¹ Niresaky tamin'i Mosesy Yaveh, nanao ho: ² ''Zakao amy zanak'Israely ho:'Zay aby eo amy zanak'Israely,na vahiny ze mitoesy agny Israely ka manolosy gny zanany amin'i Moloka, dra ao ho maty.Ao hitora-bato anazy gny olony tany. ³ Hampifanandry gny tavako amin'izay olo zay avo koa zaho dra ho fognoriko e amin'ereo olony izy satria fa natolony an'i Moloka gny zanany, ba handotoa gny toerako masy. ⁴ Raha mipy gny masony amin'izay olo zay gny olony tany fa gny manolosy gny zanany amin'i Moloka, raha sy mamono anazy izy reo, ⁵ dra Zaho mihisy gny hampifanandry gny tavako amin'izay olo zay vo gny fokony, dra hofognoriko izy vo re hafa aby ze mivarosy amy vatany ba hijangajanga miaraky amin'i Moloka. ⁶ Gny olo zay mitoliky amin'ereo zay miresaky amy maty, na reo zay miresaky amy fagnahy ba hivarosy gny vatany amin'ereo, dra hanandry gny tavako amin'izay olo zay zaho;ho fognoriko eo amy olony izy. ⁷ Noho zay hamafiso gny vatandrareo dra ao ho masy , satria Zaho gny Yaveh Zagnaharindreo. ⁸ Ao hitandry gny didiko iandrareo dra hagnaraky reo.Fa Zaho gny Yaveh zay nanoka andrareo ho masy. ⁹ Ao ho maty tokoa zay magnozo gny rany na reniny.Fa nagnozo gny rany na reniny izy, ka ory dra mendriky ho maty. ¹⁰ Gny lelahy zay magnisakisam-baly amy valin'olon-kafa, midika ho, zay mijangajanga amy sakaizam-baliny-ao gny mpijangajanga vo gny nijangajanga samy ho maty tokoa. ¹¹ Gny lelahy zay miara-mandry amy valin-drany ba handry aminazy dra fa nangala baraka gny rany.Ao ho maty tokoa gny zanadahiny vo gny valiny rany.Ory izy reo dra mendriky gny ho maty. ¹² Raha misy lelahy miara-mandry amy vinanto ampelany, dra ao samy ho maty tokoa izy ro.Fa nanao fahavetaveta izy reo.Ory izy reo dra mendriky gny ho maty. ¹³ Raha misy lelahy miara-mandry amy lelahy hafa , manahaky gny miaraky amy ampela, dra samy fa nanao raha mapagnelakelaky anereo.Ao ho maty vatany ereo.Ory izy reo dra mendriky gny ho maty. ¹⁴ Raha misy lelahy manambaly ampela dra manambaly gny reniny avo koa, dra faharasia zay.Ao ho oro izy reo, izy vo gny ampela, ba sy hisy faharasia eo amindrareo. ¹⁵ Raha misy olo miara-mandry amy biby, dra ao ho maty vatany izy, dra ao iandrareo hamono gny biby. ¹⁶ Raha misy ampela magnato biby ba hiara-mandry amin'izay, dra ao hamono gny ampela vo gny biby iandrareo.Ao ho maty vatany izy reo.Ory vo mendriky ho maty izy reo. ¹⁷ Raha misy lelahy miara-mandry amy anabaviny, na koa amy zanakapelany rany na zanakapelany reniny-raha miara-mandry aminazy izy dra izy miaraky aminazy, dra raha mahamegnasy zay.Ao hofognory eo amy fagnatreha gny olony izy reo, satria niara-nandry tamy anabaviny.Dra hibaby gny helony izy. ¹⁸ Raha misy lelahy miara-mandry amy ampela mandrisy gny fadimbolany dra fa niara-mandry taminazy, dra fa nampiseho gny lio nikoria taminazy, gny nipoirany liony izy.Dra ao samy hofognory sy ho eo amy olony izy ro. ¹⁹ Ao sy hiara-mandry amy rahavavin-dreninao ianao, na amy anabavin-dranao, satria hangala baraka gny havanao mariny anao ianao.Sy maisy hibaby gny helokao ianao. ²⁰ Raha misy lelahy miara-mandry amy ninitoany , dra nangala baraka gny dadatoany izy.Fa gny maty izy reo, dra samy ho saziko, dra fa gny maty izy reo, dra ho alako gny lovany zanakin'ereo zay mety ho azony aby amin'ereo raiky aman-dreniny. ²¹ Raha misy lelahy manambaly gny valin-drahalahiny raha bo velo gny rahalahiny, dra fahafaham-baraka, zay.Fa nangala baraka gny rahalahiny izy, dra ho alaki amy zanany gny fanagna aby mety fa nolovan'ereo aby amin'ereo ray aman-dreniny. ²² Koa ao iandrare hitandry gny didy aman-dalako aby;ao hankato anizay iandrareo ba sy handoa andrareo gny tany zay hindesako andrareo ba honenandrareo. ²³ Ao sy handeha amy fomban'ereo firenena zay horoahiko sy eo alohandrareo iandrareo, satria fa nanao anizay raha aby zay izy reo, dra halako reo. ²⁴ Hoy zaho amindrareo ho:''Handova gny tanin'ereo inadrareo;hagnome anizay ho fanagna ho andrareo zaho, tany tondrandronono vo gny tately.Zaho gny Yaveh Zagnaharindreo, zay fa nagnavaky andrareo tamin'ereo olon-kafa. ²⁵ Noho zay ao iandrareo hagnavaky gny biby malio vo gny maloto, gny voro-matily maloto vo malio.Ao iandrareo sy handoto gny vatandrareo amin'ereo biby maloto ma reo voromitily na amy raha -manan'ay aby zay mandaly amy tany, zay fa navahiko ho maloto tamindrareo. ²⁶ Ao ho masy iandrareo, fa Zaho, Yaveh, dra masy, dra fa nagnavaky andrareo tamin'ereo olon-hafa zaho,satria anahy inadrareo. ²⁷ Ao ho maty vatany gny lelahy na gny ampela zay miresaky amy maty na miresaky amin'ereo fagnahy.Ao hitora-bato anazy reo gny olo.Ory izy reo dra mendriky gny ho maty.'''