¹ Gny fagnambara mahakasiky an'i Ninive. Gny bokin'gny fahitan'i Nahoma, gny Elkosita. ² Zagnahary saro-piaro sady mamaly faty YAveh. Mamaly faty sady feno hahoria Yaveh. Mamaly rasy amin'ireo pifagnandry aminazy Yaveh, sady manohy gny hahoriany ho an'gny fahavalony Izy. ³ MAhari-po sady lahibe amin'gny heriny Yaveh; sy hagnambara reo fahavalony ho sy manan-signy velively Izy. Hanao gny lalany amin'gny tafio-drifosy Yaveh, vo gny raho gny botany gny tombony. ⁴ Mizaka fatrasy gny ranomasy Izy dra magnamaiky anizay; mandrisy gny renirano aby Izy. Ketraky i Basana, dra i Karmela avo koa; malazo reo vonikazon'i Libanona. ⁵ Mihovisy amin'gny fagnatrehany reo tendrombohidy, vo mietry reo havoa; miroda amin'gny fagnatrehany gny tany, eka vatany, gny tany vo ze olo aby mitoboky aminazy ao. ⁶ Ia gny hahazoro eo agnatrehan'gny hahoriany? Ia gny hahatohisy gny firehetan'gny hahoriany? Miraraky manahaky gny afo gny hahoriany, nivakivakiny reo vatolapy. ⁷ Soa Yaveh, ferova fatrasy amin'gny andro fahoria; sady mahatoky amin'ize mialoky aminazy Izy. ⁸ Fa hanapisy tateraky reo fahavalony amin'gny tondra-drano manafosy koa Izy; hagnitriky andreo agny amin'gny hezy Izy. ⁹ Mitetiky ino anohera an'i Yaveh handrareo ry vahoaky? Hamara tateraky anizay Izy; sy hisondrosy fagnindrony gny fahoria. ¹⁰ Fa ho reki-tahosy manahaky gny kirihisy silo; ho safosy gny raha finomy; ho levon'gny afo tateraky manahaky gny mololo maiky ereo. ¹¹ Nisandrasy tao aminiha, ry Ninive, gny olo ze nikasa raha rasy hagnohera an'i Yaveh, dra olo ze nandrisiky faharasia. ¹² Zao gny zakan'i Yaveh: " Ndre dra ao amin'gny tazakiny tateraky vo maro isa aza ereo, dra ho ripaky ereo; sy hisy olo sasy. Fa hanao, ry Joda: Ndre dra napahory aniha aza Zaho, dra sy hapahory aniha sasy Zaho. ¹³ Dra hanapaky gny ziogan'ireo olo ao aminiha Zaho; hanapaky reo fatosiniha Zaho." ¹⁴ Fa nagnome beko mahakasiky aniha Yaveh, ry Ninive: " Sy hisy sasy gny taranaky handay gny agnaraniha. Hagnombosy reo sari-draha voasokisy vo reo sarin-draha an-idina amin'ireo fasangen'ireo zagnahariniha Zaho. Hialy reo fanasaniha Zaho, akory sinosino hanao." ¹⁵ Ingo, egny an-tendrombohisy gny tomboky gny olo ze manday vaovao mahafaly, zay magnambara fiadagna! Akalazao reo firavoravoandrareo, ry Joda, dra efao reo voadindrareo, fa sy holefa andrareo sasy gny rasy fagnahy; ripaky tateraky izy.