¹ Koa androany, ry Joba, mengavy aniha zaho, mandrenesa gny lahazkako; tenoy gny zakako aby. ² Ingo amizao, fa manokasy gny vavako zaho; fa mizako tao am-bavako gny lelako. ³ Boak'amin'gny fahisian'gny foko gny zakako; magnambara fahalala malio gny sogniko. ⁴ Gny Fagnahin'Agnahary gny nano anahy; gny fofonain'gny Tsitoha gny nagnome fahveloma anahy. ⁵ No anoniha ahy; valio zaho; alaharo eto agnatrehako gny zakako dra misana. ⁶ Ingo, manahaky aniha avo zaho eo amason'Agnahary; namboary boaky tamin'gny tanimanga avo koa zaho. ⁷ Ingo, sy hapatahosy aniha gny horohoroko; na havesasy aniha gny sindriko. ⁸ Nizaka teo an-sofiko vatany hanao; reko gny feon'gny zakaniha nanao ho: ⁹ ' Malio zaho sady sy misy heloky; sy manan-signy zaho, sady sy misy ota aminahy ato. ¹⁰ Ingo, mahita iriky hizeragny anahy Zagnahary; rambesiny ho sahala gny fahavalony zaho. ¹¹ Hatobokiny amin'gny hazo boloky gny tomboko; dinihiny aby gny lalako.' ¹² Ingo, amin'izeho gny mahadiso aniha---hamaly aniha zaho, akory lahibe noho gny olo Zagnahary. ¹³ Nagnino hano gny mialy aminazy? Sy magnisa ndre ino ndre ino amin'ize ahiniha Izy. ¹⁴ Fa mizaka ndraiky mandeha Zagnahary---eka, indro, ndre dra sy sikarisy gny olo aza zay. ¹⁵ Ao agnaty nofy, ao agnaty fahita amin'gny hariva, nofa avy amin'gny olo gny torimaso laliky, nofa ao agnaty faharendreha eo am-pandria--- ¹⁶ dra manokasy gny sofin'gny olo Zagnahary, sady mapitahosy andreo amin'gny horohoro, ¹⁷ so hisitogna gny olo hiala amin'gny tanzaony feno fahota, vo hagnalavira gny fieboeboa aminazy. ¹⁸ Zagnahary gny miaro gny ain'gny olo amin'gny lavaky, gny ainy sy hiepita ho agny amin'gny fahafatesa. ¹⁹ Faizy amin'gny fahararia eo am-pandria avo koa gny olo, mindray amin'gny fangirifiri sy mizano ao amin'gny tolany, ²⁰ so halay hany gny ainy, sady halay hanim-be gny fagnahiny. ²¹ Levo gny nofony so sy ho hita; gny tolany, ze sy hita taloha, dra mitrakitraky amizao. ²² Eka vatany, magnariny lavaky gny fagnahiny, vo gny ainy marin'ireo ze misiry gny hanorotono anizay. ²³ Fe no misy anzely raiky afaky gny ho pagnelagnela ho anazy, dra pagnelagnela raiky, boak'amin'ireo anzely agnalignaly, so hapiseho anazy ze mety hahy, ²⁴ vo no malemy fagnahy aminazy gny anzely dra mizaka amin'Agnahary ho: 'Vonzeoso dy hitily agny an-davaky tiky olo tiky; fa nahita vilim-pagnavota ho anazy zaho.' ²⁵ vo dra hazary ho vaovao noho gny an'gny zaza gny nofony; dra hihery amin'gny andro tamin'gny herin'gny fahatanorany izy. ²⁶ Hivavaky amin'Agnahary izy, dra halemy fagnahy aminazy Zagnahary, so hahitany gny tarehinAgnahary amin'gny fifalia. Homen'agnahary an'gny olo gny fandreseny. ²⁷ Dra hihira eo agnoloan'gny olo hafa zeho olo zeho dra hanao ho: 'Nanota zaho ka namaliky ze mary, fe sy nofaizy gny fahotako. ²⁸ Namonzy gny fagnahiko sy hizoso agny an-davaky Zagnahary; hahita agny fahazava hatragny gny fiaignako. ²⁹ Ingo, manao reo raha reo amin'gny olo raiky Zagnahary, indro, eka, intelo aza, ³⁰ so handay gny fagnahiny hihery boakagny an-davaky, so ho hazava amin'gny fahazavan'ay izy. ³¹ Mitandrema, ry Joba, dra mitenoa anahy; misigna dra tenoy zaho. ³² Nomisy hambara hanao, dra valio zaho; mizaka, fa magniry gny hagnaporoso zaho fa mary hanao. ³³ No sy zay, dra tenoy zaho; misigna, dra hapenariko fahendre hanao."