¹ Dra namaly Joba dra nizaka ho: ² "Fataro mary fa zay vatany gny izy. Fa akory gny ahafahan'gny olo raiky ho mary amin'Agnahary? ³ No te-hialy hevisy amin'agnahary izy, sy afaky hamaly Anazy ndray mandeha amin'gny arivo izy. ⁴ Zagnahary dra hendry am-po vo matazaky amin'gny heriny; ia gny fa nagnamafy gny vatany hanohisy Anazy dra nahomby?--- ⁵ Izy zay mamindra gny tezovohisy ka sy mampitandry na ia na is no fa mamaliky reo amin'gny fahoriany Izy--- ⁶ Izy zay magnozongozo gny tany hiala eo amin'gny toerany vo mapihovisovisy gny andriny. ⁷ Zay Zagnahary zay gny mizaka gny masoandro sy hiposaky, dra sy miposaky zay, vo gny manafosy reo kita, ⁸ zay Izy vatany gny mamelasy gny lagnisy sady manasiosy gny onzan-dranomasy, ⁹ zay manao gny Bera, Telonohorefy, Ikotokelimiadilaona, vo reo kita agny Asimo. ¹⁰ Zay Zagnahary zay avo gny manao raha lahibe, raha sy takasy gny say--- raha mahagaga sy hita isa. ¹¹ Ingo, mandeha agnilako eto Izy, fe sy hitako; mandalo avo koa Izy, fe sy fatako. ¹² No manaisotra raha Izy, ia gny hahasaka Anazy? Ia gny afaky hizaka aminazy ho:' Ino ahinao tiky?' ¹³ Zagnahary sy hangalaky gny fahoriany; reo pagnapy an-dRahaba aza miondriky eo ambaniny. ¹⁴ Koa mainky fa akory gny hahafahako mamaly anazy, hahafahako misafisy zaka halahasy aminazy? ¹⁵ Ndre dra mary aza zaho, dra sy afaky hamaly anazy; mitalaho fammindram-po amin'gny pisarako avo gny azoko ahy. ¹⁶ Ndre dra hitoka aza zaho vo namaly anahy Izy, sy nino zaho ho niteo gny feoko Izy. ¹⁷ Akory mandrava anahy amin'gny tafio-sioky vo manafosy gny feriko amin'gny sy misy antony IZy. ¹⁸ Sy mamela anahy hiay aby Izy; fa kosa, fenony raha-mafaisy zaho. ¹⁹ No resaky tazaky, ingo!, mahery Izy! No resaky fisara ia gny afaky hapitoka Anazy? ²⁰ Ndre dra amin'gny mary aza zaho, gny vavako avo gny hiapanga anahy; vo ndre dra sy manan-signy aza zaho, reo zakako hagnaporofo anahy fa meloky zaho. ²¹ Sy mana-signy zaho, kanefa sy dariako sasy gny momba gny vatako; ahiko sinosino gny fiaignako. ²² Sy manova raha zay, ka zay gny izakako ho haringany miaraky gny olo sy misy signy vo gny olo rasy fagnahy. ²³ No hamono tapoky gny areti-mandripaky, dra hihomehy gny amin'gny fahorian'gny olo sy mana-signy Izy. ²⁴ Nome teo an-tagnan'gny olo rasy fagnahy gny tany; Zagnahary manafosy reo tarehin'gny pisara zay. Fani sy Izy gny manao anizay dra ia se? ²⁵ Gny androko dra malaky fandeha noho gny panday hafasy milomay; gny androko dra mihely; ka sy misy soa hitan'ireo ndra eza ndre eza. ²⁶ Malaky fandeha manahaky gny lakan-zozoro regny, vo malaky fandeha manahaky gny voromahery mipaoky gny hazany. ²⁷ No nizaka zaho ho hagnaligno reo fitaraignako zaho, hangalaky gny pozy malaheloko zaho ka ho faly, ²⁸ dra hatahosy gny alaheloko aby zaho akory gny fatako fa sy hihevisy anahy ho sy mana-signy Hab=nao. ²⁹ Ho melohy zaho; ka nagnino se zaho gny tokony hiezaky sy amin'gny antony? ³⁰ No nanasa gny vatako tamin'gny ranon'oram-panala zaho dra nanao gny tagnako malio sy nisy sahala anizay, ³¹ dra handokoky anahy an-kady agny Zagnahary, vo gny akazoko dra ho rikoriko gny aminahy. ³² Fa sy olo manahaky anahy Zagnahary, ka afaky hamaly Anazy zaho, ka hiaraky avy eo amin'gny fisara zahay. ³³ Sy misy pisara eo agnelagnelanay mbo hametraky gny tagnany aminay ro. ³⁴ Sy misy pisara hafa afaky mangalaky gny sorakazon'Agnahary aminahy, zay afaky mita gny horohorony sy hapatahosy Anazy. ³⁵ Dra hizaka fatrasy zaho sady sy hatahosy Anazy.Kanefa amin'izao raha-misy zao, dra sy afaky hanao anizay zaho.