¹ Paoly, apostolin'i Kristy Jesôsy tamin'ny alalagna sitrapôn-Jagnahary, araka ny fampagnantainan'ny fiainagna zay akao amin'i Kristy Jesôsy, ² hoan'i Timoty, zanaka tiagna: Fahasoavagna, fiantragna, avakeo fiadanagna avy amin-Jagnahary lehy Iada ndraiky Kristy Jesôsy Tompontsika. ³ Misaotra Zagnahary zaho, zay vavahako avy amin'ny reo razambenaha, miaraka amin'ny feon'ny fieritrieraitagna madio, karaha hatsaroavako anao lalan-dava amin'ny fivavahagnanaha andro aman'aligny. ⁴ Karaha ny hatsaroavako reo ranomasonao, magniry mafy ny hizaha anao zaho, kay mety ho feno haravoagna zaho. ⁵ Nampitsaroavigny taminaha ny fankatoavagnao marigny, zay niaigny somoilany tamin'ny ninibenao Loisa ndraiky ny nininao Eonisa, avakeo resy lahatra zaho ze io fao miaigny akao aminao koa zany. ⁶ Zany no dikany ampahatsaraovako anao mbô hampiasanao ndraiky ny fagnampian-Jagnahary akao aminao amin'ny alalan'ny famitrahako tagnagna. ⁷ Foa Zagnahary tsy nagnamia fagnahin'ny amboriagna atsika, fao ny ngôvo ndraiky fitiavagna avakeo fifihaizan-taigna. ⁸ Kay aza maignatra amin'ny fitsanganagna tomoa momban'ny Tompontsika, na aminaha, Paoly, lehy gadrany. Fao naifa, mirasà amin'ny fahoriagna ny vava maharavoravo araka ny ngôvon-Jagnahary. ⁹ Fao Zagnahary no nagnavotro atsika ndraiky nagnantso atsika tamin'ny ansto masigny. Nagnano zany Izy, tsy noho reo asantsika, fao nohon'ny drafitry zay afa natany ndraiky ny fahasoavagnanazy. Na dia mbôla tsy nantomboko aby ny fotoagna dia afa nagnamia atsika regny raha regny tao amin'i Kristy Jesôsy Izy. ¹⁰ Fao avaizo ny fagnavaotan-Jagnahary dia nambara tamin'ny alalan'ny fiboahan'ny Jasôsy Mpagnavotro atsika. Kristy zay nagnafoagna ny fahafataisagna avakeo ninday fiainagna zay tsy ho tapitry bariky dintany mbô hagnazava amin'ny alalan'ny vava maharavoravo. ¹¹ Noho zany, dia voatôndro ho mpitory teny zaho, ho apostoly, avakeo ho mpagnanatra. [Fagnamarihagna: Reo dikan-tsaoratra talaoha sasany dia magnampy zao: ''Ho an'ny Jentilisa.'' ¹² Fao noho zany antony zany dia mijaly amin'ny regny raha regny koa zaho. Fao tsy maignatra zaho, satria haiky Izy lehy ninoako. Resy lahatra zaho fao afaka mitagna zay afa nankigniky taminazy Izy papiky tonga zany andro zany. ¹³ Tano ny aohatra mahakasiky reo hafatra ny fankatoavagna zay regninreo taminaha, miaraka amin'ny fankatoavagna ndraiky fitiavagna zay akao amin'i Kristy Jesôsy. ¹⁴ Ny raha tsara zay nitsabon-Jagnahary taminao, iambaiso amin'ny alalan'ny Fagnahy Masigny zany, zay miaigny akao amintsika. ¹⁵ Hainareo zany, fao ragha jiaby zay nipaitraka tagny Azia dia nivadiky taminaha. Akao amin'io fikambanagna io reo Fizelio ndraiky reo Hermozena. ¹⁶ Ano raha Tômpo hagnamia famindram-pô amin'ny tokantragnon'i Onesiforo, satria namelombelogno zaho mazagna izy avakeo tsy maignatra tamin'ny gadranaha. ¹⁷ Fao naifa, koafa tagny Roma izy, dia nizaha zaho mafy, kay hitany zaho. ¹⁸ Ny Tompo hagnabolaigny azy kay hahitany famindram-pô avy aminazy amin'ny zany andro zany. Reo faomba jiaby nagnampiany zaho tao Efesosy, dia hainareo tsara.