna zany. Zany dia navôny tamin-jareo, noho zany dia tsy azon-jareo ny dikan'ny zany, aveo mbôla natahotro zareo ny hagnontany mahakasiky zany fagnambaragna zany. ⁴⁶ Ary avakeo nisy malomalo nanomboko teo amin-jareo ny amin'ny zay ho taigna gaida aminjareo. ⁴⁷ Fao Jesôsy, nahay ny fihevitry tagny am-pônjareo, dia nangala zaza hely araiky kay nadôkony tankilany ⁴⁸ aveo nivaolagna tamin-jareo nagnanjao: "Fao na zôvy mandray tô zaza tô amin'ny agnarako, dia mandray Zaho; ary na zôvy na zôvy mandray Zaho, dia mandray lehy Araiky zay nagniraka Zaho. Fao zay taigna hely aminareo jiaby no gaida." ⁴⁹ Jaona namaly: "Tompo ô, nahita ôlogno araiky zahay nangala masantôko tamin'ny agnaragnao dia nisakananay izy, satria izy tsy magnara-dia miaraka aminay." ⁵⁰ "Aza raràgna izy," Hoizy Jesôsy, "satria zay tsy manohitry areo dia momba areo." ⁵¹ Koafa narikitry ny andro ampiakaragna Azy, dia niatriky hoagny Jerosalema Izy. ⁵² Nandaifa mpitondra hafatra Izy hialaoha Azy, aveo nandaiha zareo kay niditry tao amin'ny tanàgna Samaritana araiky mbô hagnomagna ny raha jiaby ho Azy. ⁵³ Fao ny vahoaka tao tsy nandray Azy, satria nitodiky hoagny Jerosalema Izy. ⁵⁴ Koafa nahita zany Jakoba ndraiky Jaona mpianatra, dia hoizy zareo: "Tompoko, tianao moa zahay raha handaifa môtro milatsaka avy agny an-dangitry mbô hamotiky zareo?" ⁵⁵ Fao nitodiky Izy aveo nivaolagna mafy tamin-jareo, ⁵⁶ ary lôsogno tagny amin'ny tanàgna hafa zareo. ⁵⁹ Ary hoizy Izy taminazy: "Magnaraha Zaho." Fao hoizy nagnanjao: "Tompoko, ambilao zaho alaoha andaiha handevigny iadako." ⁶⁰ Fa hoizy Izy taminazy: "Ambilao ny maty handevigny ny maty ao aminazy. Fao anao, mandihiana kay mitoria agny lavitry akagny aveo gidaso ny fanjakan-Jagnahary." ⁶¹ Ary nisy hafa nagnanjao: "Hagnaraka Anao zaho, Tompo, fao ambilao zaho alaoha hitsabo veloma reo agny an-tragno." ⁶² Jesôsy namaly azy nagnanjao: "Tsisy ôlogno mitàgna angady aveo mitodiky kay magnaiva ho amin'ny fanjakan-Jagnahary."