¹ Gny olo, ze nateraky apela, dra miay andro keliky avo sady feno fahoria. ² Misimoky amin'gny tany sahal gny vonikazo izy sady voazera; milefa manahaky gny aloky izy sady sy maharisy. ³ Mbo magnety an'iregny se Hanao? Moa andesinao ho saray mindray aminao zaho? ⁴ Ia gny afaky manday raha malio boak'amin'gny raha maloto? Sy misy. ⁵ Voafarisy gny andron'gny olo. Hano gny manapaky gny isan'gny volana iaignany; hanao gny nanondro gny fetrany zay sy azony hihoara. ⁶ Mivaliha aminazy mbo hisaharany, dra mbo hankafizany gny androny sahala gny pikarama no afaky manao anizay izy. ⁷ Mety hisy fagnatena gny hazo; no voakapa zay, dra mety hisimoky ndraiky, mbo sy hanzavo gny tahony tanora. ⁸ Ndre dra miha-antisy ao amin'gny tany aza gny fakany, vo maty ao amin'gny tany gny fotony, ⁹ fe ndre dra membo rano avo aza zay, dra hisiry sady hisandrahaky manahaky gny raha-misiry zay. ¹⁰ Fa maty gny olo; dra nazary malemy izy; eka vatany, mizano sy miay gny olo, vo eza izy boakeo? ¹¹ Manahaky gny fanzavognan'gny rano amin'gny farihy, vo manahaky gny faharitan'gny renirano ka maiky, ¹² dra manahaky anizay koa gny handrian'gny olo dra sy mifoha sasy. Mandra-paha-sy hisian'gny lagnisy sasy, dra sy hifoha na hisanga amin'gny torimasony ereo. ¹³ Iriako gny mbo hagnavonianao anahy agny amin'gmy Fiainan-sy hita lavisy gny fahoria, vo mbo hifaharanao anahy ao amin'gny mivony mandra-pisahasy gny hahorianao, vo hanendrenao fotoa voatondro ho anahy hizanognako agny vo mbo hahasiarovanao anahy boakeo! ¹⁴ No maty gny olo raiky, moa mbo hiay ndraiky izy? No zay, dra magniry gny handigny gny fotoam-paharokakiko aby agny zaho mandra-pahavin'gny fanafaha anahy. ¹⁵ Hitoka Hanao, dra hamaly Anao zaho. Hanam-pagniria amin'gny asan'gny tagnanao Hanao. ¹⁶ Hagnisa vo hiahy gny diako Hanao; sy hifahasy gny fahotako Hanao. ¹⁷ Ho voahisy tombo-kase ao agnaty kitapo gny fandikan-dalako; vo hagnaro gny heloko Hanao. ¹⁸ Fa ndre gny tendrombohisy aza lavo dra nazary sinosino; ¹⁹ ndre gny vatolapy aza voahozongozongo amin'gny toerany; lanin'gny rano gny vato; lasan'gny riakany gny botany gny tany. Manahaky anizay, gny hanorotoroanao gny fagnatenan'gny olo. ²⁰ Mahagio anazy mandrakariva Hanao, dra lasa izy; ovainao gny tarehiny dra halefanao mbo ho faty izy. ²¹ No omem-boninahisy reo zanadahiny, dra sy fatany zay; vo no haetry ereo, dra sy hitany zay. ²² Gny fahararin'gny vatany manoka avo gny sapany, dra mandala ho an'gny vatany avo izy.