¹ Nikahian'i Jesosy niaraka irô mpianatranany aroé ambin'ny folo aviô nagnamia irô fahefagna amin'ny fagnahy maloto, mba handroagna irô, ndraiky hagnajanga irô karazagn'aretigny ndraiky karazagna faharariagna jiaby. ² Indreto aby irô agnaran'ndrô apostoly aroe ambin'ny folo. Ny voalohany, Simona (izay kahiagna koa Petera), aviô Andreo ralahinany; Jakoba anaka lahin'i Zebede, ndraiky Jaona ralahiny; ³ Filipo, ndraiky Bartleomy; Tomasy, ndraiky Matio mpamory hetra ; Jakoba zanaka lahin'i Alfeosy, ndraiky Tadeosy; ⁴ Simona lay Zelota, aviô Jodasy Iskariota, lay hamadiky Izy. ⁵ Nirahin'i Jesosy irô aroé ambiny folo. Nanôjo irô Izy aviô nivolagna nagnano hoe: "Aza mandaiha agny amin'ny toeragna zay hitoeran'ndrô Jentiissa anarô, aviô aza miditry amin'ny renivohitran'ndrô samaritana. ⁶ Fa mandiana fo agny amin'ndrô ondrikondriky very amin'ny taranak'Israely; ⁷ Kay izikoa fa mandaiha anarô, mitoria aviô ambarao hoe: 'Efa tsy aila ny fanjakan'ny lagnitry.' ⁸ Jangaho ny marary, atsangano ny maty, diova irô boka, aviô roahy irô demonia. Araka nazahoanarô maimaimpoagna, magnamaiza maimaimpoagna koa. ⁹ Aza mitôndra volamena, volafotsy, na varahana agny amin'ny kitapom-bolanarô. ¹⁰ Aza mitôndra kitapom-batsy amin'izay handihananarô, na fisikiny hafa, na kiraro, na tehina, fa ny mpiasa mendriky hahazo hanigninany. ¹¹ Na ino na ino tanàna maventy na tanàna madiniky hidiranarô, zahava zay mendriky ao, aviô mipitrahà agny mandra-pialanarô. ¹² Izikoa vao miditry amin'ny tragno anarô, miarabàha ao. Izikoa mendriky tragno, kay aoka ny fiadanagnanarô ho avy ao. ¹³ Fa izikoa fa tsy mendriky izegny, aoka ny fiadanagnarô hipody aminarô. ¹⁴ Hoan'ndrô zay tsy mandray anarô na tsy mitandregny volagnanarô, ahitsano ny fotaka amin'ny vitinarô, izikoa fa miala amin'ny tragno zegny na amin'ny tanam-be zegny anarô. ¹⁵ Ambarako marigny aminarô, fa ho moramora kokoa amin'ny tanin'i Sodoma ndraiky Gomora amin'ny andro fitsaragna noho izegny tanam-be izegny. ¹⁶ Igny fa, handaifa anarô karaha ondrikondriky agnivon'ny ambodia Zaha, kay misihà jery karaha ny menarana aviô tsy manan-tsigny karaha voromalala. ¹⁷ Mitandraima amin' olo! Hagnamia anarô amin'ny filan-kevitrin'drô, aviô hamôpoko anarô amin'ny sinagogan'ndrô. ¹⁸ Abaka aviô handesigny manoloagna ny governora ndraiky mpanjaka anarô nohon'ny aminaka, mba ho vavolombelogno hôandrô ndraiky hoandrô Jentilisa. ¹⁹ Izikoa magnamia anarô irô, kay aza managnana ahiahy amin'ny akory na ino volagnindro, fa hagnamia anarô amin'ny fotoagna zay tokony hivolagniny. ²⁰ Fa tsy anarô hivolagna, fa tsy fagnahin'i babanarô hivolagnana aminaro ao. ²¹ Ralahy hagnamia ralahy ho amin'ny fahafatesagna, aviô ny baba ny zanany. Ny zanaka hitsangana hanohitry ny ray aman-dreniny kay hahatonga ny fahafatesagn'drô. ²² Ho alan'olo jiaby anarô nohon'ny amin'ny agnarako. Fa na azôvy na azôvy miharitry hatrimin'ny farany, kay ho voavonjy olo zegny. ²³ Izikoa magnenjiky anarô ao amin'io tanàna maventy irô, milifasa agny amin'ny magnaraka, fa ambarako marigny aminarô, fa tsy hahatapitry irô tananan'Israely alohan'ny havian'ny Zanak'Olo anarô. ²⁴ Ny mpianatra tsy maventy nohon'ny mpampianatra, na ny mpanompo ho agnambo nohon'ny tompony. ²⁵ Ampy ho amin'ny mpianatra izikoa avy karaha ny mpampianatranazy izy, aviô mpanompo karaha tompony. Izikoa nikahian'ndrô hoe Belzeboba tompon'ny tragno, ho ratsy lavitry karaha akory irô agnaragna hikahiagna irô isam-piankohonagna! ²⁶ Noho izegny aza mavozo irô, fa tsy hisy takony zay tsy hiboely, aviô zaka miafigny tsy ho hay. ²⁷ Zay ambarako anarô ao amin'ny maiizigny, ambaraho amin'ny andra mazava, aviô zay bisibisiky regninaro amin'ny sofigninarô, toria agny agnambon'ny tafon-tragno. ²⁸ Aza mavozo hoan'ndrô zay mamono vatagna kanaifa afaka mamono fagnahy. ²⁹ Fa kanaifa ndraiky, matahorà hoan'ndrô zay afaka mamotiky fagnahy ndraiky vatagna agny amin'ny heloky. ³⁰ Izo mba tsy vola madiniky hely hamarotana fody aroe? Fa tsy mbola misy na araiky amin'ndrô aby lavo amin'ny tany izikoa tsisy fahalalagnan'ny babanarô. Fa nata volovon-dohanarô aby voakonty. ³¹ Aza mavozo. Manan-danja bebe kokoa noho ny fody maro anarô. ³² Noho izegny, zay magnaiky Zah jiaby io agnatrehan'olo, ho ekeko fo eo agnatrehan'ny babako zay agny an-dagnitry. ³³ Fa zay manda zaha eo agnatrehan'ny olo fo, ho laviko koa eo anatrehan'ny babako zay agny an-dagnitry. ³⁴ Aza mieritreritry fa zaha avy hitôndra fiadanagna eto an-tany. ³⁵ Tsy avy mba hitôndra fiadanagna zaha, fa sabatra. ³⁶ Fa navy zaha hagnasaraka ny zanaka lahy amin'ny babany, ndraiky ny zanaka vavy amin'ny reniny, aviô vinantovavy amin'ny rafozam-baviny. Irô zay ao an-tokantragnonany fo ho lôso fahavalon'olo. ³⁷ Zay tia babany na mamany mihoatra zaha tsy mendriky zaha dikan'izegny; aviô zay tia mandilatra zanaka lahy na ny zanaka vavy mihoatra zaha, tsy mendriky zaha dikan'izegny. ³⁸ Zay tsy mangala hazofijaliagnanany kay magnaraka zaha, tsy mendriky zaha dikan'izegny. Zay magnavotry aigniny hahavery izegny. ³⁹ Fa zay mahavery aigniny nohon'ny aminaka hahita izegny. ⁴⁰ Zay mangala anarô mandray zaha, aviô zay mandray zaha mandray lay nagniraka zaha fo koa. ⁴¹ Zay mandray mpaminany satria mpaminany izy kay hahazo valisoan'ny mpaminany, aviô zay mandray olo marigny satria olo marigny izy kay hahazo valisoan'ny olo marigny. ⁴² Na azôvy na azôvy magnamia araiky madiniky amin'izegny, nata rano manintsy araiky kapoaka higiagna aby, satria izy mpianatra, kay ambarako marigny aminarô fa, tsy ho very ny valisoanany."