¹ Ho fagnapin'izeho i Eliho dra mbo nanohy. nizaka ho: ² "Mihevisy ra hanao fa mary zeho nofa mizaka hanao ho: 'Gny zoko eo agnatrehan'Agnahary?' ³ Akory hanao nagnotany ho: 'Ino gny asan'izeho aminahy?' vo ho: 'Ho soa loasy ra zaho no nanota?' ⁴ Hamaly aniha zaho, hanao vo reo sakezaniha. ⁵ Atio gny lagnisy, dra atio zeho; atio gny lagnisy, zay abo noho hanao. ⁶ No nanota hanao, dra ino gny rasy nahiniha an'Agnahary? No mivory nloasy gny fandikan-dalaniha, dra ino gny ahiniha Aminazy? ⁷ No mary hanao. dra ino gny afaky homeniha Anazy? Ino gny ho rambesiny lat'amin'gny tagnaniha? ⁸ Gny faharasianiha dra mety handrasy olo raiky, amin'gny maha-olo aniha, vo gny fahamarigna dra mety hahasoa gny zanaky gny olo hafa. ⁹ Nohon'gny asa fapahoria maro, dra mitaray gny olo; mila vonzy lat'eo an-sandrin'ireo olo mahery ereo. ¹⁰ Fa sy misy ndre ia ndre ia mizaka ho: 'Eza Zagnahary gny Mpahary anahy, zay magnome hira amin'gny hariva, ¹¹ zay mapianasy bebe loasy asika noho gny hapianariny reo bibidian'gny tany, dra ze manao asika ho hendry noho reo voron'gny lagnisy?' ¹² Any ereo gny mitaray, fa Zagnahary sy magnome valiny andreo nohon'gny fieboebon'gny olon-drasy. ¹³ Sy hahare gny fitomagnia mola vatany Zagnahary; sy hidary anizeho gny Tsitoha. ¹⁴ Akory gny hakelikin'gny hamaliany aniha no mizak hanao sa dy mahita Anazy, fa gny aliniha dra eo agnatrehany, dra miamby Anazy hanao! ¹⁵ Akory gny hakelikin'gny hamaliany aniha no mizaka hanao fa sy magnafay ndre ia ndre ia amim-pahoria mihisy Izy, sady sy midary loasy gny avognavon'gny olo Izy. ¹⁶ Dra nanokasy gny vavany so hizaka fahamola avo i Joba; namory zaka sy am-pahalala izy."