¹ Izikoa fa nidotro baka tamin'ny bongo i Jesosy, nagnaraka izy irô vahoaka maro aby io. ² Igny fa nisy olo boka araiky nagnantôgno Izy aviô nitsaoka tàlohanany, nagnano hoe: "Tompo, izikoa mba sitrakanao, asà mba afaka magnadio zaha anao." ³ Namavatra tagnany i Jesosy aviô nikasiky izy, nagnano hoe: "Sitrako. Midiovà." Tiô ny iô nadio tamin'ny fahabokany izy. ⁴ Nambaran'i Jesosy taminany: "Aoka anao tsy hivolagna na ino na ino na amin'jôvy na amin'jôvy. Mandianà amin'ny lalagnanao, kay ambohà amin'ny mpisorôgno tegnanao aviô amaiza fagnatitra karaha nandidian'i Mosesy, mba hifijoroagna vavolombelogno amindrô." ⁵ Izkoa fa niditry tao Kaopernaomy i Jesosy, kay nagnantogno Izy kapitainy araiky aviô nagnontany Izy, ⁶ nagnano hoe: "Tompo, mandry ao an-tragno mpanompoko fa malemy aviô ao agnantin'ny fagnantaitaignana mafy." ⁷ Nambara'i Jesosy taminany hoe: "Hoavy zaha aviô hagnajanga izy." ⁸ Namaly i kapitainy aviô nagnano hoe: "Tompo, tsy mendriky zaha tokony hidiranao ambany tafon-tragnonaka, mivôlagna fo anao amin'ny vôlagna igny fa directy janga mpanomponaka. ⁹ Fa zaha ndraiky koa lelahy zay ambany fahefagna aviô, aviô zaha managna miaramila feheziko Koa. Zaha ziô nivôlagna amin'ny araiky hoe: 'Mandihana,' directy fa mandaiha edy Izy, aviô amin'araiky hafa koa: 'Avia,' directy fa nagnantôgno edy koa izy, aviô amin'ny mpanompoko hoe: "Ataova izegny, Kay ataony koa." ¹⁰ Izikoa fa regnin'i Jesosy izegny, gaga Izy aviô nivôlagna tamin'ndrô zay nagnaraka Izy: "Ambarako marigny aminarô, fa tsy mbola nahita olo nanam-pinoagna karaha izegny Zaha teto Israely. ¹¹ Ambarako anarô, fa maro ny baka agny atsignanagna ndraiky baka agny andrefagna ho avy, aviô irô igny hipaitraka amin'ny latabatra miaraka amin'i Abrahama, Isaka aviô Jakoba, lera agny amin'ny fanjakan'ny lagnitry. ¹² Fa irô zanaka ny fanjakana hatsipy agny abadikin'ny aizigny lavitra be agny, zay hisy fitomaniagna ndraiky fikitrohanify.'' ¹³ Nambaran'i Jesosy tamin'ny kapitainy hoe: "Mandiana! Araka ninoanao, kay aoka izegny hatao hoanao." Aviô janga tamin'ny fotoagna zegny koa lay mpanompo. ¹⁴ Lairaka i Jesosy niditry tamin'ny tragnon'i Petera, kay nahita rafozam-bavin'i Petera nandry salakady nararin'ny tazo. ¹⁵ Nikasan'i Jesosy tagnanany, aviô niala taminany directy tazo igny. Kay nitsangana izy aviô nanomboko nagnamia hanigny Izy. ¹⁶ Lairaka tamin'ny andra hariva, maro irô nofehezin'ny demony ndraiky nandesin'olo tamin'i Jesosy tiô. Nandroaka irô fagnahy tamin'ny vôlagna Izy aviô nagnajanga irô jiaby narary igny. ¹⁷ Kay karaha zegny nahatantairaka zaka nambaran'i Isaia mpaminany, nagnano hoe: "Izy tegnany nangala faharariantsika ndraiky hitôndra irô aretintika." ¹⁸ Aviô izikoa fa hitan'i Jesosy irô vahoaka nagnodidigny Izy, nagnamia toromarika mba hialagna arÿ ampitan'ny ranomasigny Galilia Izy. ¹⁹ Aviô mpanoro-dalàgna araiky nagnantogno Izy aviô nagnano hoe: "Ô mpampianatra, hagnaraka anao zaha na aiza na aiza andihananao." ²⁰ Nambaran'i Jesosy taminany hoe: "Ny amboahaolo manan-davaka, aviô irô voron'ny lagnitry managna akany, fa ny zanak'olo tsy managna na aiza na aiza ampandriany lohany." ²¹ Araiky hafa tamin'drô mpianatra aby iô nivolagna taminany hoe: "Tompo, zaha ambilà akendriky andaiha aviô andevigny babako." ²² Nambaran'i Jesosy taminany hoe: "Mangnarahà zaha, aviô ambilà ny maty andevina ny maty aminany zaraiky.” ²³ Izikoa fa niditry tamin'ny sambohely araiky io i jesosy, nangataka Izy tao agnatin'io irô mpianatranany. ²⁴ Igny, fa nisy tafio-drivotra mahery nitranga tio amin'ny ranomasina, Kay rakotry ny onja ny sambo. Fa resin-tory jesosy. ²⁵ Nandaiha taminany irô mpianatra aviô namoha Izy, nagnano hoe: "Vonjeo atsika e, Tompo; ho faty isika!" ²⁶ Nambaran'i Jesosy tamin'drô hoe: "Nagnino anarô mavozo, arô hely finoagna?" Kay nitsangana Izy aviô nivolagna maré ny tsiko ndraiky ny ranomasigny. Kay nisy fitoniagna be avy tio. ²⁷ Gaga irô lehilahy aviô nivolagna hoe: "Fa Karazagna lehilahy ino ity, fa nata ny tsiko ndraiky ranomasignyaza mankatoa Izy?" ²⁸ Izikoa fa tagny ampità ndraiky tiô amin'ny tanànan'ny Gadarenesa i Jesosy, Kay nisy lehilahy aroé zay nifehezin'ny demonia nifanojo taminany. Irô niboaka baka tagny amin'ndrô fasagna aviô tegna nahery setra, noho izegny tsy nisy mpandaiha afaka nandalo tamin'ny lalagna izegny. ²⁹ Igny fa, nihiakiaka mafy irô aviô nagnano hoe: "Mpifagnino aby mba zahay ndraiky anao, ô ry zanakan-dRagnahary? Navy eto mba anao hampihorihory zahay alohan'ny fotoagna voatôndro?" ³⁰ Aviô nisy andian'ny lambo maromaro nihinagna tiô, tsy dia lavitra irô tiô loatra. ³¹ Mbola niangavy i Jesosy fo irô demonia aviô nagnano hoe: "Izikoa nandroaka zahay anao, Kay alefasa agny agnatin'dro andian'ny lambo iô zahay." ³² Nambaran'i Jesosy tamin'ndrô hoe: "Mandihana!" Kay niboaka tamin'ndrô irô demonia nandaiha tamindrô lambo aby iô; aviô igny fa, irô andiany jiaby nirifatra nidôtso ny bongo mideza nandaiha an-dranomasigny aviô maty tagny agnaty rano irô. ³³ Irô zay nikarakara irô lambo iô nilomay aviô nandaiha amin'ny tanàna irô ndraiky nitantara zaka jiaby , aviô surtout irô zaka jiaby nitranga tamin'ndrô lelahy nifehezin'ndro demonia. ³⁴ Igny fa, niboaka irô tagny amin'ny tanana jiaby mbaika hifanojo amin'i Jesosy. Izikoa fa hitan'ndrô Izy, nangataka Izy mba iala ny faritan'ndrô.