¹ Aza mitsara, mba tsy hotsaraigna anarô. ² Fa amin'ny fitsaragna nataonarô fo koa hitsaragna anarô, abaka aviô amin'ny fandrefesagna andrefesananarô fo koa handrefesagna anarô. ³ Nagnino anao mizaha tapany mololo hely agnatiny mason'ny ralahinao, kanefa tsy tsikaritrinao vata-kazo agnatiny masonao? ⁴ Kay amin'ny fomba akory hivolagnanao amin'ny ralahinao hoe: 'Ambilà zah agnadoso tapany mololo agnaty ny masonao,' kanaifa ndraiky vata-kazo mbola agnatin'ny masonao? ⁵ Hoanarô mpiatsaravelatsigny! Adosohà akendriky vata-kazo agnatiny masonao, aviô anao ahita tsara lairaka anao magnadoso tapany mololo amin'ny mason'ny ralahinao. ⁶ Aza amiagna amboa zaka masigny, aviô aza hatsipy alohan'ny lambo vatotsaranarô. Fa izikoa tsy zegny mety avoa dihany vitindrô, abaka aviô hifôtro ndraiky hanapatapaka anarô amin'ny tsijarany. ⁷ Mangatahà, mba amiagna anarô izegny. Matadiavà, mba hahita anarô. Dondogna fa ibiagna hoanarô izegny. ⁸ Fa hoandrô olo jiaby mangataka, ahazo izy; hoandrô olo jiaby mitady, ahita zegny; kay karah zegny koa hoan'drô olo mandondogno, hivahagna koa. ⁹ Sa azôvy aminarô, izikoa angatahan'ny zanany môfo, hagnamia vato izy? ¹⁰ Na koa angatahiny laoko, kay hagnamia izy bibilava? ¹¹ Noho izegny, izikoa anao ratsy, aza magnano mahay magnamia irô fagnamaizagna tsara amin'ny zanakanarô, tsy be mihoatra ny zaka jiaby mba zaka tsara amian'i Babanarô araiky an-dagnitry agny ho an'drô zay mangataka aminany? ¹² Noho zegny, na ino na ino zaka tianarô hataon'olo amin'ny vatagnanarô, kay tokony agnano karaha zegny amin'ndrô fo koa anarô, fa izegny lalàgna ndraiky irô mpaminany. ¹³ Midirà amin'ny varavaragna tery. Fa be varavaragna salakady malalaka lalagna mitôndra agny amin'n fahaverezagna, aviô maro irô olo mandaiha amin'izegny. ¹⁴ Fa tery varavaragna salakady sarotra lalagna mitarika mandaiha amin'ny fiainagna, aviô vitsy irô olo mahita izegny. ¹⁵ Mitandraimà amin'ndrô mpaminany sandôko, zay nagnantôgno anarô amin'ny sikin'ny ondrikôndrika kanaifa amboadia tegna mpagnano la chasse. ¹⁶ Amin'ny alalan'ny voany hahaizananarô irô. Mitsôngo raisin amin'ny fatsiky mba olo, na koa aviavy amin'ny songosongo? ¹⁷ Mitovy amin'izegny, kakazo tsara jiaby mamokatra voany tsara, fa kakazo ratsy, mamoha voa ratsy koa. ¹⁸ Ny kakazo tsara tsy afaka hamoha voany ratsy, na koa kakazo ratsy tsy afaka mamoha voany tsara. ¹⁹ Zay kakazo jiaby tsy mamoha voany tsara, dikan'izegny kapaigna aviô hatsipy agny agnatin'ny motrô. ²⁰ Kay noho zegny, ho hainarô irô zaka jiaby zegny amin'ny alalan'ny voany. ²¹ Tsy olo jiaby mivôlagna aminaka: 'Tompo, Tompo,' kay hiditry amin'ny fanjakan'ny lagnitry, fa irô zay magnano sitrapon'ny Babako zay agny an-dagnitry. ²² Maro irô olo mivolagna aminaka amin'izegny andro zegny hoe: 'Tompo, Tompo, fa tsy efa naminany tamin'ny agnaranao mba zahay, tsy raha efa namoaka irô demonia tamin'ny agnaranao, aviô nagnano irô asa be tamin'ny agnaranao?' ²³ Aviô zaha magnambara amindrô ampahabemaso hoe: 'Tsy nahay anarô fekiny zaha! Miala lavitry zaha fekiny, arô mpagnano ratsy!' ²⁴ Noho izegny, irô jiaby zay maregny volagnanaka aviô magnaraka izegny, kay karaha olo misy jery nagnorogno tragnonany agnambon'ny vatolampy. ²⁵ Latsaka malegny, aviô navy rano be aviô nandrofo ndraiky namely mare ny tsiko, fa tsy nianjera izany, satria nagnorogny teo agnambon'ny vatolampy. ²⁶ Fa anarô olo jiaby maregny vôlagnanaka zegny kay mbola tsy magnaraka izegny dikan'izegny karaha olo adala magnôrôgno tragnonany agnambony jia. ²⁷ Latsaka malegny, aviô navy rano-be, aviô nanjôfo ndraiky namely mare tamin'ny tragno tsiko, kay raotsaka izegny, aviô niafara tamin'ny faharavany." ²⁸ Aviô izikoa fa baka nagnambara irô vôlagna iô i Jesosy, gaga tamin'ny fampianarany irô vahoaka, ²⁹ satria nampianatra irô karaha olo managna fahefagna Izy, fa tsy karaha irô mpanora-dalagnan-drô.